តំបន់ណាខ្លះនៅកម្ពុជា ដែលជាជម្រករបស់សត្វជិតផុតពូជក្នុងពិភពលោក?

2019-04-15 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

[ខ្លីៗ] សូមបង្ហាញពីតំបន់នៅកម្ពុជា ដែលជាជម្រកសត្វជិតផុតពូជក្នុងពិភពលោក ក្នុងបញ្ជីក្រហមរបស់អង្គការ IUCN។ ក្នុងនោះសត្វកម្រ ដែលយកមកបង្ហាញរួមមានដូចជា៖ ត្រដក់ធំ ត្រយ៉ងយក្ស ត្រយ៉ងចង្កំ ក ស ត្មាត ក្ងោកទេព ដំរីអាស៊ី ទោចថ្ពាល់លឿង ស្វាកន្ទុយស កន្ធាយក្បាលកង្កែប និងអណ្តើកហ្លួង។

ត្រដក់ធំ៖ ប្រភេទសត្វត្រដក់មាឌធំជាងគេបង្អស់នេះ រស់នៅក្នុងតំបន់រ៉ាមសារព្រែកទាល់ ដែលជាបន្ទាយពងកូនចុងក្រោយគេបង្អស់ នៅតំបន់អាស៊ីអាគ្នេយ៍។ ក្នុងតំបន់នេះ មានសត្វត្រដក់ធំចំនួន ១៥០-២០០គូ។

ត្រយ៉ងយក្ស៖ គិតត្រឹមខែសីហា ឆ្នាំ២០១៧ ក្រុមស្រាវជ្រាវបានរកឃើញសំបុកត្រយ៉ងយក្សចំនួន ១៩ ក្នុងនោះ ១៤សំបុក ស្ថិតក្នុងដែនជម្រកសត្វព្រៃឆែប និង៥សំបុកផ្សេងទៀត ស្ថិតក្នុងដែនជម្រកសត្វព្រៃគូលែន ព្រហ្មទេព ខេត្តព្រះវិហារ។

ត្រយ៉ងចង្កំ ក ស៖ សត្វស្លាបកម្រនេះ រស់នៅក្នុងដែនជម្រកសត្វព្រៃគូលែន ព្រហ្មទេព ខេត្តព្រះវិហារ។

សត្វខ្សឹប ឬក្ងោកទេព៖ កម្ពុជា គឺជាប្រទេសដ៏សំខាន់បំផុត ក្នុងការអភិរក្សសត្វខ្សឹបនេះកុំឲ្យបាត់បង់ ដោយចំនួនសត្វខ្សឹប នៅក្នុងប្រទេសនេះមានប្រមាណ ៤៣២ក្បាល ក្នុងនោះទីជម្រកវាលស្មៅ នៃតំបន់ការពារទេសភាពទំនាបខាងជើងទន្លេសាប ក្នុងខេត្តកំពង់ធំ និងសៀមរាប គឺជាតំបន់គាំទ្រដល់ការរស់នៅរបស់សត្វនេះច្រើនជាងគេបង្អស់ក្នុងពិភពលោក។

សត្វត្មាតភ្លើង៖ សត្វនេះរស់នៅក្នុងដែនជម្រកសត្វព្រៃឆែប ខេត្តព្រះវិហារ។ ត្មាតភ្លើងគឺជាប្រភេទដ៏កម្របំផុតនៅកម្ពុជា ហើយចំនួនរបស់ពួកវាមានតិចតួចណាស់នាពេលបច្ចុប្បន្ននេះ។ សត្វត្មាតនៅកម្ពុជាមានចំនួន ៣ប្រភេទ គឺត្មាតភ្លើង ត្មាតត្នោត និងត្មាតផេះ។

ដំរីអាស៊ី៖ តំបន់ដែលសត្វនេះរស់នៅច្រើនជាងគេនៅកម្ពុជា គឺតំបន់ខ្ពង់រាបភាគខាងកើត ដែលគ្របដណ្ដប់លើតំបន់ការពារចំនួន ៥ ព្រមទាំងដែនជម្រកសត្វព្រៃភ្នំព្រេច និងតំបន់ជួរភ្នំក្រវ៉ាញ។ កម្ពុជាតែឯង បានផ្តល់ជម្រកដល់សត្វនិមិត្តរូបអាស៊ីមួយនេះ ចន្លោះពី ៤០០ ទៅ ៦០០ក្បាល អំឡុងពេលដែលប្រទេសជិតខាងមានចំនួនតិចតួចប៉ុណ្ណោះ។ មូលហេតុដែលនាំឲ្យមានដំរីអាស៊ីរស់នៅច្រើននៅកម្ពុជា ក៏ព្រោះតែលក្ខខណ្ឌអំណោយផលនៃព្រៃដ៏ធំទូលាយ ដែលអាចឲ្យពួកវាជ្រក លាក់ពួន និងរកចំណីអាហារ។

ទោចថ្ពាល់លឿង៖ កម្ពុជា មានចំនួនសត្វទោចថ្ពាល់លឿងច្រើនជាងគេបង្អស់ នៅលើពិភពលោក។ ទោចថ្ពាល់លឿងនេះ កំពុងមានវត្តមាននៅក្នុងដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីមា ក្នុងខេត្តមណ្ឌលគីរី ព្រមទាំងនៅសៀមប៉ាង ខេត្តស្ទឹងត្រែង។

ស្វាកន្ទុយ ស៖ ស្វាប្រភេទនេះ មានរស់នៅតែក្នុងប្រទេសកម្ពុជា និងវៀតណាមប៉ុណ្ណោះ ក្នុងនោះ ដែនជម្រកសត្វព្រៃកែវសីមា ជាទីតាំងដែលមានសត្វស្វាប្រភេទនេះច្រើនជាងគេបង្អស់នៅលើពិភពលោក។