នេះជាយុទ្ធសាស្រ្តដែល ជូគឺ លៀង ប្រថុយជីវិតបំផុតក្នុងពេលទប់ទល់នឹងទ័ព ស៊ឺម៉ា អ៊ី (មានវីដេអូ)

2020-09-01 03:51:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងអំឡុងពេលធ្វើសង្គ្រាមនឹងគ្នាមួយរវាងទ័ពនគរស៊ូហាន និងនគរអ៊ួយ ក្នុងសម័យសាមកុក នាឆ្នាំ២២៨ ជូគឺ លៀង ដែលជាឧបរាជនគរស៊ូហាន បានប្រើយុទ្ធសាស្រ្តក្រុងទទេ (Empty Fort Strategy) ដែលជាការប្រថុយគ្រោះថ្នាក់ដល់ជីវិតបំផុត ពេលទប់ទល់នឹងទ័ព ស៊ឺម៉ា អ៊ី របស់នគរអ៊ូយ។

ការប្រើយុទ្ធសាស្រ្តនេះ គឺនៅពេលទ័ពនគរស៊ូហាន បានបាត់បង់ច្រកជាធីង (Jieting) ដែលជាច្រកដឹកជញ្ជូនស្បៀងដ៏សំខាន់បំផុតរបស់នគរនេះ។ បន្ទាប់ពីបាត់បង់ច្រកជាធីង ជូគឺ លៀង ក៏បញ្ជាឱ្យប្រញាប់ដឹកស្បៀងចេញពីក្រុង Xicheng ប៉ុន្តែដោយសារដំណើររបស់ទ័ព ស៊ឺម៉ា អ៊ី រាប់ម៉ឺននាក់ មកលឿនពេក ហើយក្នុងក្រុងនេះមានទ័ពមិនដល់ ៥ពាន់នាក់ផងនោះ ជូគឺ លៀង ក៏បង្ខំចិត្តប្រើយុទ្ធសាស្រ្តក្រុងទទេនេះតែម្តង។

ជូគឺ លៀង បានបញ្ជាឱ្យដកទង់ចេញពីកំផែងក្រុងយកទៅលាក់ទាំងអស់ ហើយហាមមិនឱ្យទ័ពធ្វើសកម្មភាពណាមួយឡើយ។ ជាមួយគ្នានេះ កងទ័ពមួយចំនួនត្រូវតែងខ្លួនជាប្រជាជនបោសសម្អាតបរិវេណក្លោងទ្វារក្រុង។ ចំណែកឯ ជូគឺ លៀង ខ្លួនឯងវិញ ឡើងលើកំផែងក្រុង ហើយអង្គុយលេងពិន។

ពេលទ័ពនគរអ៊ួយ មកដល់មុខក្រុង Xicheng ស៊ឺម៉ា អ៊ី បានឃើញស្ថានភាពបែបនេះ ក៏សង្ស័យមិនហ៊ានវាយលុកចូលក្រុង ព្រោះខ្លាចមានទ័ពបង្កប់។ ស៊ីម៉ា អ៊ី ដឹងច្បាស់ថា ជូគឺ លៀង ជាមនុស្សដែលមានល្បិចកលខ្ពស់ និងប្រយ័ត្នប្រយែងបំផុត មិនប្រថុយនឹងជីវិតផ្តេសផ្តាសនោះទេ។ ស៊ឺម៉ា អ៊ី ស្តាប់ភ្លេងលេងពិនរបស់ ជូគឺ លៀង មួយសន្ទុះ ក៏សម្រេចដកទ័ពចេញទៅវិញ។

ត្រង់ចំណុចនេះ ក៏មានពាក្យចចាមអារ៉ាមដែរថា ស៊ឺម៉ា អ៊ី មិនវាយលុកចូលក្រុង គឺដោយសាររូបគេចង់ទុកជីវិតឱ្យ ជូគឺ លៀង ដើម្បីឱ្យស្តេចនគរអ៊ួយ នៅបន្តប្រើប្រាស់ខ្លួន។

ក្រោយ ស៊ឺម៉ា អ៊ី ដកទ័ពចេញទៅវិញ ជូគឺ លៀង បានប្រាប់ទៅមេទ័ពមួយរូបទាំងក្តុកក្តួលថា «គាត់ (ស៊ឺម៉ា អ៊ី) ដឹងថាខ្ញុំជាមនុស្សដែលប្រយ័ត្នប្រយែងបំផុតដែលខ្ញុំនឹងមិនលែងជាមួយគ្រោះថ្នាក់បែបនេះទេ។ មើលទៅពួកគេ សង្ស័យថាមានទ័ពបង្កប់ក្នុងក្រុង ដូច្នេះ ស៊ឺម៉ា អ៊ី ក៏ដកទ័ពទៅវិញ។ ការពិតខ្ញុំមិនប្រថុយនឹងគ្រោះថ្នាក់នេះទេ ប៉ុន្តែពេលនេះយើងគ្មានជំនួយឡើយ»៕

សូមទស្សនាវីដេអូខាងក្រោមនេះដែលបង្ហាញពីយុទ្ធសាស្រ្តក្រុងទទេ របស់ ជូគឺ លៀង ក្នុងខ្សែភាពយន្តរឿង «នគរបី»៖