នគរបាលជាតិបដិសេធថា សិស្សសន្លប់នៅវិទ្យាល័យថ្មគោល មិនមែនដោយសារក្រុមគ្រូពេទ្យចិនទេ

2018-12-09 02:16:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គស្នងការដ្ឋាននគរបាលជាតិ បានច្រានចោលនូវការផ្សាយរបស់គណនីហ្វេសប៊ុកមួយ ឈ្មោះ ណាធីយ៉ា ឯកា (Natiya Aek Ka) ដែលបានបង្ហោះថា សិស្សវិទ្យាល័យថ្មគោល ខេត្តបាត់ដំបង ជិត១០០នាក់ បានដួលសន្លប់ដោយសារជនជាតិចិន បានជួសឈាមសិស្ស និងចាក់ថ្នាំ។ នេះបើយោងតាមវិបសាយរបស់អគ្គស្នងការនគរបាលជាតិ ដែលបានផ្សព្វផ្សាយកាលពីថ្ងៃទី០៨ ខែធ្នូ ឆ្នាំ២០១៨។

វិបសាយនេះ បានដកស្រង់សម្តីលោក ហេង ស៊ុនផារិទ្ធ នាយកវិទ្យាល័យថ្មគោក ឱ្យដឹងថា ហេតុការណ៍ដួលសន្លឹកនេះ បានកើតឡើងចំពោះសិស្ស ៧១នាក់ ក្នុងនោះសិស្សស្រីមាន ៧០នាក់ កាលពីថ្ងៃទី៦ និង ៧ធ្នូ ឆ្នាំ២០១៨។

លោកនាយកសាលាបន្តថា កាលពីថ្ងៃទី២និង៣ធ្នូ មានក្រុមគ្រូពេទ្យខ្មែរសហការជាមួយក្រុមគ្រូពេទ្យចិន ដែលក្នុងនោះ មានគ្រូពេទ្យចិនប្រមាណពី១០ទៅ២០នាក់ជិះឡានទូរីសចំនួន២ បានធ្វើដំណើរទៅស្រាវជ្រាវនូវ ជំងឺបេះដូងដោយគ្រាន់តែប្រើប្រាស់ប្រដាប់ឧបករណ៍ស្ទង់បេះដូងតែប៉ុណ្ណោះ និងមិនបានជួសឈាមនោះទេ។ ការចុះស្រាវជ្រាវជម្ងឺបេះដូងនោះ គឺបានធ្វើតាមសាលាជាច្រើនមិនត្រឹមតែវិទ្យាល័យថ្មគោលប៉ុណ្ណោះទេ ប៉ុន្តែតាមសាលាមួយចំនួនក្នុងស្រុកសង្កែនិងនៅក្នុងក្រុងបាត់ដំបង។

លោកបន្ថែមថា សិស្ស ដែលក្រុមគ្រូពេទ្យបានចុះស្រាវជ្រាវពិនិត្យបេះដូងក្នុងវិទ្យាល័យថ្មគោលនោះ គឺជាសិស្សកម្រិតថ្នាក់ទី៧, ទី៨ និងទី៩។ ចំណែកការដួលសន្លប់របស់សិស្សនៅវិទ្យាល័យថ្មគោលចំនួន៧១នាក់នោះ គឺជាសិស្សថ្នាក់ទី១១និងទី១២ ឯណោះវិញទេ ពោលគឺមិនពាក់ព័ន្ធនឹងសិស្សដែលក្រុមគ្រូពេទ្យខ្មែរនិងចិនបានសហការគ្នាស្រាវជ្រាវជម្ងឺបេះដូងនោះឡើយ។

ជាមួយគ្នានេះ អគ្គស្នងការដ្ឋាននគរបាលជាតិ ក៏បានអំពាវនាវឱ្យអ្នកលេងបណ្តាញសង្គម កុំចែករំលែករឿងមិនពិតនេះ ពីព្រោះនឹងអាចប្រឈមចំពោះមុខច្បាប់នៃការផ្សាយព័ត៌មានមិនពិតក្នុងចេតនាបំពុលបរិយាកាសសង្គម៕