ជំនួបបុរសខ្លាំងរុស្ស៊ី និងអធិការបតីអាល្លឺម៉ង់ ទំនងធ្វើឲ្យរដ្ឋបាល ត្រាំ មិនសប្បាយចិត្តនោះទេ

2018-08-19 23:40:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីរុស្ស៊ី វ្ល៉ាឌីមៀ ពូទីន និងអធិការបតីអាល្លឺម៉ង់ Angela Merkel កាលពីថ្ងៃទី១៨ ខែសីហា ២០១៨ បានជួបគ្នានៅវិមាន Meseberg ដែលនៅចម្ងាយ ៦៥គីឡូម៉ែត្រ ភាគខាងជើងក្រុងបែរឡាំង របស់អាល្លឺម៉ង់។ មេដឹកនាំទាំងពីរបានពិភាក្សាជាសំខាន់ដោយផ្ដោតលើគម្រោងសាងសង់បំពង់បញ្ជូនឧស្ម័ន ពីរុស្ស៊ីមកផ្គត់ផ្គង់ឲ្យអាល្លឺម៉ង់ Nord Stream 2 Project ដែលគម្រោងនេះត្រូវបានលោកប្រធានាធិបតីអាមេរិក ដូណាល់ ត្រាំ ថា ជាកំហុសដ៏ធំសំបើមមួយ។

ប្រធានាធិបតីរុស្ស៊ី វ្ល៉ាឌីមៀ ពូទីន និងអធិការបតីអាល្លឺម៉ង់ Angela Merkel អំឡុងសន្និសីទកាសែត នៅវិមាន Meseberg កាលពីថ្ងៃទី១៨ ខែសីហា ២០១៨/ រូបភាព៖ CGTN

ថ្លែងអំឡុងសន្និសីទសារព័ត៌មានរួមគ្នាជាមួយលោកស្រី Merkel លោក ពូទីន បញ្ជាក់ថា គម្រោងនេះគឺក្នុងគោលបំណងសេដ្ឋកិច្ចទាំងស្រុង និងមិនមានន័យថា ការផ្គត់ផ្គង់ឧស្ម័នពីអ៊ុយក្រែន ត្រូវបញ្ចប់នោះទេ។

ទោះយ៉ាងណា ជំនួបនេះទំនងជាធ្វើឲ្យរដ្ឋបាល ដូណាល់ ត្រាំ មិនសប្បាយចិត្តនោះទេ ដោយសារប្រធានាធិបតី ដូណាល់ ត្រាំ ធ្លាប់បាននិយាយថា វាជាសោកនាធកម្មមួយ ដែលអាល្លឺម៉ង់បានឯកភាពទៅនឹងកិច្ចព្រមព្រៀងសាងសង់បំពង់ផ្គត់ផ្គង់ឧស្ម័នជាមួយនឹងរុស្ស៊ី។

ចំណែកមន្រ្តីជាន់ខ្ពស់សហភាពអឺរ៉ុបជាច្រើន រួមទាំងប្រធានក្រុមប្រឹក្សាសហភាពអឺរ៉ុប លោក Donald Tusk បានបង្ហាញការព្រួយបារម្ភថា ក្រោយគម្រោង Nord Stream 2 សាងសង់រួចរាល់ ប្រទេសអ៊ុយក្រែននឹងបាត់បង់ថវិកាប្រមាណជិត ៣ពាន់លានដុល្លារក្នុងមួយឆ្នាំ ខណៈដែលអ៊ុយក្រែន បច្ចុប្បន្ន កំពុងទទួលបានប្រាក់ប្រមាណជាង ១២ពាន់លានដុល្លារក្នុងមួយឆ្នាំ សម្រាប់ការផ្គត់ផ្គង់ឧស្ម័នមកកាន់អាល្លឺម៉ង់។

ពាក់ព័ន្ធនឹងបញ្ហានេះ លោក ត្រាំ កាលពីខែកក្កដា កន្លងទៅ បានចាត់ទុកគម្រោងផ្គត់ផ្គង់ឧស្ម័នពីរុស្ស៊ីមកកាន់អាល្លឺម៉ង់ថា ជាកំហុសដ៏ធំមួយ និងបានព្រលះអាល្លឺម៉ង់ថា ជាឈ្លើយសឹករបស់រុស្ស៊ីទៀតផង។ ជាមួយគ្នានេះ លោក ត្រាំ បានជំរុញឲ្យមានការផ្គត់ផ្គង់ឧស្ម័នធម្មជាតិពីអាមេរិក ជំនួសការផ្គត់ផ្គង់ពីរុស្ស៊ី។

សូមបញ្ជាក់ថា គម្រោង Nord Stream 2 មានទំហំទឹកប្រាក់វិនិយោគសាងសង់ ១១ពាន់លានដុល្លារ គ្រោងនឹងដាក់ដំណើរការនៅចុងឆ្នាំ២០១៩ ខាងមុខ។ គម្រោងនេះ ត្រូវបានទាំងភាគីអាល្លឺម៉ង់ និងរុស្ស៊ី បញ្ជាក់ថា ជាគម្រោងវិនិយោគឯកជន។

ក្រៅពីបញ្ហាការផ្គត់ផ្គង់ឧស្ម័ន លោក ពូទីន និងលោកស្រី Merkel ក៏បានពិភាក្សាពីបញ្ហាមួយចំនួនទៀត រួមមានបញ្ហាស៊ីរី និងអ៊ីរ៉ង់។ ក្នុងនោះ លោក ពូទីន ថា "យើងចាំបាច់ពន្លឿនកិច្ចខិតខំមនុស្សធម៌នានារបស់យើង"។ លោកថា គោលដៅសំខាន់មួយ គឺដើម្បីឲ្យជនភៀសខ្លួនត្រឡប់ទៅលំនៅឋានរបស់ពួកគេវិញ។

ចំណែកលោកស្រី Merkel បានលើកឡើងថា លោកស្រីចង់ឃើញកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវបានរក្សាដដែល។ លោកស្រីថា "យើងក៏ព្រួយបារម្ភផងដែរពីកម្មវិធីនុយក្លេអ៊ែរអ៊ីរ៉ង់"៕