ចង់ស្គមក៏មិនងាយដែរ បើមិនបោះចោលទម្លាប់ពេលព្រឹកទាំង៦នេះ!
- 2020-11-26 00:16:44
- ចំនួនមតិ 0 | ចំនួនចែករំលែក 0
ចង់ស្គមក៏មិនងាយដែរ បើមិនបោះចោលទម្លាប់ពេលព្រឹកទាំង៦នេះ!
ចន្លោះមិនឃើញ
ពាក់ព័ន្ធនឹងការសម្រកទម្ងន់ អ្នកក៏គួរផ្ដោតសំខាន់ផងដែរទៅលើទម្លាប់ពេលព្រឹកមួយចំនួន ដែលកត្តាទាំងនេះអាចជះឥទ្ធិពលអវិជ្ជមានបានចំពោះការថែរក្សារូបរាងរបស់អ្នក។ មានទម្លាប់អាក្រក់ចំនួន ៦ ដែលគ្រប់គ្នាគួរជៀសវាង ព្រោះវាជាកត្តាបង្អាក់ដំណើរការបញ្ចុះគីឡូរបស់អ្នក៖
១. បដិសេធមិនញ៉ាំអាហារព្រឹកឲ្យបានច្រើន
បើតាមអ្នកវិទ្យាសាស្ត្រនៅសកលវិទ្យាល័យ Tel Aviv បានបង្ហាញថា របបអាហារពេលព្រឹកក្នុងបរិមាណច្រើន ហើយបរិមាណតិចនៅពេលល្ងាច ជាវិធីយ៉ាងមានប្រសិទ្ធភាពបំផុតនៅក្នុងការថែរក្សាទម្ងន់ឲ្យបានល្អ។ ព្រោះអ្វី? នេះក៏ដោយសារតែការរំលាយអាហារនៃរាងកាយមានល្បឿនដំណើរការខុសៗគ្នាទៅតាមពេលវេលា ពោលគឺការរំលាយអាហារមានល្បឿនដំណើរការល្អនាពេលព្រឹក ហើយចុះខ្សោយបន្តិចម្ដងៗនាពេលល្ងាច។
២. មិនហ៊ានដើរក្រោមពន្លឺថ្ងៃនាពេលព្រឹក
អ្នកស្រាវជ្រាវនៃសកលវិទ្យាល័យ Alberta នៃប្រទេសកាណាដា បានរាយការណ៍ថា កម្រិតជាតិខ្លាញ់នៃរាងកាយមនុស្សអាចចុះថយបាននៅពេលប៉ះពាល់ជាមួយពន្លឺព្រះអាទិត្យ។ យ៉ាងណាមិញ ការដើរក្រោមពន្លឺថ្ងៃនាពេលព្រឹកមិនគួរធ្វើនៅក្នុងរយៈពេលយូរពេកនោះទេ។
៣. មិនផឹកទឹកក្រោយភ្ញាក់ពីគេង
ការទទួលទានទឹកមុនអាហារព្រឹកនឹងជួយបង្កើនសមត្ថភាពរំលាយអាហារនៃរាងកាយ ហើយកាត់បន្ថយហានិភ័យនៃការឡើងទម្ងន់។ អត្រានៃការសម្រកទម្ងន់អាចមានប្រសិទ្ធភាពពី១០% ទៅ ១៧%។
៤. មិនធ្វើលំហាត់ប្រាណ
លំហាត់ប្រាណនាពេលព្រឹកជួយដុតបំផ្លាញជាតិខ្លាញ់ និងបន្ថែមថាមពលដល់ប្រព័ន្ធរំលាយអាហារនៃរាងកាយ។ មួយវិញទៀត វាក៏ជួយធ្វើឲ្យអ្នកមិនសូវឃ្លានអាហារច្រើនបានពេញមួយថ្ងៃផងដែរ។ នេះបើតាមការស្រាវជ្រាវរបស់វេជ្ជបណ្ឌិត Emma Stevenson នៃសកលវិទ្យាល័យ Northumbria។
៥. ទុកអាហារឆ្ងាញ់ៗញ៉ាំពេលថ្ងៃត្រង់ ឬពេលល្ងាច
វាជាទម្លាប់អាក្រក់មួយដែលគ្រប់គ្នាគួរជៀសវាង បើចង់បានរាងស្អាតសមសួន។ អ្នកគួរបរិភោគអាហារដែលមានជាតិកាឡូរីខ្ពស់នាពេលព្រឹក ព្រោះពេលព្រឹករាងកាយរំលាយអាហារបានល្អជាងពេលថ្ងៃត្រង់ ឬពេលល្ងាច។
៦. អានព័ត៌មានអាក្រក់ៗនៅពេលព្រឹក
ភាពភ័យខ្លាច ឬអារម្មណ៍ឆេវឆាវដែលបង្កឡើងដោយព័ត៌មានអាក្រក់ៗជារៀងរាល់ព្រឹក នឹងអាចប៉ះពាល់ដល់សុខភាព។ បើតាមអ្នកស្រាវជ្រាវនៃសកលវិទ្យាល័យ Stanford ខាងផ្នែកវេជ្ជសាស្ត្រ បានបង្ហាញថា អារម្មណ៍ស្ត្រេសក្នុងរយៈពេលយូរនឹងធ្វើឲ្យកោសិកាមនុស្សផ្លាស់ប្ដូរទៅជាអ័រម៉ូនកោសិកាខ្លាញ់។ យ៉ាងណាមិញ បើអារម្មណ៍ស្ត្រេសនោះមានរយៈពេលខ្លី វានឹងមិនចោទជាបញ្ហាអ្វីឡើយ៕