ក្រសួងអប់រំ យុវជន និង​កីឡា បាន​ប្រកាសនៅព្រឹកនេះ​ថា បេក្ខជន​ប្រឡង​សញ្ញាបត្រ​មធ្យម​សិក្សា​ទុតិយភូមិ ឆ្នាំ២០១៨​នេះ មាន​អ្នកជាប់​ចំនួន ៧៥ ០៥៩ នាក់ ត្រូវជា ៦៦,២១%។ ចំនួន​នេះ គឺច្រើន​ជាងឆ្នាំ​២០១៧ ដែលមាន​តែ ៦៣,៨៤%។

• បេក្ខជន និទ្ទេស​ A ចំនួន ២៩០នាក់

• បេក្ខជន និទ្ទេស​ B ចំនួន ១​៥៣២នាក់

• បេក្ខជន និទ្ទេស​ C ចំនួន ៤៦៣១នាក់

• បេក្ខជន និទ្ទេស​ D ចំនួន ១៣ ៩៩៩នាក់

• បេក្ខជន និទ្ទេស​ E ចំនួន ៥៤ ៦០៧នាក់។

ក្នុង​ចំណោម​អ្នកបាន​និទ្ទេសA ចំនួន​ ២៩០នាក់ ក្នុងនោះ​៖ រាជធានី​ភ្នំពេញ ១៣៥នាក់, ខេត្តសៀមរាប ២១នាក់, កណ្តាល ១៦នាក់, បាត់ដំបង ១៥នាក់, តាកែវ ១៥នាក់, កំពង់ចាម ១៣នាក់, កំពត ១១នាក់, ត្បូងឃ្មុំ ៩នាក់, កំពង់ធំ ៩នាក់, កំពង់ឆ្នាំង ៩នាក់, បន្ទាយមានជ័យ ៩នាក់, ព្រៃវែង ៨នាក់, ក្រចេះ ៦នាក់, ពោធិ៍សាត់ ៤នាក់, ស្វាយរៀង ៣នាក់, កំពង់ស្ពឺ ៣នាក់, ព្រះសីហនុ ៣នាក់ និងរតនគិរី ១នាក់។

សូម​រំលឹក​ថា ការ​ប្រឡង​បាក់ឌុប​ឆ្នាំ​២០១៧ មាន​បេក្ខជន​ជាប់​និទ្ទេស​ A ចំនួន ៤២៤​នាក់, និទ្ទេស​ B ចំនួន​ ២៤៦៤​នាក់, និទ្ទេស C ចំនួន​ ៥០០០​នាក់, និទ្ទេស​ D ចំនួន​ ៩១២៣​នាក់ និង​និទ្ទេស​ E ចំនួន ៤៦៦៥៧នាក់។

គួរ​បញ្ជាក់​ថា ការ​ប្រឡង​សញ្ញាបត្រ​មធ្យមសិក្សាទុតិយភូមិ ដែល​បាន​ប្រព្រឹត្ត​ទៅកាលពីថ្ងៃទី២០-២១ សីហា ២០១៨ មាន​មណ្ឌល​ប្រឡង​នៅគ្រប់​រាជធានី-ខេត្ត សរុប ១៩៦​មណ្ឌល បន្ទប់​ប្រឡង ៤៦៥៥បន្ទប់ និង​បេក្ខជន​ចុះឈ្មោះ​ក្នុង​បញ្ជីសរុប ១១៥ ២៦៨នាក់។ បេក្ខជន​អវត្តមាន​ មាន​ចំនួន ១៩០៣នាក់៕

អត្ថបទទាក់ទង៖ បេក្ខជន​បាក់ឌុប ១៧នាក់ ត្រូវបាន​កំណត់​ឱ្យធ្លាក់​ជា​ស្វ័យប្រវត្តិ