កម្ពុជា-ចិន ដាក់ទុនរួមគ្នាដាំចេកអំបូងលឿង នៅខេត្តកំពត

2018-08-22 09:57:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកវិនិយោគខ្មែរ និងចិន បានបោះទុនរួមគ្នាប្រមាណ ៣២លានដុល្លារ សម្រាប់ការវិនិយោគលើការដាំចេកអំបូងលឿងពិសេស លើផ្ទៃដី ១ពាន់ហិកតា ស្ថិតក្នុងស្រុកឈូក ខេត្តកំពត។ ការដាំដំណាំនេះ គឺសម្រាប់នាំចេញទៅកាន់ទីផ្សារអន្តរជាតិ។

ម្ចាស់ភាគហ៊ុនខ្មែរ ដែលមានឱកញ៉ាជាអ្នកជំនួញល្បីៗចំនួន៥រូប នៅពីក្រោយនៃការវិនិយោគនេះ និងភាគីចិនដែលជាអ្នកជំនួញល្បីៗ និងជាអ្នកជំនាញស្រាវជ្រាវដំណាំចេក បានសម្រេចអនុម័តបង្កើតឈ្មោះក្រុមហ៊ុនថ្មីថា Longmate Agriculture។ ក្នុងនោះលោក ឧកញ៉ា ផែ ហុកឈួន ជាប្រធានក្រុមប្រឹក្សាភិបាលនៃក្រុមហ៊ុននេះ។

ថ្នាក់ដឹកនាំក្រុមហ៊ុន កំពុងដាំចេកអំបូងលឿង នៅកសិដ្ឋានក្នុងស្រុកឈូក ខេត្តកំពត។ រូបថត៖ រស្មីកម្ពុជា

ក្នុងពិធីក្រុងពាលី និងដំណើរការដំណក់ទឹកដំបូងនៅកសិដ្ឋានចំការចេក កាលពីកន្លងថ្មីៗនេះ លោកឧកញ៉ា ផែ ហុកឈួន បានមានប្រសាសន៍ថា ការសម្រេចចិត្តបោះទុនវិនិយោគរួមគ្នានេះ ដោយសារតែលោកបានជឿជាក់យ៉ាងខ្លាំងទៅលើដៃគូដែលមានបទពិសោធន៍ខ្ពស់ទៅលើការស្រាវជ្រាវ និងការដាំចេកនេះ។ ជាងនេះទៅទៀត ដោយសារតែកម្ពុជា មានអាកាសធាតុល្អ គួបផ្សំជាមួយទឹកដីល្អនៅស្រុកឈូក គឺសមស្របទៅនឹងដំណាំចេកនេះណាស់។

លោកអះអាងថា លោកនឹងធ្វើឲ្យកសិដ្ឋានចេកដ៏ធំដំបូងគេនៅកម្ពុជានេះ ក្លាយជាកសិដ្ឋានគំរូមួយនៅក្នុងតំបន់អាស៊ី ដោយផ្អែកទៅលើម្ចាស់ភាគហ៊ុន និងធនធានមនុស្សរបស់ក្រុមហ៊ុនគឺសុទ្ធសឹងជាអ្នកជំនាញបចេ្ចកទេសខ្ពស់ក្នុងការដាំដុះដំណាំចេកច្បាស់លាស់ និងមានគោលនយោបាយផែនការយុទ្ធសាស្ត្រត្រឹមត្រូវយូរអង្វែងប្រកបដោយប្រសិទ្ធិភាពសម្រាប់ក្រុមហ៊ុននិងទីផ្សារ។

ដោយឡែក លោកសាស្ត្រាចារ្យ លី ស៊ាវ ឈាន ដែលជាម្ចាស់ភាគហ៊ុនភាគីចិន និងជានាយកគ្រប់គ្រងកសិដ្ឋានចេករបស់ក្រុមហ៊ុននេះ បាននិយាយថា មូលហេតុដែលលោកសម្រេចចិត្តមកបោះទីតាំងវិនិយោគដាំចេកនៅកម្ពុជានេះ ដោយសារប្រទេសចិនមានការកាត់បន្ថយដាំចេកពីព្រោះតែចេកមានរោគស្លឹកលឿងច្រើន ខណៈដែលចេកមានតម្រូវការកើនឡើងខ្លាំងពីមួយឆ្នាំទៅមួយឆ្នាំ។

លោកបន្តថា ប្រទេសកម្ពុជា មានអាកាសធាតុល្អ ក្តៅហើយសើមមិនត្រជាក់ខ្លាំង ដីល្អ ពោលគឺកម្ពុជា មានទឹកដី និងអាកាសធាតុប្រហាក់ប្រហែលទៅនឹងប្រទេសហ្វីលីពីនផងដែរ ដែលជាប្រទេសដាំចេក និងនាំចេកចេញច្រើនជាងគេបំផុតនៅលើពិភពលោក។

កម្មករ កំពុងដាំចេកអំបូងលឿង នៅកសិដ្ឋានក្នុងស្រុកឈូក ខេត្តកំពត។ រូបថត៖ រស្មីកម្ពុជា

សូមរំលឹកថា កាលពីដើមខែសីហានេះ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញ វិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន Longmate Agriculuture លើគម្រោង "បង្កើតកសិដ្ឋានដាំដំណាំចេក និងវេចខ្ចប់កសិផលនាំចេញ"។ គម្រោងវិនិយោគនេះ មានទីតាំងវិនិយោគស្ថិតនៅភូមិដុំផ្តៅ ឃុំត្រពាំងភ្លាំង ស្រុកឈូក ដែលអាចបង្កើតការងារបាន ៥៧២កន្លែង៕

ប្រភព៖ រស្មីកម្ពុជា ប្រែសម្រួល៖ សំភី