ប្រតិភូក្រុមហ៊ុនសំណង់ធំទី២ក្នុងលោក មកសិក្សាធ្វើផ្លូវថភ្លើងលើអាកាស និងក្រោមដី នៅកម្ពុជា
- 2019-05-09 09:29:50
- ចំនួនមតិ 0 | ចំនួនចែករំលែក 0
ប្រតិភូក្រុមហ៊ុនសំណង់ធំទី២ក្នុងលោក មកសិក្សាធ្វើផ្លូវថភ្លើងលើអាកាស និងក្រោមដី នៅកម្ពុជា
ចន្លោះមិនឃើញ
ប្រតិភូក្រុមហ៊ុនសាជីវកម្មសាងសង់ផ្លូវដែកចិន (CRCC) ដែលជាក្រុមហ៊ុនរដ្ឋចិន និងជាក្រុមហ៊ុនសំណង់ និងវិស្វកម្មធំបំផុតទី២ក្នុងពិភពលោក បានមកធ្វើទស្សនកិច្ចនៅកម្ពុជា ដើម្បីសិក្សាគម្រោងធ្វើឱ្យប្រសើរឡើងផ្លូវដែកកម្ពុជា ដែលមានស្រាប់ (ភ្នំពេញ-ក្រុងព្រះសីហនុ និងភ្នំពេញ-ប៉ោយប៉ែត) សិក្សាផ្លូវរថភ្លើងលើអាកាសដឹកអ្នកដំណើរធុនស្រាល (Monorail) និងរថភ្លើងក្រោមដី (Subway) នៅរាជធានីភ្នំពេញ។ នេះបើតាមការចុះផ្សាយរបស់ក្រសួងសាធារណការ និងដឹកជញ្ជូន។
ក្នុងជំនួបពិភាក្សាជាមួយលោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នាព្រឹកថ្ងៃទី៩ ខែឧសភា ឆ្នាំ២០១៩ លោក Wang Wenzhong អនុប្រធានក្រុមហ៊ុន CRCC បានជំរាបជូនអំពីវិសាលភាពនៃប្រតិបត្តិការអាជីវកម្ម របស់ CRCC នៅក្នុងប្រទេសចិន និងការគាំទ្ររបស់ខ្លួនចំពោះប្រទេសកម្ពុជា និងបានសម្តែងនូវសុឆន្ទៈ ក្នុងការបង្កើនកិច្ចសហប្រតិបត្តិការជាមួយក្រសួងសាធារណការ និងដឹកជញ្ជូន ដើម្បីចូលរួមចំណែកដល់ការអភិវឌ្ឍហេដ្ឋារចនាសម្ព័ន្ធកម្ពុជា។
ក្នុងជំនួបនេះ លោក ស៊ុន ចាន់ថុល បានស្នើឱ្យក្រុមហ៊ុន CRCC សិក្សាផ្លូវដែកបន្តពីក្រុងសិរីសោភណ្ឌ មកខេត្តសៀមរាប ដែលមានប្រវែងសរុបប្រមាណ ១០០គីឡូម៉ែត្រ ដោយហេតុថា មានទេសចរយ៉ាងច្រើន ចង់ធ្វើដំណើរតាមរថភ្លើង ពីទីក្រុងបាងកក ពីទីក្រុងកូឡាឡាំពួរ និងពីទីក្រុងសឹង្ហបុរី មកលេងប្រាសាទអង្គរវត្ត។
លោក Wang Wenzhong បានកត់សម្គាល់លើសំណើនេះ និងបានស្នើឱ្យមាន ការពិភាក្សាលម្អិតបន្ថែមទៀតជាមួយក្រុមការងារមន្ត្រីជំនាញពាក់ព័ន្ធរបស់ក្រសួង ក្នុងគោលបំណងឱ្យផ្លូវដែកភាគខាងជើង និងភាគខាងត្បូងរបស់កម្ពុជា អាចដំណើរការបានរលូនឆាប់រហ័ស ប្រកបដោយប្រសិទ្ធភាព កាត់បន្ថយការខូចខាតផ្លូវថ្នល់ និងកាត់បន្ថយតម្លៃដឹកជញ្ជូនទំនិញផងដែរ។
សូមជម្រាបថា រាជរដ្ឋាភិបាលកម្ពុជា កំពុងពិចារណាជ្រើសរើសការសាងសង់ប្រព័ន្ធរថភ្លើង១ក្នុងចំណោម៣ នៅរាជធានីភ្នំពេញ រួមមាន៖ រថភ្លើងលើអាកាស AGT (ជប៉ុន), រថភ្លើងទំនើបប្រភេទ Monorial និងរថភ្លើងក្រោមដី (ចិន) ដើម្បីកាត់បន្ថយការកកស្ទះចរាចរណ៍។ នេះបើតាមការបញ្ជាក់របស់លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ កាលពីថ្ងៃទី៩ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ៕