លោកស្រី អ៊ុង សានស៊ូជី ចាប់អារម្មណ៍ខ្លាំងលើសិលាចារឹកភូមា ក្នុងតំបន់អង្គរ
- 2019-05-02 01:32:55
- ចំនួនមតិ 0 | ចំនួនចែករំលែក 0
លោកស្រី អ៊ុង សានស៊ូជី ចាប់អារម្មណ៍ខ្លាំងលើសិលាចារឹកភូមា ក្នុងតំបន់អង្គរ
ចន្លោះមិនឃើញ
លោកស្រី អ៊ុ សានស៊ូជី ទីប្រឹក្សារដ្ឋនៃសាធារណរដ្ឋសហភាពមីយ៉ានម៉ា បានធ្វើការសិក្សាឈ្វេងយល់អំពីប្រវត្តិសាស្រ្តខ្មែរយ៉ាងហ្មត់ចត់ ក្នុងអំឡុងទស្សនកិច្ចនៅប្រាសាទអង្គរវត្ត កាលពីថ្ងៃទី១ ខែឧសភា ឆ្នាំ២០១៩ ហើយអ្វីដែលលោកស្រីមានការចាប់អារម្មណ៍ខ្លាំង គឺនៅពេលដែលលោកស្រីបានឃើញ សិលាចារឹកភូមា មាននៅក្នុងតំបន់អង្គរ ដែលសិលាចារឹកនេះ បង្ហាញថា កម្ពុជា និងភូមា មានទំនាក់ទំនងតាំងពីសម័យបុរាណមក។ នេះបើតាមការបញ្ជាក់ឱ្យដឹងពីលោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរនៃអាជ្ញាធរជាតិអប្សរា ដែលជាអ្នកបកស្រាយពន្យល់ផ្ទាល់ដល់លោកស្រី អ៊ុង សានស៊ូជី អំពីប្រវត្តិប្រាសាទបុរាណខ្មែរ។
បើតាមការចុះផ្សាយរបស់ AKP ឱ្យដឹងថា បន្ទាប់ពីបានទស្សនាប្រាសាទដ៏អស្ចារ្យរបស់ខ្មែររួចមក លោកស្រី អ៊ុង សានស៊ូជី មានបំណងធ្វើកិច្ចប្រតិបត្តិការជាមួយកម្ពុជា ក្នុងការតភ្ជាប់ទំនាក់ទំនងវិស័យទេសចរណ៍ គឺការតភ្ជាប់ក្រុងបាហ្គាន់(Bagan) របស់មីយ៉ាន់ម៉ា មកក្រុងសៀមរាប ដើម្បីធ្វើឱ្យទំនាក់ទំនងវិស័យទេសចរណ៍ នៃប្រទេសទាំងពីរកាន់តែល្អប្រសើរ។
លោក អ៊ឹម សុខរិទ្ធី បានបញ្ជាក់ទៀតថា កម្ពុជា និងភូមា មានទំនាក់ទំនងគ្នាតាំងពីសម័យបុរាណមកម្លេះ ព្រោះថាតាមការស្រាវជ្រាវរបស់អាជ្ញាធរជាតិអប្សរា កន្លងមកបានប្រទះឃើញសិលាចារឹកជាភាសាភូមាចំនួន១១កន្លែងផ្សេងគ្នា។ ក្នុងនោះទីតាំងដែលរកឃើញមាន៩កន្លែងនៅប្រាសាទអង្គរវត្ត និង២កន្លែងទៀតក្នុងក្រុងអង្គរធំ ក្បែរប្រាសាទបាយ័ន។
លោកបានអះអាងទៀតថា បើតាមការសិក្សាគេបានរកឃើញថា អក្សរចារឹកដែលចារចាស់ជាងគេ គឺនៅដើមសតវត្សរ៍ទី២០។ ជាមួយគ្នានេះ ចំពោះអ្នកដែលបានមកចារខ្លះមកជាលក្ខណៈគ្រួសារ និងមកតែឯង ហើយអត្ថន័យជាទូទៅ គឺបញ្ជាក់ពីឈ្មោះអ្នកសរសេរ ពេលវេលា និងតំបន់ដែលពួកគេរស់នៅ។ ចំណែកនៅប្រាសាទបាយ័ន អ្នកដែលចារគឺព្រះសង្ឃភូមា ដែលលោកបានមកគោរពព្រះនៅក្នុងប្រាសាទ ជាពិសេសព្រះអង្គងោកតែម្តង៕