តើ​ចិន និង​រុស្ស៊ី ទទួល​ផល​ប៉ះពាល់​អ្វី​ខ្លះ ពី​ការ​អនុម័ត​ថវិកា​យោធា ៧១៦​ពាន់​លាន​ដុល្លារ​របស់ ត្រាំ?

  • 2018-08-14 02:32:36
  • ចំនួនមតិ 0 | ចំនួនចែករំលែក 0

ចន្លោះមិនឃើញ


លោក ដូណាល់ ត្រាំ ប្រធានាធិបតី​អាមេរិក កាលពី​ថ្ងៃ​ទី១៣ ខែ​សីហា ២០១៨ ម្សិលមិញ បាន​អនុម័ត​កញ្ចប់​ថវិកា​ការពារ​ជាតិ​ឆ្នាំ​២០១៩ ចំនួន ៧១៦​ពាន់​លាន​ដុល្លារ នៅ​មូលដ្ឋាន​កងទ័ព​អាមេរិក Fort Drum ក្នុង​ក្រុង New York។ កញ្ចប់​ថវិកា​ការពារ​ជាតិ ៧១៦​ពាន់​លាន​ដុល្លារ​នេះ គឺ​កញ្ចប់​ថវិកា​ការពារ​ជាតិ​ដែល​ច្រើន​បំផុត​មិន​ធ្លាប់​មាន​ពី​មុន​មក ក្នុង​ប្រវត្តិសាស្រ្ត​អាមេរិក។

លោក ដូណាល់ ត្រាំ ប្រធានាធិបតី​អាមេរិក ចុះ​ហត្ថលេខា​អនុម័ត​ច្បាប់​ស្ដី​ពី​កញ្ចប់​ថវិកា​ការពារ​ជាតិ​ឆ្នាំ​២០១៩ របស់​អាមេរិក/ រូបភាព៖ ReuterS

ប៉ុន្មាន​ម៉ោង​ប៉ុណ្ណោះ ក្រោយ​ការ​អនុម័ត​ពី​លោក ត្រាំ មហាយក្ស​ចិន​បាន​បញ្ចេញ​ប្រតិកម្ម​មុន​គេ ជុំវិញ​កញ្ចប់​ថវិកា​ការពារ​ជាតិ​ដ៏​ច្រើន​សន្ធឹកសន្ធាប់​មិន​ធ្លាប់​មាន​ពី​មុន​មក​របស់​អាមេរិក។ ក្រសួង​ពាណិជ្ជកម្ម​ចិន​បាន​ប្រកាស​ថា ក្រសួង​នឹង​ពិនិត្យ​គ្រប់​ជ្រុងជ្រោយ​ពី​ច្បាប់​ស្ដី​ពី​កញ្ចប់​ថវិកា​ការពារ​ជាតិ​ឆ្នាំ​២០១៩ របស់​អាមេរិក។ ការ​ពិនិត្យ​នេះ ដោយសារ​ច្បាប់​ស្ដី​ពី​កញ្ចប់​ថវិកា​ការពារ​ជាតិ​អាមេរិក​បាន​ពង្រឹង​តួនាទី​ស្នូល​ដល់​គណៈកម្មាធិការ​ទទួល​បន្ទុក​វិនិយោគ​បរទេស ក្នុង​ការ​ត្រួត​ពិនិត្យ​គម្រោង​វិនិយោគ​បរទេស​ថា​តើ​វា​មាន​ទម្ងន់​ប៉ុណ្ណា​គំរាមកំហែង​ដល់​សន្ដិសុខ​ជាតិ​អាមេរិក។ ចំណាត់ការ​នេះ ត្រូវ​បាន​មើល​ឃើញ​ថា បាន​ដាក់​គោលដៅ​លើ​ប្រទេស​ចិន ជាពិសេស​គឺ​ក្រុមហ៊ុន​ចិន ZTE Corp និង Huawei Technologies Co Ltd។

ក្រសួង​ពាណិជ្ជកម្ម​ចិន​បាន​បន្ថែម​ទៀត​ថា ក្រុមហ៊ុន​ចិន និង​ក្រុមហ៊ុន​អាមេរិក​មាន​កិច្ចសហប្រតិបត្តិការ​វិនិយោគ​រឹងមាំ ហើយ​សក្ដានុពល គឺ​ធំសំបើម។ រដ្ឋាភិបាល​នៃ​ប្រទេស​ទាំង​ពីរ​គួរ​តែ​ស្ដាប់​សំឡេង​របស់​ក្រុមហ៊ុន​នានា ហើយ​ផ្ដល់​បរិស្ថាន​ល្អ​មួយ និង​ការ​រំពឹង​ទុក​ដ៏​មាន​ស្ថិរភាព​មួយ។

ចំណែក​ប្រទេស​រុស្ស៊ី​វិញ ក៏​ទទួល​ការ​ប៉ះពាល់​មិន​តិច​ផង​ដែរ​ពី​កញ្ចប់​ថវិកា​ការពារ​ជាតិ​របស់​អាមេរិក។ ច្បាប់​ស្ដី​ពី​កញ្ចប់​ថវិកា​ការពារ​ជាតិ​ឆ្នាំ​២០១៩ របស់​អាមេរិក​បាន​កម្រិត​ការ​ចូលរួម​ក្នុង​សន្ធិសញ្ញា​ស្ដី​ពី​សេរីភាវូបនីយកម្ម​ឧស្សាហកម្ម​អាកាសចរណ៍​អន្តរជាតិ Open Skies និង​សន្ធិសញ្ញា NEW START ដែល​អាមេរិក និង​រុស្ស៊ី​បាន​ចុះ​ហត្ថលេខា។

ប៉ុន្ដែ​ក្រុម​អ្នក​ច្បាប់​មួយ​ចំនួន​របស់​អាមេរិក មិន​ត្រឹមតែ​ចង់​កម្រិត​ការ​ចូលរួម​អនុវត្ត​សន្ធិសញ្ញា​ជាមួយ​រុស្ស៊ី​ប៉ុណ្ណោះទេ ពួកគេ​ចង់​ឲ្យ​រដ្ឋាភិបាល​ក្រុង​វ៉ាស៊ីនតោន​ដក​ខ្លួន​ចេញ​ពី​កិច្ចព្រមព្រៀង​នុយក្លេអ៊ែរ​ជាមួយ​រដ្ឋាភិបាល​ក្រុង​មូស្គូ​ផង​ដែរ។

ជាមួយ​គ្នា​នេះ ច្បាប់​ស្ដី​ពី​កញ្ចប់​ថវិកា​ការពារ​ជាតិ​ឆ្នាំ​២០១៩ របស់​អាមេរិក​បាន​ផ្ដល់​កញ្ចប់​ថវិកា​ដល់​ទីភ្នាក់ងារ​ប្រឆាំង​មីស៊ីល ចំនួន ១០​ពាន់​លាន​ដុល្លារ សម្រាប់​ប្រើប្រាស់​រ៉ាដា និង​មីស៊ីល បាញ់​ទម្លាក់​មីស៊ីល​របស់​ប្រទេស​កូរ៉េខាងជើង និង​អ៊ីរ៉ង់៕

អត្ថបទ៖ វាសនា

អត្ថបទថ្មី
;