អាមេរិក ផ្តល់​ថវិកា ២០ម៉ឺន​ដុល្លារ សម្រាប់​ជួសជុល​ជណ្តើរ​បុរាណ​ខាងជើង​នៃ​ប្រាសាទ​ព្រះ​វិហារ

  • 2018-11-07 03:00:50
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ឯក​អគ្គរដ្ឋទូត​សហរដ្ឋអាមេរិក​ប្រចាំ​កម្ពុជា លោក William A. Heidt បាន​ចុះហត្ថលេខា​លើ​កិច្ច​ព្រមព្រៀង​ជាមួយ​នឹង​អគ្គនាយកនៃ​អាជ្ញាធរ​ជាតិព្រះវិហារ កាលពី​ថ្ងៃទី៦ ខែ​វិច្ឆិកា ឆ្នាំ​២០១៨ ស្តីពី "ការ​អភិរក្ស​ជណ្តើរ​បុរាណ​ខាងជើង​របស់​ប្រាសាទ​ព្រះវិហារ ក្នុង​ថវិកា​ចំនួន ២០ម៉ឺន​ដុល្លារ​"។

លោកស្រី ភឿង សកុណា កិច្ចពិធីចុះកិច្ចព្រមព្រៀងជាមួយឯក​អគ្គរដ្ឋទូត​សហរដ្ឋអាមេរិក​ កាលពីថ្ងៃទី៦វិច្ឆិកា ២០១៨
ក្នុង​សុន្ទរកថា របស់​លោកស្រី ភឿង សកុណា រដ្ឋមន្រ្តី​ក្រសួង​វប្បធម៌ និង​វិចិត្រ​សិល្បៈ បាន​ឱ្យដឹងថា សហរដ្ឋអាមេរិក មាន​ទំនាក់ទំនង​ដ៏យូរលង់ និង​មានការ​សហការ​យ៉ាងជិតស្និទ្ធ ជាមួយនឹង​កម្ពុជា ក្នុងការ​ស្រាវជ្រាវ អភិរក្ស និង​ជួសជុល សម្បត្តិ​បេតិកភណ្ឌ​ខ្មែរ ទាំងនៅក្នុង​តំបន់​អង្គរ និង​ក្រៅ​តំបន់​អង្គរ​អស់រយៈពេល​ជាច្រើនឆ្នាំ។

លោកស្រី​រដ្ឋមន្រ្តី​បន្តថា កិច្ចព្រមព្រៀង​ខាងលើ​នេះ បាន​បង្ហាញពី​ការ​ប្តេជ្ញា និង​ការ​ខិតខំ​ដើម្បី​សហការ ពង្រឹងមិត្តភាព និង​ការ​យោគយល់គ្នា​រវាង​កម្ពុជា-អាមេរិក ដើម្បី​គាំទ្រ​ការថែរក្សា​បេតិកភណ្ឌ​វប្បធម៌ខ្មែរ សម្រាប់​ជាប្រយោជន៍​ដល់​ប្រជាជន​ខ្មែរ សហគមន៍​អន្តរជាតិ និង​សម្រាប់​អ្នក​ជំនាន់​ក្រោយ។

បើតាម​ឯកសារ​គម្រោង​អភិរក្ស​ជណ្តើរ​បុរាណ​ខាងជើង​ប្រាសាទ​ព្រះវិហារ ដែល​បាន​សាងសង់​តាំងពីសតវត្សរ៍​ទី១១ ឱ្យដឹងថា ជណ្តើរ​នេះ គឺជា​ជណ្តើរ​មួយយ៉ាង​សំខាន់​ក្នុងចំណោម​ជណ្តើរ និង​ផ្លូវដើរ ដែល​បាន​តភ្ជាប់​មកខ្លោងទ្វារគោបុរៈទី៥ នៃប្រាសាទ​ព្រះវីហារ។ កាលពី​សម័យអង្គរ ចន្លោះ​សតវត្ស​ទី៩ និងទី១២ ជណ្តើរ​នេះ ប្រហែល​ជាមាន​តួនាទី​សំខាន់​ទាក់ទង​នឹង​ជំនឿ​សាសនា​ហិណ្ឌូ និង​បម្រើ​ដល់​សហគមន៍​ខ្មែរ​បុរាណ ដែល​រស់នៅ​ភាគជើង ក្នុង​ការ​មក​គោរព​ប្រតិបត្តិសាសនា​ខាងលើ។

ប្រាសាទព្រះវិហារ ដែលត្រូវបានជួសជុលនាពេលកន្លងមក

ឯកសារ​ដដែលបន្តថា បន្ទាប់ពី​ត្រូវបាន​បោះបង់ចោល និង​គ្មានការ​ថែរក្សា​ជាច្រើន​សតវត្ស​មក បណ្តាលឱ្យ​ជណ្តើរខាងជើង​នេះ ទទួល​រងនូវការខូចខាត​យ៉ាងធ្ងន់ធ្ងរ ដោយសារ​ធម្មជាតិ និង​មនុស្ស​នាពេល​កន្លងមក។

ក្រៅពីនេះ ឯក​អគ្គរដ្ឋទូត​អាមេរិក ក៏បាន​ចុះហត្ថលេខាលើ​កិច្ចព្រមព្រៀង​ជាមួយភាគីកម្ពុជា ស្តីពី ការ​បន្ត​អនុស្សារណ:​យោគយល់​គ្នា​ទាក់ទង​នឹង "ការ​ដាក់​កម្រិត​ហាមប្រាម​នូវការ​នាំចូល​ប្រភេទ​វត្ថុ​បុរាណ​របស់​ប្រទេស​កម្ពុជា ក្នុងរយៈពេល ៥ឆ្នាំ (២០១៨ ដល់ ២០២៣)" ផងដែរ៕

អត្ថបទ៖ សំភី

;