សហគមន៍កសិកម្មនៅកំពង់ចាម ទទួលបានជោគជ័យ ក្រោមគម្រោងជំរុញផលិតកម្មស្បៀង

2018-09-10 08:23:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហគមន៍កសិកម្មដាំបន្លែសុវត្ថិភាព ក្នុងឃុំស្វាយទាប ស្រុកចម្ការលើ ខេត្តកំពង់ចាម បានទទួលជោគជ័យក្នុងការដាំបន្លែក្រោមគម្រោងជំរុញផលិតកម្មស្បៀងដែលមានការគាំទ្រដោយថវិការបស់រាជរដ្ឋាភិបាល ក្នុងរយៈពេលជិត ២ឆ្នាំមកនេះ។

លោក ស៊ុន សុខខេង ប្រធានសហគមន៍កសិកម្មបន្លែសុវត្ថិភាពស្វាយទាបចម្ការលើ បានឲ្យដឹងនៅថ្ងៃទី១០ខែកញ្ញានេះថា សហគមន៍មានសមាជិកចំនួន ២៧គ្រួសារក្នុងភូមិចំនួនបី គឺភូមិវារីលិច ភូមិស្រែព្រាល និងភូមិអូរ។ សហគមន៍នេះ បានចាប់ផ្តើមដាំបន្លែដោយអនុវត្តគម្រោងជំរុញផលិតកម្មស្បៀងលើផ្ទៃដីសរុបជាង៦ហិកតា ដែលធានាបាននូវបន្លែច្រើនមុខជូនអតិថិជនប្រហែលជាង១តោន ទៅជាង២តោនក្នុង១ថ្ងៃ តាំងពីដើមឆ្នាំ២០១៧មក។

ប្រធានសហគមន៍វ័យ៤២ឆ្នាំរូបនេះ បានបន្តថា សហគមន៍របស់លោកមានដាំបន្លែសុវត្ថិភាពប្រចាំថ្ងៃដូចជាសាឡាត់ ស្ពៃគ្រប់មុខ សណ្តែកគួរ និងម្រះជាដើម។ បន្លែទាំងអស់នេះ ត្រូវបានដាំជាលក្ខណ:វិលជុំតាមការបង្ហាត់បង្ហាញពីមន្ត្រីកសិកម្មខេត្តកំពង់ចាម។

លោក ស៊ុន សុខខេង កំពុងបេះបន្លែក្នុងចម្ការរបស់សហគមន៍ (រូបថត៖ រស្មីកម្ពុជា)

លោក ស៊ុន សុខខេង បន្ថែមថា សម្រាប់គ្រួសាររបស់លោកដែលបានអនុវត្តគម្រោងនេះលើផ្ទៃដីទំហំ ០,៤០ហិកតា គឺក្នុងមួយឆ្នាំកន្លងទៅ ទទួលបានចំណូលប្រមាណ២០លានរៀល។ ចំណូលនេះគឺខ្ពស់ជាងប្រហែល ៥លានរៀល បើប្រៀបធៀបនឹងកាលពីមិនទាន់អនុវត្តគម្រោងជំរុញផលិតកម្មស្បៀងនេះ។

កត្តាសំខាន់ដែលសហគមន៍ បានទទួលផលប្រយោជន៍ពីគម្រោងនេះ គឺក្រៅពីចំណូលកើន ក្នុងនោះក៏មានការកាត់បន្ថយការប្រើប្រាស់ជី និងថ្នាំគីមីបានប្រហែល ៥០ ភាគរយ ទទួលបានបទពិសោធ បច្ចេកទេសចំណេះដឹងបន្ថែម លើដំណាំបន្លែនេះពី ៥០ ទៅ ៦០ ភាគរយទៀត និងមានអតិថិជនកាន់តែច្រើនជាងមុនមកទិញ និងបញ្ជាទិញផងដែរ។ នេះបើតាមការបញ្ជាក់បន្ថែមរបស់លោក ស៊ុន សុខខេង ដែលមានបទពិសោធន៍ខាងដំណាំបន្លែជាង២០ឆ្នាំ។

ទោះជាយ៉ាងណា លោកថា សហគមន៍ដាំបន្លែសុវត្ថិភាពស្វាយទាបចម្ការលើ បានជួបបញ្ហាប្រឈមនឹងការប្រកួតប្រជែងទីផ្សារផ្នែកសោភ័ណភាពបន្លែចាញ់គេ ពោលគឺបន្លែរបស់សហគមន៍នេះគ្មានប្រភពច្បាស់លាស់ និងមានពណ៌ខៀវស្រអាប់ ព្រមទាំងមានដង្កូវឬសត្វល្អិតស៊ីនៅស្លឹកទៀតផង។ លោកបានស្នើឱ្យអាជ្ញាធរជួយបង្កើតផ្សារបន្លែសម្រាប់ឲ្យសមាជិកសហគមន៍ឈរលក់បន្លែរបស់ខ្លួនផ្ទាល់តែម្តង។

ចំពោះសំណូមពរនេះ ប្រធានការិយាល័យកសិកម្មស្រុកចម្ការលើ លោក ស៊ិន សុខដាវិន បានឱ្យដឹងថា ខាងលោកបានទទួលហើយ។ ប៉ុន្តែខាងលោកនឹងពាំនាំសំណូមពរនេះទៅខាងមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម។ អាជ្ញាធរឃុំស្វាយទាប និងអាជ្ញាធរស្រុកចម្ការលើ ដើម្បីសម្រេចជ្រើសរើសទីតាំងបង្កើតផ្សារ៕

ប្រភព៖ រស្មីកម្ពុជា ប្រែសម្រួល៖ សំភី