មានទីភ្នាក់ងារបរទេសធំ៤ដែលមានបុគ្គលិកនៅជុំវិញពិភពលោកផលិត រូប វីដេអូ ព័ត៌មាន ដែលល្បីនៅលើពិភពលោក មាន​ AP, REUTERS, AFP និង​EPA។ ទីភ្នាក់ងារទាំងនេះផលិតរូប វីដេអូ ព័ត៌មាននៅជុំវិញពិភពលោកសម្រាប់លក់ទៅឲ្យស្ថាប័នព័ត៌មានក្នុងស្រុកប្រចាំប្រទេសនានានៅលើពិភពលោកយកទៅផ្សាយបន្ត។ ទីភ្នាក់ងារធំទាំង៤នេះក៏មានបុគ្គលិកធ្វើការប្រចាំនៅកម្ពុជាផងដែរ។ ខាងក្រោមនេះគឺជាព័ត៌មានបង្ហាញពីសាវតារបស់ទីភ្នាក់ងារធំទាំង៤នេះ៖

១.AP=Associated Press គឺជាទីភ្នាក់ងារព័ត៌មានដែលបង្កើតនៅឆ្នាំ១៨៤៦ នៅទីក្រុងញ៉ូយ៉ក សហរដ្ឋអាមេរិក។ AP មានបុគ្គលិកសរុប ៣៣០០នាក់ ដែលកំពុងធ្វើការនៅ២៦៣ទីតាំងនៅជុំវិញពិភពលោក។ AP អាចផលិតបាន២០០០រឿងក្នុងមួយថ្ងៃ ១លានរូបក្នុងមួយឆ្នាំ ៧ម៉ឺនវិដេអូ ក្នុងមួយឆ្នាំ។ នៅកម្ពុជាមានបុគ្គលិកប្រចាំការ២នាក់ គឺលោក ជាង សុផេង​ ជាអ្នកឆ្លើយឆ្លងព័ត៌មាន និងលោក ហេង ស៊ីនិត្យ ជាអ្នកថតរូប។

២. REUTERS៖ គឺជាទីភ្នាក់ងារព័ត៌មានរបស់ក្រុមហ៊ុនមេ Thomson Reuters ដែលបង្កើតនៅខែតុលា ឆ្នាំ១៨៥១ ដែលទីស្នាក់ការធំនៅប្រទេសអង់គ្លេស។ រ៉យទ័រ មានអ្នកយកព័ត៌មានប្រហែល២៥០០នាក់ និងអ្នកថតរូប៦០០នាក់ដែលធ្វើការ២០០កន្លែងនៅទូទាំងពិភពលោក។ នៅកម្ពុជាមានបុគ្កលិកប្រចាំការគឺលោក ប្រាក់ ចាន់ថុល ជាទីអ្នកឆ្លើយឆ្លងព័ត៌មាន និងលោក ឡាយ ចាន់ថា ជាអ្នកថតវិដេអូ។

៣. AFP=Agence France-Presse៖ គឺជាទីភ្នាក់ងារព័ត៌មានដែលបង្កើតនៅឆ្នាំ១៨៣៥ ដែលទីស្នាក់ការធំនៅទីក្រុងប៉ារីស ប្រទេសបារាំង។ គិតត្រឹមឆ្នាំ២០១៨ AFP មានបុគ្គលិកសរុប២៤០០នាក់ ១០០សញ្ជាតិផ្សេងគ្នា ដែលធ្វើការនៅ១៥០ប្រទេសនៅជុំវិញពិភពលោក ដែលក្នុងនោះប្រទេសនៅទ្វីបអាហ្វ្រីក អាមេរិកខាងជើង អាមេរិកឡាទិន អាស៊ីប៉ាស៊ីហ្វិក អឺរ៉ុប មជ្ឈិមបូព៌ា។ AFP ផលិតរូបថត វីដេអូ អត្ថបទ ក្រាហ្វិក ព័ត៌មាន សេដ្ឋកិច្ច កីឡា វិទ្យាសាស្ត្រនិងបរិស្ថាន សុខភាព វប្បធម៌ និងកម្សាន្ត ដែលកំពុងកើតមានឡើងនៅជុំវិញពិភពលោក។ បុគ្គលិករបស់AFPនៅកម្ពុជា មានលោក តាំង​ ឈិនសុធីជាអ្នកថតរូប និងលោក ស៊ុយ សែ ជាអ្នកឆ្លងឆ្លើយព័ត៌មាន និងជាអ្នកផលិតវីដេអូ។

៤. EPA=European Pressphoto Agency៖ គឺជាទីភ្នាក់ងារដែលលក់រូបព័ត៌មានដែលបង្កើតឡើងតាំងពីឆ្នាំ១៩៨៥ មានទីស្នាក់ការធំទីក្រុង ហ្វ្រេងហ្វឺត នៅប្រទេសអាល្លឺម៉ង។ ទីភ្នាក់ងារនេះមានអ្នកថតរូបប្រចាំនៅប្រទេសនានទូទាំងពិភពលោក ក្នុងមាននៅទ្វីបអឺរ៉ុប ទ្វីបអាហ្វ្រីក មជ្ឈិមបូព៌ា ទ្វីបអាស៊ីប៉ាស៊ីហ្វិក និងទ្វីបអាមេរិក។ បច្ចុប្បន្ន EPA ផលិតរូបថ្មីៗក្នុងមួយថ្ងៃប្រមាណជា២២០០សន្លឹក និងចាប់ផ្តើមផលិតវីដេអូព័ត៌មានទូទៅ ៤០វីដេអូក្នុងមួយថ្ងៃ។ អ្នកថតរូបប្រចាំនៅកម្ពុជាគឺលោក ម៉ក់ រ៉េមីស្សា និងលោក គិត សេរី។

ប្រភព និងរូបថត៖ គេហទំព័រទីភ្នាក់ងារទាំង៤, រូបព្រីនស្គ្រីនពីគេហទំព័រទីភ្នាក់ងារទាំង៤