លោក Duterte ប្រកាសប្រើច្បាប់អាជ្ញាសឹក នៅតំបន់ភាគខាងត្បូងរបស់ហ្វីលីពីន

2017-05-24 00:24:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីហ្វីលីពីន លោក Rodrigo Duterte កាលពីថ្ងៃទី២៣ ឧសភា ម្សិលមិញ បានប្រកាសប្រើច្បាប់អាជ្ញាសឹកនៅទូទាំងតំបន់ភាគខាងត្បូងរបស់ហ្វីលីពីន ក្រោយមានការប៉ះទង្គិចគ្នាយ៉ាងខ្លាំងរវាងកងកម្លាំងរដ្ឋាភិបាលហ្វីលីពីន និងក្រុមសកម្មប្រយុទ្ធឥស្លាមជ្រុលនិយមនៅក្នុងតំបន់នោះ។

កងទ័ពហ្វីលីពីន នៅតំបន់ភាគខាងត្បូង

ការប្រកាសប្រើច្បាប់អាជ្ញាសឹកនេះ ត្រូវបានធ្វើឡើងដោយអ្នកនាំពាក្យប្រធានាធិបតីហ្វីលីពីន នៅក្នុងក្រុងមូស្គូ ខណៈពេលលោក Duterte កំពុងបំពេញទស្សនកិច្ចផ្លូវការនៅទីនោះ។ អ្នកនាំពាក្យបន្ថែមថា ប្រធានាធិបតី Duterte បានដាក់តំបន់ភាគខាងត្បូង គឺតំបន់ Mindanao ទាំងស្រុង ដែលមានប្រជាជនរស់នៅប្រមាណ ២០លាននាក់ ឲ្យនៅក្រោមច្បាប់អាជ្ញាសឹក។ ការដាក់ឲ្យនៅក្រោមច្បាប់អាជ្ញាសឹកនេះ នឹងអាចមានរយៈពេលរហូតដល់ ៦០ថ្ងៃ ស្របតាមរដ្ឋធម្មនុញ្ញរបស់ហ្វីលីពីន។

លោក Duterte ជួបពិភាក្សាជាមួយលោក Putin នៅក្រុងមូស្គូ

ចំណែកលោក Duterte វិញ ក្រោយជួបពិភាក្សាការងារជាមួយប្រធានាធិបតីរុស្ស៊ី លោក Vladimir Putin រួចហើយ បានកំពុងរៀបចំចាកចេញពីប្រទេសរុស្ស៊ី ត្រឡប់មកហ្វីលីពីនវិញ។ ការធ្វើមាតុភូមិនិវត្តន៍មកហ្វីលីពីនវិញនេះ គឺធ្វើឡើងមុនពេលកំណត់ ដោយតាមការប្រកាសព័ត៌មាន គឺប្រធានាធិបតីហ្វីលីពីន Duterte ត្រូវធ្វើទស្សនកិច្ចផ្លូវការនៅក្នុងប្រទេសរុស្ស៊ីចំនួន ៥ថ្ងៃ គឺពីថ្ងៃទី២២ ដល់ថ្ងៃទី២៦ ឧសភា ២០១៧៕

ប្រភព៖ Channelnewsasia ប្រែសម្រួល៖ វាសនា