អគ្គនាយកដ្ឋានពន្ធដារ ប្រមូលពន្ធ-អាករគ្រប់ប្រភេទបានជិត ២,២ពាន់លានដុល្លារ ក្នុងឆ្នាំ២០១៨

2019-01-30 02:32:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សរុបរយៈពេល ១២ខែនៃឆ្នាំ២០១៨ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញ) មានចំនួន ៨៧៩១,៤០ប៊ីលានរៀល (ជាង ២,១៩ពាន់លានដុល្លារ) ស្មើនឹង ១១៤,២៧% នៃផែនការប្រចាំឆ្នាំ។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី២៩ ខែមករា ឆ្នាំ២០១៩។

បើប្រៀបធៀបនឹងរយៈពេលដូចគ្នាកាលពីឆ្នាំ២០១៧ ចំណូលពន្ធ-អាករ សម្រាប់រយៈពេល ១២ខែ នៃឆ្នាំ២០១៨ កើនឡើង ១០៣៦,៥៩ប៊ីលានរៀល (ប្រមាណជា ២៥៩,១៥លានដុល្លារ) ស្មើនឹង ១៣,៣៧%។

គិតត្រឹមតែក្នុងខែធ្នូ ឆ្នាំ២០១៨ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបាន មានចំនួន ៥៧០,០៧ប៊ីលានរៀល (ប្រមាណជា ១៤២,៥២លានដុល្លារ) ស្មើនឹង ៧,៤១% នៃផែនការប្រចាំឆ្នាំ។

តាមសេចក្តីប្រកាសព័ត៌មានខាងលើបង្ហាញដែរថា ក្នុងរយៈពេល ៥ឆ្នាំចុងក្រោយនេះ អគ្គនាយកដ្ឋានពន្ធដារ សម្រេចបាននូវកំណើនចំណូលពន្ធ ក្នុងរង្វង់ប្រមាណ ២០% ក្នុងមួយឆ្នាំ៕

អត្ថបទ៖ សំភី