អង្គការ wcs៖ ចំនួនសត្វខ្សឹបនៅកម្ពុជា ថយចុះយ៉ាងច្រើនចាប់ពីឆ្នាំ២០១២

2019-06-10 07:00:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមការសិក្សាស្រាវជ្រាវនាពេលថ្មីៗនេះ ដែលបានធ្វើឡើងរួមគ្នាដោយអង្គការសមាគមអភិរក្សសត្វព្រៃកម្ពុជា (wcs) និងក្រសួងបរិស្ថាន បានឱ្យដឹងថា ចំនួនសត្វខ្សឹប ឬសត្វទ្រមាក់អណ្តើកនៅកម្ពុជា បានថយចុះយ៉ាងច្រើនចាប់តាំងពីឆ្នាំ២០១២មកម្ល៉េះ។ នេះបើតាមសេចក្តីប្រកាសព័ត៌មានរបស់អង្គការ wcs នៅថ្ងៃទី១០ ខែមិថុនា ឆ្នាំ២០១៩។

រូបថត៖ អង្គការ WCS

សត្វខ្សឹប ត្រូវបានចុះក្នុងបញ្ជីក្រហមរបស់អង្គការ IUCN ជាប្រភេទសត្វស្លាបដែលកំពុងជិតផុតពូជនៅលើពិភពលោក។ ប្រភេទសត្វស្លាបនេះ បច្ចុប្បន្នស្ទើរតែជិតផុតពូជអស់ទៅហើយនៅក្នុងតំបន់ទំនាបលិចទឹកបឹងទន្លេសាបនៃប្រទេសកម្ពុជា។

អង្គការ WCS និងក្រសួងបរិស្ថាន បានពិនិត្យតាមដានរួមគ្នាលើប្រមាណជា ៨០ភាគរយនៃចំនួនប្រជាសាស្រ្តរបស់សត្វខ្សឹបនេះ ជារៀងរាល់ឆ្នាំ។ ក៏ប៉ុន្តែ នេះគឺជាលើកទី៣ហើយ ដែលចំនួនប្រជាសាស្រ្តទាំងស្រុងរបស់បក្សីដ៏កម្រមួយនេះ ត្រូវបានអង្កេតតាមដាន។ ចំនួនសត្វខ្សឹបវ័យបន្តពូជសរុបនៅកម្ពុជាក្នុងឆ្នាំ២០១៨ មានប្រមាណ ១៣៨ក្បាល។ ចំនួនសត្វខ្សឹបឈ្មោល មានបីដងច្រើនជាងខ្សឹបញី។

សេចក្តីប្រកាសព័ត៌មានដដែលក៏បានបញ្ជាក់ដែរថា លទ្ធផលនៃការសិក្សាស្រាវជ្រាវ ដែលបានចុះផ្សាយនៅលើព្រឹត្តិបត្រអភិរក្សសត្វស្លាបនាពេលថ្មីៗនេះ បានបង្ហាញថា ចំនួនសត្វខ្សឹប នៅក្នុងតំបន់អាស៊ីអាគ្នេយ៍ បានថយចុះប្រមាណ ៥៥ភាគរយ ចាប់តាំងពីឆ្នាំ២០១២មក។

ក្រុមអ្នកអភិរក្សបានប៉ាន់ស្មានថា ចំនួនសត្វខ្សឹប ក្នុងឆ្នាំ២០១៨ បានថយចុះមកនៅត្រឹមតែ ១០៤ក្បាលប៉ុណ្ណោះ បើធៀបទៅនឹងឆ្នាំ២០១២ គឺមានរហូតដល់ ២១៦ក្បាល។ ការស្រាវជ្រាវនេះ បានរកឃើញថា តំបន់ដែលសត្វខ្សឹប រស់នៅបានថយចុះមកនៅត្រឹមតែ ៤តំបន់ប៉ុណ្ណោះ បើធៀបទៅនឹងឆ្នាំ២០១២ គឺមានរហូតដល់ចំនួន ១០តំបន់៕

អត្ថបទ៖ សំភី