មានដីធ្លី ផ្ទះ និង​អគារបែបនេះ មិនចាំបាច់ទៅបង់ពន្ធទេ!

  • 2020-06-09 07:15:46
  • ចំនួនមតិ 0 | ចំនួនចែករំលែក 0

ចន្លោះមិនឃើញ


អចលនទ្រព្យ​ដែល​ត្រូវបាន​លើកលែង​ពន្ធ មាន​ដូចខាងក្រោម៖

១. អចលនទ្រព្យ​ដែល​ជាដីធ្លី​កសិកម្ម។ ក្នុងករណី​ចំណែក​ណាមួយ​នៃ​ដីធ្លី​កសិកម្ម​ត្រូវបាន​យក​មក​សាងសង់​ផ្ទះ អគារ ឬសំណង់ផ្សេងៗ​ដែលមិន​បម្រើ​ផ្ទាល់​ និង​ជាអចិន្រ្តៃយ៍​ដល់​សកម្មភាព​កសិកម្ម ចំណែក​ដីនោះ​មិនត្រូវបាន​លើកលែង​ពន្ធ​នេះទេ។

២. អចលនទ្រព្យ​ដែល​ជាកម្មសិទ្ធិ​របស់​រាជរដ្ឋាភិបាល ឬស្ថាប័ន​រាជរដ្ឋាភិបាល។ ក្នុង​ករណី​អចលនទ្រព្យ​ដែល​បាន​កត់ត្រា​ជាទ្រព្យ​សកម្ម​របស់​សហគ្រាស​សាធារណៈ ឬក្រុមហ៊ុន​ចម្រុះ​រដ្ឋ​អចលនទ្រព្យ​នោះ មិនត្រូវបាន​លើកលែងពន្ធនេះទេ។

៣. អចលនទ្រព្យ​ដែល​ជាកម្មសិទ្ធិរបស់​សហគមន៍ ឬបុគ្គលណាមួយ​ដែល៖

-ត្រូវបាន​រៀបចំឡើង​ និង​ដំណើរការ​សម្រាប់​គោលដៅសុទ្ធសាធខាងសាសនា និង​សប្បុរសធម៌

-គ្មាន​ចំណែក​ណាមួយ​នៃអចលនទ្រព្យ​ ឬប្រាក់​ចំណូល​ត្រូវបាន​ប្រើប្រាស់​ជាប្រយោជន៍​ឯកជន។

ការ​លើកលែងពន្ធនេះ មិនរាប់​បញ្ចូលទេ ចំពោះ៖

-អចលនទ្រព្យ​ដែលត្រូវបាន​ជួល ឬផ្តល់​ឱ្យ​បណ្តោះអាសន្ន សម្រាប់​គោលដៅ​សុទ្ធសាធខាងសាសនា និង​សប្បុរសធម៌

-អចលនទ្រព្យ​ជាកម្មសិទ្ធិ​របស់​អង្គការ​សាសនា ឬអង្គការ​សប្បុរសធម៌ ដែលបាន​ជួល ឬផ្តល់​ជាបណ្តោះអាសន្ន​ឱ្យ​ទៅ​សហគមន៍ ឬបុគ្គលណាមួយ ដែលប្រើប្រាស់​អចលនទ្រព្យនោះ​ក្រៅពី​គោលដៅ​សាសនា និង​សប្បុរសធម៌។

៤. អចលនទ្រព្យ​ជាកម្មសិទ្ធិរបស់៖

-បេសកកម្មការទូត ឬកុងស៊ុលបរទេស

-អង្គការអន្តរជាតិ និង​ទីភ្នាក់ងារ​សហប្រតិបត្តិការ​បច្ចេកទេស​របស់​រដ្ឋាភិបាល​នានាដែល​ទទួលស្គាល់​ដោយ​រាជរដ្ឋាភិបាល។

៥. អចលនទ្រព្យ​ដែល​ជាហេដ្ឋារចនាសម្ព័ន្ធ រួមមាន​ ផ្លូវ​ ស្ពាន ប្រព័ន្ធ​ផលិតទឹកស្អាត ឬផលិតអគ្គិសនី ព្រលានយន្តហោះ កំពង់ផែ ស្ថានីយអយស្ម័យយាន រួមបញ្ចូល​ទាំងអគារ និង​ការិយាល័យ ដែល​បម្រើ​ផ្ទាល់​ដល់​សកម្មភាព​នៃហេដ្ឋារចនាសម្ព័ន្ធ​ទាំងនេះ។

៦. ផ្ទះ អគារ និង​សំណង់​ផ្សេងៗ​ដែល​សាងសង់​លើ​ដីធ្លី​កសិកម្ម ដែលបម្រើ​ផ្ទាល់ និង​ជាអចិន្រ្តៃយ៍​ដល់​សកម្មភាព​កសិកម្ម។

៧. អចលនទ្រព្យ​ដែល​ទទួល​រងនូវការខូចខាត​ធ្ងន់ធ្ងរ​ដោយ​ករណី​ប្រធានសក្តិ ដែល​ជាបាតុភូត ឬ​ជាព្រឹត្តិការណ៍​កើតឡើង​ដោយមិនដឹងជាមុន មិនអាចប៉ាន់ស្មាន​ជាមុនបាន និងមិនអាចជំនះបាន ដូចជា គ្រោះធម្មជាតិ (ទឹកជំនន់ ខ្យល់ព្យុះ រញ្ជួយដី) សង្គ្រាម កុប្បកម្ម អគ្គិភ័យ ឬគ្រោះ​មហន្តរាយ​ជាយថាហេតុ។

៨. ផ្ទះ អគារ និង​សំណង់​ដែល​កំពុង​ត្រូវបាន​សាងសង់​តិច​ជាង ៨០% និង​មិនទាន់បាន​ប្រើប្រាស់។

៩. អចលនទ្រព្យ​ដែលស្ថិតក្នុងតំបន់​សេដ្ឋកិច្ច​ពិសេស ដែល​បម្រើ​ផ្ទាល់​ដល់​សកម្មភាព​ផលិតកម្ម។

ដកស្រង់ចេញពី៖ ប្រកាស​ស្តីពី ការប្រមូល​ពន្ធលើ​អចលនទ្រព្យ ចុះថ្ងៃទី១៩ ខែកក្កដា ឆ្នាំ​២០២០

;