ទម្លាយមូលហេតុដែលកប៉ាល់ "ទីតានិច" មិនត្រូវគេស្រង់ឡើងលើគោកវិញ
- 2019-12-02 08:52:53
- ចំនួនមតិ 0 | ចំនួនចែករំលែក 0
ទម្លាយមូលហេតុដែលកប៉ាល់ "ទីតានិច" មិនត្រូវគេស្រង់ឡើងលើគោកវិញ
ចន្លោះមិនឃើញ
សោកនាដកម្មរបស់កប៉ាល់យក្សទីតានិច (Titanic) បានកើតឡើងនៅក្នុងឆ្នាំ១៩១២ ក្រោយពេលវាត្រូវបានបើកបុកជាមួយនឹងផ្ទាំងទឹកកកនៅលើមហាសមុទ្រអាត្លង់ទិកខាងជើង។ ព្រោះតែលិចចូលជ្រៅពេកទៅក្នុងបាតសមុទ្រ ទើបការរុករកកប៉ាល់នេះមានផលលំបាកជាច្រើន។ យ៉ាងណាមិញ នៅក្នុងឆ្នាំ១៩៨៥ កប៉ាល់ទីតានិច ត្រូវបានគេប្រទះឃើញ តែវាមិនត្រូវបានគេលើកចេញពីបាតសមុទ្រនោះឡើយ។
បើយោងតាមការចុះផ្សាយរបស់សារព័ត៌មាន The Sun កប៉ាល់ទីតានិចកំពុងស្ថិតនៅជម្រៅ ៣៨០០ម៉ែត្រពីផ្ទៃសមុទ្រ ហើយកំពុងត្រូវបានគេអភិរក្សទុកយ៉ាងល្អនៅទីនោះ។ ក្រុមអ្នកវិទ្យាសាស្ត្របានអះអាងថា អាយុកាលរបស់កប៉ាល់យក្សមួយនេះនឹងមានពេលមិនយូរទៀតឡើយ ហើយវានឹងអាចបាត់រូបរាងសូន្យឆឹងនៅត្រឹមឆ្នាំ២០៣០ខាងមុខ។
តាមការសិក្សាមួយនៅអំឡុងឆ្នាំ២០១០ បានបង្ហាញថា មានបាក់តេរីមួយប្រភេទឈ្មោះ Halomonas titanicae ត្រូវបានរកឃើញនៅក្នុងច្រែះលើកប៉ាល់ទីតានិច។ មួយវិញទៀត ទីតាំងដែលកប៉ាល់ទីតានិចបានលិច មានកម្រិតជាតិអំបិល ៣,៥% ដែលបានន័យថា វាងាយស្រួលសម្រាប់ពពួកបាក់តេរី Halomonas titanicae អាចរស់នៅបាន។ កត្តានេះសបញ្ជាក់យ៉ាងច្បាស់អំពីថ្ងៃបញ្ចប់របស់កម្ទេចកប៉ាល់ទីតានិចថានឹងកៀកជិតមកដល់។
គួរបញ្ជាក់ថា បើទោះជាកប៉ាល់ទីតានិចនឹងបាត់បង់រូបរាងប្រាកដមែន ក៏រឿងរ៉ាវរបស់វានៅតែដក់ជាប់ចិត្តមនុស្សគ្រប់រូប ហើយមិនងាយនឹងត្រូវគេបំភ្លេចនោះឡើយ។ របស់របរមួយចំនួនដែលរកឃើញនៅលើកប៉ាល់ត្រូវបានគេស្រង់ចេញមកលើគោក ហើយក៏មានការដាក់លក់ដេញថ្លៃនៅតាមបណ្ដាប្រទេសមួយចំនួនផងដែរ៕