លោក ស៊ុន ចាន់ថុល៖ ប្រទេសចិន មិននិយាយសម្តីឥតប្រយោជន៍ឡើយ តែមានកិច្ចសហការល្អ

2019-04-27 02:06:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងការកោតសរសើរដល់ប្រជាជនថា៖ ប្រទេសចិនមិននិយាយសម្តីឥតប្រយោជន៍ ប៉ុន្តែមានស្មារតីសហការល្អជាមួយបណ្តាប្រទេសនានា ដើម្បីគាំទ្រការអភិវឌ្ឍហេដ្ឋារចនាសម្ព័ន្ធជាក់ស្តែង ដែលនាំមកនូវភាពរុងរឿងដោយផ្អែកលើគោលការណ៍សកល។

ការថ្លែងខាងលើរបស់់លោក ស៊ុន ចាន់ថុល ធ្វើឡើងក្នុងអនុវេទិកាស្តីពីការតភ្ជាប់ហេដ្ឋារចនាសម្ព័ន្ធ ដែលបានប្រព្រឹត្តទៅនៅក្រុងប៉េកាំង ប្រទេសចិន កាលពីថ្ងៃទី២៦ ខែមេសា ឆ្នាំ២០១៩។

រូបថត៖ ក្រសួងសាធារណការ និងដឹកជញ្ជូន

លោក ស៊ុន ចាន់ថុល បានថ្លែងកត់សម្គាល់សុភាសិតចិន និងសុភាសិតខ្មែរ ដោយដកស្រង់សុភាសិតចិនថា៖ "ប្រសិនបើអ្នកចង់ក្លាយជាអ្នកមាន ចូរកសាងផ្លូវជាមុនសិន" និងសុភាសិតខ្មែរថា៖ "ទីណាមានផ្លូវ ទីនោះមានក្តីសង្ឃឹម"។

លោកទេសរដ្ឋមន្រ្តីបានសង្កត់ធ្ងន់ថា៖ ការអភិវឌ្ឍហេដ្ឋារចនាសម្ព័ន្ធកម្ពុជា ដែលគាំទ្រដោយប្រទេសចិន គឺជាការលើកកម្ពស់ទាំងការតភ្ជាប់រូបវន្ត និងការតភ្ជាប់រវាងប្រជាជន និងប្រជាជន។ ការអភិវឌ្ឍនេះធ្វើឱ្យប្រសើរឡើងគួរឱ្យកត់សម្គាល់ដល់កម្ពុជា និងបណ្តាប្រទេសដែលចូលរួមផ្សេងទៀត។ «កម្ពុជាមានមោទនភាពដែលបានក្លាយជាសមាជិកស្ថាបនិកធនាគារ AIIB ជាអ្នកគាំទ្រ និងជាអ្នកទទួលផលពីគំនិតផ្តួចផ្តើមនេះ»។

លោកបានកត់សម្គាល់បន្ថែមទៀតថា គំនិតផ្តួចផ្តើមខ្សែក្រវាត់ និងផ្លូវ គឺជាដំណើរវិជ្ជមានថ្មីមួយនៃទំនាក់ទំនងរវាងប្រទេស និងប្រទេស ដោយផ្អែកលើការសន្ទនាគ្នាជាជាងការប្រឈមមុខដាក់គ្នា។ កម្ពុជាគាំទ្រដល់ប្រព័ន្ធពាណិជ្ជកម្មក្នុងតំបន់ និងពហុភាគី និងទទួលយកសកលភាវូបនីយកម្មសេដ្ឋ កិច្ច ដែលមានតម្លាភាព មិនរើសអើង រួមបញ្ចូលគ្នា និងមានតុល្យភាព។

រូបថត៖ ក្រសួងសាធារណការ និងដឹកជញ្ជូន

កម្ពុជា បានទទួលលទ្ធផលជាក់ស្តែង ពីការវិនិយោគហេដ្ឋារចនាសម្ព័ន្ធនៅក្នុងទម្រង់នៃប្រាក់កម្ចីសម្បទានពីប្រទេសចិន ជប៉ុន កូរ៉េ ធនាគារពិភពលោក ធនាគារអភិវឌ្ឍន៍អាស៊ី វិស័យឯកជន និងដៃគូអភិវឌ្ឍន៍ដទៃទៀត។

ក្រសួងសាធារណការ ឱ្យដឹងថា រហូតមកដល់បច្ចុប្បន្ននេះ ជាមួយនឹងប្រាក់កម្ចីសម្បទាន និងជំនួយឥតសំណងពីប្រទេសចិន កម្ពុជាបានសាងសង់ផ្លូវមានប្រវែងជាង ៣០០០គីឡូម៉ែត្រ ស្ពានធំៗចំនួន៨ និងកំពង់ផែទន្លេមេគង្គមួយ។

កម្ពុជា បានប្រារព្ធពិធីបើកការដ្ឋានសាងសង់ផ្លូវល្បឿនលឿនពីភ្នំពេញ ទៅក្រុងព្រះសីហនុ ក្រោមប្រភេទវិនិយោគBOT (កសាង ប្រតិបត្តិ ផ្ទេរ) ក្នុងរង្វង់ទឹកប្រាក់ប្រមាណពីរពាន់លានដុល្លារសហរដ្ឋអាមេរិក នៅក្នុងការវិនិយោគមួយក្នុងចំណោមការវិនិយោគហេដ្ឋារចនាសម្ព័ន្ធដ៏ធំបំផុតទាំងឡាយនាពេលថ្មីៗនេះ ដែលជាផ្នែកមួយនៃគំនិតផ្តួចផ្តើមខ្សែក្រវាតត់ និងផ្លូវ៕

អត្ថបទ៖ សំភី