អ្នកជំនាញ បង្ហាញសក្តានុពលនៃវិស័យអចលនវត្ថុកម្ពុជា ក្នុងពិព័រណ៍អាស៊ាន

2018-08-26 03:17:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា បានទទួលធ្វើជាម្ចាស់ផ្ទះរៀបចំនៃកម្មវិធីសនិ្នបាតនិងពិព័រណ៍អចលនវត្ថុសមាគមភ្នាក់ងារអចលនវត្ថុអាស៊ាន (ARENA) ឆ្នាំ២០១៨ ដោយមានបណ្ដាប្រទេសជាច្រើនបានចូលរួម មានរយៈពេល៣ថ្ងៃចាប់ពី២៤ដល់២៦ខែសីហាឆ្នាំ២០១៨។ សនិ្នបាតនិងពិព័រណ៍អចលនវត្ថុនេះ ត្រូវបានអ្នកជំនាញមើលឃើញថា ជាកម្មវិធីដ៏ធំមួយ ក្នុងការបង្ហាញពីសក្តានុពលរបស់កម្ពុជានិងបណ្តាប្រទេសនីមួយៗ លើវិស័យដីធ្លីនិងអចលនវត្ថុ។

លោកឧកញ៉ា លី ហួរ ប្រធានសមាគមអ្នកអភិវឌ្ឍលំនៅឋាន បានថ្លែងក្នុងសនិ្នបាតនិងពិព័រណ៍នេះថា បច្ចុប្បន្ននេះប្រទេសកម្ពុជាជាប្រទេសកំពុងអភិវឌ្ឍន៍ និងមានទីផ្សារសេរី ព្រមទាំងមានការអភិវឌ្ឍឥតឈប់ឈរលើវិស័យអចលនវត្ថុ។

លោកឧកញ៉ា បានបន្ដទៀតថា សំណង់អាគារខ្ពស់ៗព្រោងព្រាតជាមួយនឹងការរីកចម្រើននេះ បានធ្វើឲ្យកម្ពុជាក្លាយជាប្រទេសមួយដែលមានអ្នកវិនិយោគបរទេស មកវិនិយោគជាហូរហែរ។ លោកថា មានប្រទេសចំនួន៥ ដែលបាននឹងកំពុងធ្វើការវិនិយោគ ក្នុងវិស័យអចលនទ្រព្យនៅកម្ពុជាច្រើនជាងគេ រួមមាន ចិន កូរ៉េ ជប៉ុន សិង្ហបុរី និងថៃ។

លោកបញ្ជាក់បន្ថែមថា ការសម្រុកចូលមកវិនិយោគនេះ គឺដោយសារតែកម្ពុជាជាប្រទេស មានចក្ខុវិស័យត្រឹមត្រូវ ជាប្រទេសផ្ដល់ទំនុកចិត្តដ៏កក់ក្ដៅ ក្នុងការដាក់ទុនវិនិយោគ និងម៉ាក្រូសេដ្ឋកិច្ចមានស្ថិរភាព ៧ភាគរយជារៀងរាល់ឆ្នាំ។ ក្រៅពីនេះ គឺការវិនិយោគមានលក្ខណៈប្រកួតប្រជែង,មានភ្នាក់ងារលើកម្ពស់ក្នុងការវិនិយោគដោយផ្ដល់សេវាច្រកចេញចូលតែ១, មានហេដ្ឋារចនាសម្ព័ន្ធគ្រប់គ្រាន់,មានប្រភពធនធានកម្លាំងពលកម្មគ្រប់គ្រាន់និងទីតាំងភូមិសាស្ដ្រអំណោយផលល្អជាដើម។

សំណង់អគារក្នុងរាជធានីភ្នំពេញ

ចំណែក លោក ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ បានថ្លែងឱ្យដឹងថា កម្មវិធីនេះបានជួយជំរុញផ្សព្វផ្សាយ បង្ហាញពីការអភិវឌ្ឍ និងកំណើនសេដ្ឋកិច្ច នៃប្រទេសកម្ពុជាទៅបណ្ដាប្រទេសអាស៊ានទាំង១០ រួមទាំងប្រទេសលើពិភពលោកផងដែរ។ លោកថា កម្មវិធីនេះនឹងទាក់ទាញអ្នកវិនិយោគពីបណ្ដាប្រទេសជាច្រើនបន្ថែមទៀត ឲ្យមកវិនិយោគនៅកម្ពុជា ក្រៅពីប្រទេសទាំង៥ ដែលកំពុងវិនិយោគនាបច្ចុប្បន្ននេះ។

ជាមួយគ្នានោះដែរ លោកបណ្ឌិត គីម ហ៊ាង អគ្គនាយកក្រុមហ៊ុន Khmer Real Estate បានបង្ហាញចំណាប់អារម្មណ៍នៃកម្មវិធីនេះថា កម្មវិធីសនិ្នបាត និងពិព័រណ៍អចលនវត្ថុសមាគមភ្នាក់ងារអចលនវត្ថុអាស៊ាននេះ បានផ្សព្វផ្សាយការពីការអភិវឌ្ឍផ្នែកសេដ្ឋកិច្ចរបស់កម្ពុជាដល់តំបន់អាស៊ាន។ លោកថា កម្មវិធីនេះ បានជួយចែករំលែកបទពិសោធរវាងអ្នកវិនិយោគពីបណ្ដាប្រទេសផ្សេងៗបានស្គាល់គ្នាទៅវិញទៅមកដើម្បីបង្កើតទំនាក់ទំនងនិងផ្ដល់ងាយស្រួលក្នុងការទិញអចលនវត្ថុ នៅតាមបណ្ដាប្រទេសផ្សេងៗទៀត។

លោកបណ្ឌិត គីម ហ៊ាង បានបញ្ជាក់ថា យោងតាមរបាយការណ៍ របស់ក្រសួងដែនដី នគរូបនីយកម្ម និងសំណង់ បានឱ្យដឹងថា ក្នុងខែធ្នូ ឆ្នាំ២០១៧ ការវិនិយោគលើវិស័យអចលនទ្រព្យមាន ៣០៥២គម្រោង នៅលើផ្ទៃដី ១១លានម៉ែត្រការ៉េ ដែលមានតម្លៃប៉ាន់ស្មានការវិនិយោគជាង៦ពាន់លានដុល្លារ។ បើគិតត្រឹមឆមាសទី១ ឆ្នាំ២០១៨ សរុបមាន១ ៦៤៣គម្រោង នៅលើផ្ទៃដីជាង៥លានម៉ែត្រការ៉េ ដែលមានតម្លៃប៉ាន់ស្មាន ២ពាន់លានដុល្លារ នៃការវិយោគអចលនវត្ថុ៕

ប្រភព៖ រស្មីកម្ពុជា ប្រែសម្រួល៖ សំភី