បាត់អុកស៊ីហ្សែន៥វិនាទី តើនឹងមានអ្វីកើតឡើង?

2019-11-15 06:22:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សព្វថ្ងៃមនុស្សដកដង្ហើមបានដោយសារអុកស៊ីហ្សែន ដែលជាឧស្ម័នគ្របដណ្ដប់ចំនួន ២១% នៃទ្រនាប់បរិយាកាសផែនដី ខណៈដែល ៧៨% ផ្សេងទៀត គឺជាអាសូត។ ដ្បិតតែមិនមែនជាឧស្ម័នដែលមានច្រើននៅក្នុងបរិយាកាស តែអុកស៊ីហ្សែនពិតជាមានសារសំខាន់ណាស់ខ្វះមិនបានឡើយ។ អវត្តមានរបស់វានឹងបង្កផលប៉ះពាល់មិនស្ទើរនោះឡើយដល់រុក្ខជាតិ មនុស្ស សត្វ និងទឹក។

ឧបមាថា អុកស៊ីហ្សែននៅលើពិភពលោកបានបាត់បង់មិនមែនជារៀងរហូតនោះទេគឺត្រឹមតែ៥វិនាទីប៉ុណ្ណោះ តើនឹងមានអ្វីប្រែប្រួល? តើយើងគ្រប់គ្នាគ្រាន់តែប្រឹងទប់ដង្ហើមឲ្យបាន ៥វិនាទីគឺរួចខ្លួនហើយ? ចុះបរិយាកាសនៅជុំវិញខ្លួនយើងវិញនឹងទៅជាយ៉ាងណាដែរ? ខាងក្រោមនេះជារឿងរ៉ាវមួយចំនួនដែលនឹងកើតឡើង នៅពេលអវត្តមានអុកស៊ីហ្សែនរយៈពេល៥វិនាទី។

៥វិនាទីស្ដាប់ទៅដូចជាមិនច្រើនទេសម្រាប់មនុស្សយើង នៅពេលបាត់បង់អុកស៊ីហ្សែន ព្រោះថាអ្នកខ្លះអាចអត់ដង្ហើមដល់ទៅ៣០វិនាទី ឬច្រើនជាងនេះក៏មាន។ យ៉ាងណាមិញ បើសុខៗស្រាប់តែបាត់អុកស៊ីហ្សែនភ្លាមៗ នោះរាងកាយមនុស្សប្រាកដជាមិនអាចសម្របខ្លួនទៅតាមភ្លាមបានទាន់នោះទេ។ ក្នុងរយៈពេល៥វិនាទីដែលគ្មានអុកស៊ីហ្សែន ពិភពលោកនឹងផ្លាស់ប្ដូរយ៉ាងសម្បើមជាក់ជាមិនខាន។ សំណង់អគារ ទំនប់ទឹក និងរបស់របរអ្វីក៏ដោយឲ្យតែធ្វើពីស៊ីម៉ង់ ឬលោហធាតុ នឹងស្រុតរលំបាត់រូបបាត់រាង។ ព្រោះអ្វី? មូលហេតុគឺអុកស៊ីហ្សែនបានដើរតួនាទីជាភ្នាក់ងារពិសេសក្នុងការតភ្ជាប់សមាសធាតុស៊ីម៉ង់ឲ្យស្អិតជាប់គ្នាបាន។ បើអត់អុកស៊ីហ្សែន ស៊ីម៉ង់ប្រៀបបាននឹងលំអងធូលីប៉ុណ្ណោះ។ ចំណែកឯលោហធាតុវិញគឺត្រូវការអុកស៊ីហ្សែនធ្វើអុកស៊ីតកម្ម ដើម្បីជៀសវាងការរមួលចូលគ្នា។

មួយវិញទៀត ឧទាហរណ៍ថា ចំពេលដែលរឿងរ៉ាវអាក្រក់នេះកើតឡើង អ្នកកំពុងស្ថិតនៅលើឆ្នេរសមុទ្រ នោះស្បែករបស់អ្នកនឹងរងការរលាកយ៉ាងធ្ងន់ធ្ងរ។ ស្រទាប់អូហ្សូន ដែលជាប្រព័ន្ធការពារមនុស្សពីកាំរស្មី UV គឺត្រូវបានបង្កើតឡើងដោយអាតូមអុកស៊ីហ្សែន។ បើគ្មានវា ពិភពលោកនឹងកើនកម្ដៅខ្លាំងមិនខាន ព្រោះគ្មានអ្វីទប់ស្កាត់កាំរស្មី UV បាននោះទេ។

បញ្ហាមួយទៀតពេលបាត់បង់អុកស៊ីហ្សែនគឺថាប្រព័ន្ធស្ដាប់សំឡេងរបស់មនុស្សនឹងរងការខូចខាត។ អវត្តមានអុកស៊ីហ្សែនបានន័យថា ការបាត់បង់សម្ពាធខ្យល់អាកាសចំនួន ២១%។

បន្ថែមពីនេះ ពេលគ្មានអុកស៊ីហ្សែន នោះក៏នឹងមិនមានចំហេះភ្លើងនោះដែរ។ ប្រការនេះនឹងធ្វើឲ្យឥន្ទនកម្មនៅក្នុងយានយន្តមិនអាចប្រព្រឹត្តទៅមុខរួចនោះឡើយ។ នេះបានន័យថា គ្រប់មធ្យោបាយធ្វើដំណើរទាំងអស់ លើកលែងតែយានយន្តអគ្គិសនី នឹងត្រូវរលត់ភ្លាមៗ អំឡុងពេលបាត់បង់អុកស៊ីហ្សែន។ យន្តហោះនឹងធ្លាក់ពីលើមេឃចុះមកក្រោម ហើយឡានរាប់សិបលានគ្រឿងនឹងត្រូវឈប់នៅនឹងមួយកន្លែងភ្លាមៗ។

ផលអវិជ្ជមានមួយទៀតគឺថាផ្ទៃមេឃនឹងប្រែទៅជាងងឹតឈ្លប់។ ពន្លឺដែលជះពីព្រះអាទិត្យមកកាន់ផែនដីត្រូវការធ្វើប្រតិកម្មជាមួយភាគល្អិតជាច្រើននៅក្នុងស្រទាប់ខ្យល់អាកាសរបស់ផែនដី។ ហេតុដូច្នេះហើយពេលគ្មានអុកស៊ីហ្សែន នោះវានឹងគ្មានអ្វីធ្វើប្រតិកម្ម ដែលបានន័យថាពន្លឺមិនអាចឆ្លងកាត់មកដល់ផែនដីនោះទេ។

អាក្រក់ជាងនេះទៅទៀត ស្រទាប់ផែនដីនឹងខ្ទេចទៅជាបំបែកតូចៗ ដោយសារអុកស៊ីហ្សែនជាសមាសធាតុចំនួន៤៥% របស់ផែនដី។ ស្រទាប់ផែនដីនឹងចែកជាបំបែកតូចៗបន្តិចម្ដងៗរហូតទាល់តែគ្មានអ្វីសេសសល់នៅលើពិភពលោក៕