មេដឹកនាំពិភពលោកណាខ្លះ ដែលបានសម្រក់ទឹកភ្នែក ពេលថ្លែងជាសាធារណៈ?
- 2020-10-13 08:13:33
- ចំនួនមតិ 0 | ចំនួនចែករំលែក 0
មេដឹកនាំពិភពលោកណាខ្លះ ដែលបានសម្រក់ទឹកភ្នែក ពេលថ្លែងជាសាធារណៈ?
ចន្លោះមិនឃើញ
ប៉ុន្មានថ្ងៃចុងក្រោយនេះ បណ្តាញសារព័ត៌មាននានាមានការចាប់អារម្មណ៍យ៉ាងខ្លាំងទៅលើមេដឹកនាំកូរ៉េខាងជើង លោក គីម ជុងអ៊ុន ដែលបានយំខ្សឹបខ្សួល ក្នុងពេលថ្លែងអំឡុងប្រារព្ធខួប៧៥ឆ្នាំនៃការបង្កើតបក្សពលករកូរ៉េ កាលពីថ្ងៃទី១០ តុលា ២០២០កន្លងទៅ។
** ទាញយក App Kley Kley នៅលើ Android និង iOS ដើម្បីទទួលបានព័ត៌មានលឿនរហ័ស **
ការពិតទៅ មិនត្រឹមតែលោក គីម ជុងអ៊ុន នោះទេដែលបានយំក្នុងពេលថ្លែងជាសាធារណៈបែបនេះ ពោលគឺក៏មានមេដឹកនាំពិភពលោកល្បីៗមួយចំនួនទៀតផងដែរ ដែលបញ្ចេញអារម្មណ៍បែបនេះ។ សូមមើលខាងក្រោម៖
-ប្រធានាធិបតីប្រេស៊ីល លោក Jair Bolsonaro៖ ទឹកភ្នែករបស់លោកបានហូរចុះ ក្នុងពេលថ្លែងនៅពិធីមួយកាលពីខែធ្នូ ឆ្នាំ២០១៩ ដោយលោកបានរំលឹកពីការវាយប្រហារដោយកាំបិតមកលើរូបលោក ក្នុងអំឡុងយុទ្ធនាការឃោសនាបោះឆ្នោត ឆ្នាំ២០១៨។
-អតីតប្រធានាធិបតីអាមេរិក លោក បារ៉ាក់ អូបាម៉ា៖ លោកបានយំពេលឡើងថ្លែងនិយាយពីច្បាប់គ្រប់គ្រងកាំភ្លើង កាលពីខែមករា ឆ្នាំ២០១៦ ក្រោយពេលមានការបាញ់រះនៅសាលារៀនមួយកន្លែងដែលបណ្តាលឱ្យសិស្ស ២០នាក់បានស្លាប់។
-នាយករដ្ឋមន្រ្តីកាណាដា លោក Justin Trudeau៖ ចាប់តាំងពីចូលកាន់តំណែងតាំងពីឆ្នាំ២០១៥មក គេសង្កេតឃើញថា លោកបានសម្រក់ទឹកភ្នែកក្នុងពេលថ្លែងជាច្រើនលើកដូចជា នៅឆ្នាំ២០១៦ ពេលលោកអំពាវនាវឱ្យមានការឯកភាពជាតិ ក្រោយការបាញ់ប្រហារនៅក្រុងកេប៊ិច និងឆ្នាំ២០១៧ នៅពេលលោកថ្លែងអំពីការស្លាប់របស់លោក Gord Downieដែលជាសិល្បករតំណាងជាតិកាណាដាជាដើម។
-ប្រធានាធីបតីរុស្ស៊ី លោក វ្លាឌីមៀ ពូទីន៖ លោកមិនអាចទប់ទឹកភ្នែកជាប់ ពេលថ្លែងទៅកាន់អ្នកគាំទ្រកាលពីខែមីនា ឆ្នាំ២០១២ ក្នុងក្រុងមូស្គូ ក្រោយពេលត្រូវបានជាប់ឆ្នោតជាប្រធានាធិបតី។ យ៉ាងណាមិញ ក្រោយមកលោកបានបញ្ជាក់ថា ទឹកភ្នែកដែលស្រក់ចុះនោះ គឺដោយសារត្រូវខ្យល់ខ្លាំងតែប៉ុណ្ណោះ។
-អតីតប្រធានាធិបតីអាហ្វហ្គានីស្ថាន លោក Hamid Karzai៖ កាលពីខែកញ្ញា ឆ្នាំ២០១០ លោកបានសម្រក់ទឹកភ្នែកក្នុងពេលថ្លែងតាមរយៈទូរទស្សន៍ជាតិ ដោយពេលនោះលោកបានអំពាវនាវឱ្យជនរួមជាតិរបស់លោក បញ្ឈប់អំពើហិង្សាក្នុងប្រទេស។
-អតីតប្រធានាធិបតីប្រេស៊ីល លោក Luiz Inacio Lula da Silva៖ លោកបានស្រក់ទឹកភ្នែក ក្នុងសន្និសីទកាសែតមួយកាលពីខែតុលា ឆ្នាំ២០០៩ បន្ទាប់ពីក្រុង Rio De Janeiro នៃប្រទេសប្រេស៊ីល បានឈ្នះក្នុងការទទួលធ្វើជាម្ចាស់ផ្ទះកីឡាអូឡាំពិក ឆ្នាំ២០១៦។
ក្រៅពីនេះ ក៏មានមេដឹកនាំជាច្រើនរូបទៀតផងដែរ ដែលបានយំនៅទីសាធារណៈ ជាពិសេសក្នុងពេលចូលរួមពិធីបុណ្យសពណាមួយជាដើម៕