តើសព​ស្តេចឈីងអាយុកាលជាង២ពាន់ឆ្នាំ អាចនឹង​រលួយឬនៅ?

  • 2021-07-13 07:40:59
  • ចំនួនមតិ 0 | ចំនួនចែករំលែក 0

ចន្លោះមិនឃើញ


សព​អធិរាជ ឈីង ស៊ីហ័ង ដែលកប់​ក្នុងផ្នូរដ៏អាថ៌កំបាំង ឬរាជវាំងក្រោមដី អាយុកាល​ជាង ២ពាន់​ឆ្នាំ​មកហើយនោះ អាចនឹងមិនទាន់រលួយនៅឡើយទេ រហូតមកដល់ពេលនេះ។

លោក Guo Zhikun អ្នកឯកទេស​ប្រវត្តិសាស្រ្ត​សម័យរាជវង្សឈីង និងហាន បាន​លើកឡើង​នូវមូលហេតុដែល​បង្ហាញថា សពស្តេចឈីង​នៅតែរក្សាសភាព​ល្អ គឺដោយសារ​ក្នុងអំឡុងរាជវង្សឈីង គឺវាជារឿងធម្មតា​ចំពោះ​ការដាក់បារត​ក្នុងផ្នូរ​ ដើម្បី​ការពារ​សាកសព​មិនឱ្យរលួយ សម្រាប់អភិជន។

លោក​បញ្ជាក់​ថា ការធ្វើតេស្ត​សម័យទំនើបនេះ លើស្រទាប់ដីផ្នូរគឺពិនិត្យឃើញ​ជាតិបារតខ្ពស់ ដែល​បង្ហាញ​លទ្ធភាព​នៃការរក្សាសពទុកបានយូរ។

ចំនួន​សារធាតុបារតក្នុងផ្នូរ​ក៏​បាន​បញ្ជាក់ដែរ​ថា ផ្នូរនេះ​មិនដែលត្រូវបាន​គេយាយីម្តងណាឡើយ ព្រោះបើវាត្រូវបានជីកគាស់នោះ​ វានឹងមានការសាយភាយជាតិបារតចេញមកហើយ។ លើសនេះទៀត ក៏គ្មានស្នាមជីកកកាយ​ផ្នូរពីមុនមកដែរ។

ស្តេច​ឈីង បាន​ចេញបញ្ជា​ឱ្យ​សង់ផ្នូរនេះ នៅ​ពេលឡើងគ្រងរាជ្យ​ក្នុងឆ្នាំ ២៤៦មុនគ.ស ក្នុងនោះ​ទាហាន​ដីឥដ្ឋ ត្រូវបាន​បញ្ជាឱ្យធ្វើឡើង​ដើម្បី​យាមផ្នូរ ដោយ​មានជំនឿថា ទាហាន​ទាំងនេះ​នឹង​បន្តតាមការពារទ្រង់​ និង​អំណាច​ក្រោយ​ចូលទីវង្គត។ ការធ្វើ​ទាហានដ៏ឥដ្ឋនេះ គឺដើម្បីជំនួសពីការយកជីវិតទាហានជាមនុស្សពិតមកយាម។ ចំពោះការសង់​ផ្នូរនេះធ្វើឡើង​លើផ្ទៃដីទំហំ៥០គីឡូម៉ែត្រការ៉េ ដោយ​ប្រើកម្លាំងពលកម្មប្រមាណ ៧០ម៉ឺននាក់​ឯណោះ ចំណាយពេល​ ៣៦ឆ្នាំ ពោលគឺ​ផែនការ​នេះ​ត្រូវបញ្ចប់ ពេល​ស្តេច​ចូលទីវង្គត​ក្នុងឆ្នាំ ២១០មុនគ.ស។

សូមជម្រាប​ថា ក្រោយ​រកឃើញ​ផ្នូរនេះនៅក្រុងស៊ីអាន ​ក្នុងឆ្នាំ១៩៧៤មក អ្នកស្រាវជ្រាវ​បាន​ជីកកកាយ​ឃើញ​មាន​ទាហានដីឥដ្ឋប្រមាណ​ជាង ៨ពាន់រូប, រទេះចម្បាំង ១៣០គ្រឿង, សេះ ៦៧០ក្បាល។ ក្រៅពីនេះក៏មានតន្រ្តីករ​ សិល្បករ និង​ទាសីជាដីឥដ្ឋផងដែរ៕

ប្រភព៖ china.org

អត្ថបទថ្មី
;