ក្រសួងបរិស្ថាន បាន​បើក​កិច្ចប្រជុំក្រុមការងារគម្រោងរៀបចំ«ពិព័រណ៍សហគមន៍» ក្រោម​អធិ​បតី​ភាព លោកស្រី ម៉ុម ថានី រដ្ឋលេខាធិការក្រសួងបរិស្ថាន និងមានការចូលរួមពីថ្នាក់ដឹកនាំ និងមន្រ្តីរាជការក្រសួងបរិស្ថានមួយចំនួនទៀត។ កិច្ចប្រជុំនេះ​ធ្វើ​ឡើង​កាលពី​ថ្ងៃទី២២ ខែមេសា ឆ្នាំ២០២០។

លោក សេង សោត អគ្គនាយករង សហគមន៍មូលដ្ឋានបានឱ្យដឹងថា ពិព័រណ៍សហគមន៍នេះចាប់ផ្តើមដោយមានក្រុមការងាររៀបចំ និងប្រតិបត្តិគម្រោង ដោយមានកម្មវិធីការងារមួយចំនួនដូចជា ការចុះអង្កេតប្រមូលព័ត៌មានពីសហគមន៍ ការចងក្រងសក្តានុពលរបស់សហគមន៍ ការបណ្តុះបណ្តាលជំនាញវិជ្ជាជីវៈដល់សហគមន៍ និងលើកទឹកចិត្តឱ្យសហគមន៍បង្កើតស្នាដៃ មុខរបរ និងនាំយកផលិតផលសម្រាប់ព្រឹត្តិការណ៍ពិព័រណ៍ប្រចាំឆ្នាំ និងលក់ទៅកាន់ទីផ្សារ។

លោកស្រី ម៉ុម ថានី បានចាត់ទុកថាគម្រោង«រៀបចំពិព័រណ៍សហគមន៍» ពិតជាមានសារៈសំខាន់ ជួយដល់ជីវភាពរបស់ប្រជាពលរដ្ឋនៅតាមមូលដ្ឋាន ឱ្យកាន់តែប្រសើរថែមទៀត និងពង្រឹងកិច្ចសហប្រតិបត្តិការជាមួយគ្រប់អ្នកពាក់ព័ន្ធ ក្នុងការគ្រប់គ្រងធនធានធម្មជាតិ ការអភិរក្សជីវៈចម្រុះ វប្បធម៌ ប្រពៃណី ទំនៀមទម្លាប់ ជំនឿ សាសនា របស់បងប្អូនជនជាតិដើមភាគតិច ផងដែរ។ លោកស្រី បានលើកទឹកចិត្តដល់ក្រុមការងាររៀបចំគម្រោង ពិនិត្យលើការកសាង និងប្រមូលព័ត៌មាន និងសហការជាមួយដៃគូរ អ្នកពាក់ព័ន្ធ ដើម្បីកសាងគម្រោង ដែលធានានិរន្តរភាពជីវភាពប្រជាពលរដ្ឋនៅតាមតំបន់ការពារធម្មជាតិ និងចូលរួមគ្រប់គ្រងធនធានធម្មជាតិឱ្យមានប្រសិទ្ធភាព។

សូមបញ្ជាក់ថាគម្រោង«ពិព័រណ៍សហគមន៍» អាចចាប់ផ្តើមនៅពាក់កណ្តាលឆ្នាំ២០២០នេះ ដែលសម្របសម្រួលដោយក្រុមការងារ ដែលមានថ្នាក់ដឹកនាំក្រសួងបរិស្ថាន ថ្នាក់ដឹកនាំនិងមន្រ្តីនៃអគ្គអគ្គនាយកដ្ឋានសហគមន៍មូលដ្ឋាន និងមន្រ្តីនៃអគ្គនាយកដ្ឋានពាក់ព័ន្ធ មួយចំនួនទៀត ដោយធ្វើសកម្មភាពសាកល្បងដំបូងជាមួយសហគមន៍មូលដ្ឋាន នៅតាមតំបន់ការពារធម្មជាតិចំនួន១៧ នៅក្នុងខេត្តកំពង់ធំ៕

អត្ថបទ និង​រូប​ភាព៖ ក្រសួងបរិស្ថាន