រដ្ឋមន្រ្តីកសិកម្មក្នុងរដ្ឋាភិបាលនិរទេសខុសច្បាប់ ធ្វើលិខិតសុំការសណ្តោសប្រណីពីសម្តេច ស ខេង
- 2020-05-08 01:12:49
- ចំនួនមតិ 0 | ចំនួនចែករំលែក 0
រដ្ឋមន្រ្តីកសិកម្មក្នុងរដ្ឋាភិបាលនិរទេសខុសច្បាប់ ធ្វើលិខិតសុំការសណ្តោសប្រណីពីសម្តេច ស ខេង
ចន្លោះមិនឃើញ
រដ្ឋមន្ត្រីក្រសួងកសិកម្មក្នុងរដ្ឋាភិបាលនិរទេសខុសច្បាប់ និងជាអតីតអ្នកនាំពាក្យរណសិរ្សរំដោះជាតិខ្មែរ លោកធុយ វី បានធ្វើលិខិតសុំការសណ្តោសដប្រណីពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើកលែងការចោទប្រកាន់។ លោកធុយ វី កំពុងតែជាប់ឃុំនៅក្នុងពន្ធនាគារព្រៃស ពាក់ព័ន្ធករណី រៀបចំផែនការវិលត្រឡប់មកកម្ពុជាវិញរបស់ឧក្រិដ្ឋជន សម រង្ស៊ី និងលោកសម សេរី មេដឹកនាំរណសិរ្សរំដោះជាតិខ្មែរ នៅថ្ងៃទី៩ ខែវិច្ឆិកា ឆ្នាំ២០១៩ ប៉ុន្តែត្រូវបានបរាជ័យ។
លោក ធុយ វី ត្រូវបានកម្លាំងប៉េអឹមចាប់ខ្លួនខណៈពេលដែលធ្វើដំណើរពីថៃចូលមកកម្ពុជា ដើម្បីរៀបចំផែនការវិលត្រឡប់របស់ឧក្រិដ្ឋជន សម រង្ស៊ី និងលោកសម សេរី មេដឹកនាំរណសិរ្សរំដោះជាតិខ្មែរ ។
លិខិតស្នើសុំការលើកលែងចោទប្រកាន់របស់លោកធុយ វី អតីតអ្នកនាំពាក្យរណសិរ្សរំដោះជាតិខ្មែរ បានធ្វើកាលពីថ្ងៃទី៤ ខែឧសភា ឆ្នាំ២០២០ ដាក់ជូនសម្តេចក្រឡាហោម ស ខេង តាមរយៈអគ្គនាយកដ្ឋានពន្ធនាគារ នៃក្រសួងមហាផ្ទៃ និងប្រធានមណ្ឌលអប់រំកែប្រែទី១ ព្រៃស។
នាយករដ្ឋមន្ត្រី នៃរដ្ឋាភិបាលនិរទេសលោកសម សេរី រួមទាំងបក្ខពួកត្រូវបានតុលាការចោទប្រកាន់ពីបទ រួមគំនិតក្បត់ ពោលគឺបានកៀងគរ និងបំផុសឲ្យមហាជនចូលរួមក្នុងផែនការធ្វើរដ្ឋប្រហារផ្តួលរំលំរាជរដ្ឋាភិបាល នៃព្រះរាជាណាចក្រកម្ពុជា ក្រោមឧបាយកល “ផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្សី” ដោយអនុវត្តតាមការអំពាវនាវរបស់ឪក្រិដ្ឋជន សមរង្ស៊ី និងគូកន។ ការសម្រេចចោទប្រកាន់នេះ បានធ្វើឡើងកាលពីថ្ងៃទី៣១ ខែតុលា ឆ្នាំ២០១៩។
ការចោទប្រកាន់នេះ បានធ្វើឡើងបន្ទាប់ពីប៉េអឹមក្រុងភ្នំពេញចាប់ខ្លួនលោកធុយ វី អនុរដ្ឋមន្ត្រីក្រសួងវប្បធម៌ និងសាសនា នៃរដ្ឋាភិបាលនិរទេសរបស់លោកសម សេរី កាលពីថ្ងៃទី២៩ ខែតុលា ឆ្នាំ២០១៩ ។
ជនសង្ស័យដែលចាប់ខ្លួនឈ្មោះ ធុយ វី ហៅ ធុយ ឬទ្ធី ភេទប្រុស អាយុ៣០ឆ្នាំ មានស្រុកកំណើតនៅភូមិព្រៃទទឹង ឃុំភ្នំតូច ស្រុកមង្គលបុរី ខេត្តបន្ទាយមានជ័យ។ ជនសង្ស័យត្រូវបានបញ្ជូនទៅតុលាការកាលពីរសៀលថ្ងៃទី៣០ ខែតុលា ឆ្នាំ២០១៩។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានឲ្យដឹងថា កាលពីថ្ងៃទី៣០ ខែតុលា ឆ្នាំ២០១៩ អយ្យការអមសាលាដំបូងរាជធានីភ្នំពេញបានសម្រេចធ្វើការចោទប្រកាន់លើឈ្មោះ ធុយ វី , ឈ្មោះ សម សេរី និងបក្ខពួក ពីបទ រួមគំនិតក្បត់ តាមមាត្រា ៤៥៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា។ ការចោទប្រកាន់ខាងលើ គឺពាក់ព័ន្ធនឹងសកម្មភាពរបស់ឈ្មោះ ធុយ វី , ឈ្មោះ សម សេរី និងបក្ខពួក ដែលបានកៀងគរ និងបំផុសឲ្យមហាជនចូលរួមក្នុងផែនការផ្តួលរំលំរាជរដ្ឋាភិបាល នៃព្រះរាជាណាចក្រកម្ពុជា ក្រោមឧបាយកលវ“ផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្សី” ដោយអនុវត្តតាមការអំពាវនាវរបស់ឩក្រិដ្ឋជន សមរង្ស៊ី និងគូកន។ ក្នុងឆ្នាំ២០១៩ Page ចំនួនពីររបស់ឈ្មោះ ធុយ វី តែងតែចុះផ្សាយព័ត៌មានដែលមានគោលដៅ កៀងគរប្រមូលផ្ដុំ ញុះញង់ឲ្យប្រព្រឹត្តបទល្មើសជាអាទិ៍ ដើម្បីប្រឆាំងនឹងរាជរដ្ឋាភិបាលស្របច្បាប់បច្ចុប្បន្ន។ យ៉ាងណាម៉ិញ Page ឈ្មោះ បណ្ឌិតសភាចក្រភពខ្មែរអង្គរ បានចេញលិខិតអំពាវនាវមួយ ធ្វើនៅក្រុងបាងកក ប្រទេសថៃ ចុះថ្ងៃទី ២៩ ខែកញ្ញា ឆ្នាំ២០១៥ មានអត្ថន័យ ញុះញង់ប្រមូលផ្ដុំ កៀងគរ និងធ្វើឲ្យមានការរើសអើងពូជសាសន៍ថែមទៀតផង។ ឈ្មោះ ធុយ វី បានបន្ថែមទៀតថា “យើងខ្ញុំទាំងអស់គ្នា នឹងបន្តធ្វើការងារបន្ថែមទៀត ដើម្បីប្រមូលមូលនិធិរួមគ្នាជួយក្នុងការធ្វើដំណើរមាតុភូមិនិវឌ្ឍន៍របស់លោកប្រធាន សម រង្ស៊ី ត្រលប់ចូលមកប្រទេសកម្ពុជាវិញ ដើម្បីផ្តួលរំលំរាជរដ្ឋាភិបាល នៃព្រះរាជាណាចក្រកម្ពុជា នៅថ្ងៃទី ០៩ ខែវិច្ឆិកា ឆ្នាំ២០១៨ ខាងមុខ។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ សូមបញ្ជាក់ថា អ្នកពាក់ព័ន្ធនឹងការគាំទ្រឬចូលរួមអនុវត្តផែនការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាល និងត្រូវប្រឈមនឹងការចោទប្រកាន់បញ្ជូនទៅតុលាការកាត់ទោសតាមច្បាប់ ពីបទ “រួមគំនិតក្បត់” ដែលអាចមានទោសពី ០៥(ប្រាំ)ឆ្នាំ ទៅ២០(ម្ភៃ)ឆ្នាំ តាមមាត្រា ៤៥៣ នៃក្រមព្រហ្មទណ្ឌ លើកលែងតែអ្នកពាក់ព័ន្ធទាំងនោះចូលមកសារភាពទាន់ពេលវេលា ដែលអាចនឹងត្រូវលើកលែងឲ្យរួចពីទោសតាមបញ្ញត្តិ ពិសេស នៃមាត្រា ៤៥៤ នៃក្រមព្រហ្មទណ្ឌ។ គួរបញ្ជាក់ថា ជនសង្ស័យឈ្មោះ ធុយ វី បានចាកចេញទៅប្រទេសថៃ ដោយមានការផ្តូចផ្តើមពីឈ្មោះសម សេរី ជាមេចលនារណសិរ្សរំដោះជាតិខ្មែរ និងជានាយករដ្ឋមន្ត្រីនៃរដ្ឋាភិបាលនិរទេសជាតិខ្មែរខុសច្បាប់។ ហើយឈ្មោះ ធុយ វី ធ្លាប់ត្រូវបានតែងតាំងជាអ្នកនាំពាក្យរបស់រណសិរ្សរំដោះជាតិខ្មែរ និងជារដ្ឋមន្ត្រីក្រសួងកសិកម្មក្នុងរដ្ឋាភិបាលនិរទេសខុសច្បាប់របស់ សម សេរី ផងដែរ ។ នៅក្នុងឆ្នាំ២០១៩ ឈ្មោះ ធុយ វី ត្រូវបាន សម សេរី តែងតាំងទៅជាអនុរដ្ឋមន្ត្រីក្រសួងវប្បធម៌ និងសាសនា វិញ។
ឈ្មោះ ធុយ វី បានបញ្ជាក់ថា រូបគេពិតជាបានចូលរួមក្នុងសកម្មភាពរួមគំនិតក្បត់ជាមួយក្រុមឧទ្ទាម សម សេរី និងក្រុមអតីតគណបក្សសង្គ្រោះជាតិពិតប្រាកដមែន ក្នុងនោះរូបគេបានចូលរួមក្នុងការប្រជុំទទួលផែនការនានា, រៀបចំឯកសារនិងសៀវភៅដែលមានខ្លឹមសារញុះញង់បង្កឲ្យមានចលាចលក្នុងសង្គម និងបានធ្វើការផ្សព្វផ្សាយខ្លឹមសារ នយោបាយ និង ស្ថានភាពនៅក្នុងស្រុកខ្មែរ ដោយផ្តោតលើ ការរិះគន់វាយប្រហារដល់រដ្ឋាភិបាលកម្ពុជាបច្ចុប្បន្ន តាមរយៈប្រព័ន្ធបណ្តាញសង្គមហ្វេសប៊ុក។
នៅប្រទេសថៃ ឈ្មោះ ធុយ វី និងសកម្មជននៃរណសិរ្សរំដោះជាតិខ្មែរចំនួន ៦៦នាក់ រួមនិងសកម្មជនអតីតគណបក្សសង្គ្រោះជាតិ ប្រមាណ៥០០នាក់ មានទាំងមេដឹកនាំអតីតគណបក្សសង្គ្រោះជាតិ ប្រចាំនៅខេត្តសមុទ្រប្រាកានប្រទេសថៃបានជួបជុំគ្នាដើម្បីរៀបចំផែនការ និងចាត់តាំងធ្វើសកមម្មភាព ដោយរួមទាំងការប្រមូលមូលនិធិរួមគ្នាជួយដល់ការធ្វើដំណើរវិលចូលស្រុករបស់ សម រង្ស៊ី នៅថ្ងៃទី៩ ខែវិច្ឆិកា ឆ្នាំ២០១៩ ដើម្បីអនុវត្តផែនការធ្វើរដ្ឋប្រហារ។
ឈ្មោះ ធុយ វី បានឆ្លើយបន្ថែមថា ចំពោះគូកននិងបក្ខពួករបស់ខ្លួន គឺនៅប្រទេសថៃទាំងអស់ មិនមាននៅកម្ពុជានោះទេ ហើយរូបគេតែងលួចចេញចូលមកប្រទេសកម្ពុជា តាមស្ថានភាពជាក់ស្តែងដែលអាចចូលបាន នៅពេលដែលមានកិច្ចការត្រូវធ្វើ ដើម្បីយកទៅរាយការឱ្យ សម សេរី មុនពេលបង្ហោះតាមបណ្តាញសង្គម។
គួរបញ្ជាក់ថា លោក ធុយ វី ជាសមាជិករណសិរ្សរំដោះជាតិខ្មែរ ដែលដឹកនាំដោយលោក សម សេរី ត្រូវបានសមត្ថកិច្ចចាប់ខ្លួនកាលពីថ្ងៃទី១៦ ខែឧសភា ឆ្នាំ២០១៧ ក្នុងពេលខ្លួនកំពុងធ្វើសន្និសីទកាសែត ស្ដីពីជំហររបស់រណសិរ្សរំដោះជាតិខ្មែរ។ ហើយនៅថ្ងៃទី១៧ ខែឧសភា ឆ្នាំ២០១៧ សាលាដំបូងរាជធានីភ្នំពេញ បានបើកសវនាការជំនុំជម្រះកាត់ទោសអោយជាប់ពន្ធនាគារមួយឆ្នាំកន្លះ និងចោទប្រកាន់ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍។ លោក ធុយ វី ត្រូវបានតុលាការដោះលែងចេញពីពន្ធនាគារកាលពីថ្ងៃទី២០ ខែវិច្ឆិកា ឆ្នាំ២០១៨។ ការដោះលែងរូបលោកអោយមានសេរីភាព គឺបន្ទាប់ពីលោកបានអនុវត្តទោស ១ឆ្នាំ ៦ខែ “មួយឆ្នាំកន្លះ”៕