ស្នងការរាជធានីភ្នំពេញ បញ្ជាឱ្យកម្លាំងនគរបាលត្រូវទប់ស្កាត់បញ្ហាក្មេងទំនើង

2020-01-21 01:53:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាឱ្យកម្លាំងនគរបាលក្រោមឱវាទត្រូវទប់ស្កាត់បញ្ហាក្មេងទំនើងឱ្យមានប្រសិទ្ធភាព និងអំពាវឱ្យអាណាព្យាបាល លោកគ្រូ អ្នកគ្រូ ត្រូវចូលរួមអប់រំសិស្ស និងកូនចៅឱ្យមានសីលធម៌ល្អ។ ការបញ្ជាឲ្យទប់ស្កាត់ក្មេងទំនើងនេះ ធ្វើឡើងបន្ទាប់ពីក្នុងរយៈពេលចុងក្រោយនេះមានករណីហិង្សាកើតឡើងរវាងសិស្សនិងសិស្សពីរករណីក្នុងខណ្ឌបឹងកេងកង រាជធានីភ្នំពេញ។

ក្នុងនោះមួយករណីកើតឡើងរវាងសិស្សប្រុសនិងសិស្សប្រុសវាយគ្នាស្លាប់ម្នាក់ និងសិស្សស្រីមួយក្រុម ព្រួតគ្នាវ៉ៃសិស្សស្រីម្នាក់នៅក្នុងថ្នាក់រៀន ដែលករណីទាំងពីរនេះ បានបង្កឱ្យមានការភ្ញាក់ផ្អើលនៅក្នុងបណ្តាញព័ត៌មានសង្គម។កាលើកឡើងឱ្យចាត់វិធានការទប់ស្កាត់ក្មេងទំនើងពីសំណាក់លោកឧត្តមសេនីយ៍ឯក ស ថេត បានធ្វើឡើងនៅក្នុងពិធីគោរពទង់ជាតិនៃព្រះរាជាណាចក្រកម្ពុជាកាលពីថ្ងៃទី២០ ខែមករា ឆ្នាំ២០២០ ដែលមានកម្លាំងនៃស្នងការដ្ឋាននគរបាលរាជធានីភ្នំពេញចូលរួមជាង ៧០០នាក់។

ក្នុងឱកាសនោះផងដែរ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក៏បានរំលឹកដល់កម្លាំងនគរបាលរាជធានីភ្នំពេញត្រៀមចេញកម្លាំងពង្រឹងសន្តិសុខ និងរក្សាសណ្តាប់ធ្នាប់ នៅក្នុងឱកាសថ្ងៃបុណ្យចូលឆ្នាំប្រពៃណីជនជាតិចិនដែលនិងឈានមកដល់នៅពេលខាងមុខនេះ។

លោកបានដាក់បទបញ្ជាឱ្យមានការពារសន្តិសុខការពារទ្រព្យសម្បត្តិប្រជាពលរដ្ឋនៅពេលប្រជាពលរដ្ឋធ្វើដំណើរចេញពីផ្ទះទៅកន្លែងកម្សាន្តនានានិងពង្រឹងច្បាប់ចរាចរណ៍ក៏ដូចជាការ សម្រួលចរាចរណ៍កុំឱ្យមានការកកស្ទះដើម្បីឱ្យការធ្វើដំណើររបស់ប្រជាពលរដ្ឋមានសុវត្ថិភាព និងសណ្តាប់ធ្នាប់ល្អ៕

អត្ថបទ៖ កុសល