សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាន​ដាក់​ចេញ​នូវ​វិធានការ​ចំនួន ៨ចំណុច ​ដើម្បីបង្កើនការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាព ក្នុង​ឱកាស​ពិធីខួបអនុស្សាវរីយ៍ លើកទី៦៦ នៃទិវាបុណ្យឯករាជ្យជាតិ ៩ វិច្ឆិកា និង​ព្រះរាជពិធី​បុណ្យ​អុំទូក​បណ្តែតប្រទីប សំពះព្រះខែ និងអកអំបុក ឆ្នាំ២០១៩។

យោង​តាមលិខិតរបស់សម្តេចក្រឡាហោម ស ខេង ជម្រាបជូនទៅអភិបាល នៃ​គណៈ​អភិបាល​រាជ​ធានី ខេត្ត និងជាប្រធានគណៈ​បញ្ជាការឯកភាពរដ្ឋបាលរាជធានី ខេត្ត កាលពីថ្ងៃទី៣០ ខែតុលា បាន​ឲ្យដឹងថា នៅក្នុងអំឡុងសប្តាហ៍ទី២ ខែវិច្ឆិកា ខាងមុខនេះ ប្រជាជាតិ​យើង​នឹង​ប្រារព្ធ​ពិធី​ខួប​អនុស្សាវរីយ៍ លើកទី៦៦ នៃទិវាបុណ្យឯករាជ្យជាតិ ៩ វិច្ឆិកា និងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ។

វិធានការ ៨ចំណុច​រួម​មាន៖

១. អភិបាល​រាជធានី ខេត្ត និងជាប្រធានគណៈបញ្ជាការឯកភាពរដ្ឋបាលរាជធានី ខេត្ត ត្រូវ​មាន​វត្ត​មាន​នៅ​រាជ​ធានី ខេត្តសាមី ជាប់ជាប្រចាំ ចាប់ពីដើមខែវិច្ឆិកា រហូត​ដល់​ពិធីបុណ្យ​ជាតិ​ទាំង​ពីរ​ខាង​លើ​ត្រូវ​បាន​ប្រារព្វចប់សព្វគ្រប់។ ទន្ទឹមនេះ ត្រូវ​រៀប​ចំចាត់​ចែង​មន្ត្រី​ប្រចាំ​ការ​នៅ​តាម​សាលា​រាជ​ធានី ខេត្ត ក្រុង ស្រុក ខណ្ឌ ឃុំ សង្កាត់ ដើម្បីត្រៀមលក្ខណៈដោះស្រាយសភាពការណ៍ចំពោះមុខ នៅក្នុងដែនសមត្ថកិច្ចរបស់ខ្លួន។

២. រាជធានី ខេត្តនីមួយៗ ត្រូវចាត់ចែងរៀបចំពីធីបុណ្យជាតិខាងលើនេះ ស្រប​តាម​គោលការណ៍​ណែនាំរបស់គណៈកម្មាធិការជាតិរៀបចំបុណ្យជាតិ-អន្តរជាតិ។

៣. ត្រូវបញ្ជា ដឹកនាំ និង​សម្របសម្រួលកងកម្លាំងមានសមត្ថកិច្ច ដែល​ស្ថិត​ក្នុង​ដែន​សមត្ថកិច្ច​របស់​ខ្លួន ដើម្បី​បង្ការ ទប់ស្កាត់ និងបង្ក្រាបបទល្មើសនានា ដើរ​ទន្ទឹម​នឹង​ការ​ជំរុញ​ការ​ចូល​រួម​អនុវត្ត​គោល​នយោបាយ​ភូមិ ឃុំមានសុវត្ថិភាព សំដៅថែរក្សាសន្តិសុខ សណ្តាប់​ធ្នាប់​សាធារណៈ​និងសុវត្ថិភាព​សង្គម​ឱ្យបានល្អ នៅគ្រប់មូលដ្ឋានទូទាំងរាជធានី ខេត្ត ។

៤. ត្រូវដឹកនាំ ណែនាំដល់មេបញ្ជាការ កងកម្លាំងមានសមត្ថកិច្ចនានា ដែល​ស្ថិត​ក្នុង​ដែន​សមត្ថកិច្ច​របស់​ខ្លួន ឱ្យ​ត្រួតពិនិត្យវត្តមានកម្លាំងក្រោមឱវាទ និង​គ្រប់គ្រង​ចាត់​ចែង​ប្រើប្រាស់​កម្លាំង​ស្រប​តាម​ផែនការ​ដែល​បានកំណត់ និងត្រួតពិនិត្យជាប្រចាំនូវការអនុវត្តផែនការនេះ ជាពិសេស​ការ​ចាត់​តាំង​អនុវត្ត​តាម​សេចក្តីណែនាំលេខ ០៣៩ សណន ចុះថ្ងៃទី០៩ ខែតុលា ឆ្នាំ២០១៩ ស្តីពី​ការ​រៀប​ចំការ​ការពារ​សុវត្ថិភាព​មន្ត្រីដឹកនាំថ្នាក់ក្រោមជាតិ ។

៥. រដ្ឋបាលថ្នាក់ក្រោមជាតិគ្រប់ថ្នាក់ និងអង្គភាពជំនាញជុំវិញរដ្ឋបាលថ្នាក់ក្រោមជាតិគ្រប់ថ្នាក់ត្រូវ​បង្កើន​ការគ្រប់គ្រង​វត្តមាន និងការបំពេញការងាររបស់មន្ត្រីរាជការ និង​បុគ្គលិក​ក្រោម​ឱវាទ​ឱ្យ​បាន​ហ្មត់​ចត់​ស្របតាមលិខិតបទដ្ឋាន និងគោលការណ៍កំណត់។

៦. ដឹកនាំ ណែនាំដល់កម្លាំងមានសមត្ថកិច្ច និងអាជ្ញាធរគ្រប់លំដាប់ថ្នាក់ក្នុងរាជធានី ខេត្ត​នីមួយៗ​ធ្វើការ​តាម​ដានក្តាប់សភាពការណ៍សកម្មភាពចលនាក្រុមឧទ្ទាមក្រៅច្បាប់ ដែល​ប៉ុនប៉ង​ធ្វើ​រដ្ឋ​ប្រ​ហារ​ផ្តួលរំលំរាជរដ្ឋាភិបាលស្របច្បាប់ ដើម្បីចាត់វិធានការច្បាប់ឱ្យបានម៉ឺងម៉ាត់ និង​ត្រូវ​អប់រំ​ប្រ​ជាជន​ឱ្យចៀសវៀងការចូលរួមក្នុងសកម្មភាពណាមួយ នៃ​គម្រោង​ផែន​ការ​ផ្តួល​រំលំ​រាជ​រដ្ឋា​ភិបាល​ស្រប​ច្បាប់។

៧. ដឹកនាំ ណែនាំដល់គណៈបញ្ជាការក្រុង ស្រុក ខណ្ឌ ដើម្បីដឹកនាំប៉ុស្តិ៍នគរបាលរដ្ឋបាលឃុំ សង្កាត់ និងអាជ្ញាធរ ឃុំ សង្កាត់ ភូមិ ឱ្យពង្រឹងកិច្ចសហការបង្កើនការគ្រប់គ្រងការចេញ-ចូល របស់​ប្រជាជន​ស្របតាមលិខិតបទដ្ឋានកំណត់ និងគ្រប់គ្រងមុខសញ្ញានានាតាមគោលការណ៍ជំនាញ ។ ទន្ទឹម​នេះ ត្រូវដឹកនាំ និងបង្កលក្ខណៈសម្បត្តិដល់ប្រជាពលរដ្ឋគ្រប់មជ្ឈដ្ឋាន ចូល​រួម​ពិសារ​អំបុក​សាមគ្គី​ជាតិ ដើម្បីការពារជាតិ សាសនា ព្រះមហាក្សត្រ ។

៨. រាជធានី ខេត្ត ដែលមានទូកមកចូលរួមក្នុងព្រះរាជពិធីបុណ្យអុំទូក បណ្តែតប្រទីប សំពះ​ព្រះ​ខែ​និងអកអំបុក នៅរាជធានីភ្នំពេញ ត្រូវចាត់តាំងអភិបាលរងរាជធានី ខេត្ត ០១រូប ដើម្បី​ដឹក​នាំ​ចំណុះ​ទូក និង​អ្នក​រួមដំណើរ ដើម្បីធ្វើការសម្របសម្រួលជាមួយរដ្ឋបាលរាជធានីភ្នំពេញ ក្នុង​ការចាត់​ចែង​ទី​កន្លែង​ស្នាក់នៅ ការថែរក្សាសុខភាព អនាម័យ និងកិច្ចសហការចូលរួមក្នុងការរក្សាសន្តិសុខ សណ្ដាប់​ធ្នាប់​សាធារណៈ និងសុវត្ថិភាព ក្នុងពិធីបុណ្យនេះ៕