ស្គាល់តែ NewsFeed លើ Facebook តែធ្លាប់ឆ្ងល់ថា វាដំណើរការដូចម្ដេចអត់?

2017-07-22 08:47:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មុខងារ New Feed របស់ Facebook គឺជាមុខងារដែលជ្រើសរើសរឿងដែលទាក់ទង និងទាក់ទាញការចាប់អារម្មណ៍សម្រាប់អ្នកលេងបណ្ដាញសង្គមមួយនេះ ពោលគឺជ្រើសរើសរឿងដែលសំខាន់បំផុត ក្នុងចំណោមរាប់ពាន់រឿងដែលកើតមានឡើងក្នុង Facebook ដើម្បីបង្ហាញនៅលើ NewsFeed របស់អ្នក ដោយដាក់នៅលើទំព័រខាងលើបង្អស់ នៅពេលដែលអ្នកចូលទៅកាន់ Facebook ម្ដងៗ។

កត្តា ៤យ៉ាងសំខាន់ៗ ដែល Facebook ជ្រើសរើសរឿងសម្រាប់ NewsFeed របស់អ្នក មានដូចតទៅ៖

១- តើនរណាជាអ្នកបង្ហោះរឿងនោះ?

នៅពេលដែលអ្នកឧស្សាហ៍ឆ្លើយឆ្លង Comment ឬ Like លើការបង្ហោះរបស់នរណាម្នាក់ច្រើន នោះ Facebook នឹងគិតថា អ្នកគឺជាគោលដៅសម្រាប់ការបង្ហោះបន្តបន្ទាប់របស់ម្នាក់នោះ។ ក្រៅពី Like និង Comment ក៏អាចមានដូចជា ការចុចអាន ការចូលទៅកាន់ Profile ការចុច Tag ឬការត្រូវបានគេចុច Tag ក្នុងរូបថតណាមួយ និងសកម្មភាពជាច្រើនទៀត។ នេះជាមូលហេតុដែលអ្នកពុំសូវឃើញការបង្ហោះពីមិត្តភ័ត្តិចាស់ៗ ឬ ទំព័រ (Page) ផ្សេងៗ ដែលអ្នកខានឆ្លើយឆ្លងយូរឆ្នាំ។

២- តើរឿងនោះទាក់ទាញអ្នកចូលមើល ឬ អានបានច្រើនកម្រិតណា?

រឿងមួយដែលមាន Engage ពីអ្នកប្រើប្រាស់កាន់តែច្រើន នោះ Facebook នឹងផ្ដល់អាទិភាពរឿងនោះនៅលើ NewsFeed របស់អ្នក។ អ្នកលេង ឬ ទំព័រមួយចំនួន តែងតែបង្ហោះរឿងដែលគួរឲ្យធុញ ដូច្នេះ Facebook នឹងមិនសូវបង្ហាញរឿងរបស់អ្នកលេង ឬ ទំព័រទាំងនោះឡើយ។ ប៉ុន្តែបើមនុស្សភាគច្រើនពេលឃើញការបង្ហោះមួយភ្លាមហើយ Engage, Facebook នឹងចាត់ទុកការបង្ហោះនោះជារឿងគួរឲ្យចាប់អារម្មណ៍ ហើយបន្តចែកចាយរឿងនោះទៅកាន់មនុស្សកាន់តែច្រើនថែមទៀត។

៣- តើការបង្ហោះនោះ ជាប្រភេទរឿងអ្វី?

នៅពេលដែលអ្នកឧស្សាហ៍ Engage លើប្រភេទការបង្ហោះណាមួយ ដូចជា Status, Link, រូបថត, វីដេអូ, ព្រឹត្តិការណ៍, ការងារ ឬ រឿងផ្សេងៗទៀត នោះ Facebook នឹងព្យាយាមស្វែងរកតែប្រភេទការបង្ហោះដូចគ្នានោះ មកដាក់លើ NewsFeed របស់អ្នក។ អ្នកប្រើប្រាស់មានចំណង់ចំណូលចិត្តខុសៗគ្នា។ អ្នកខ្លះចូលចិត្តអានព័ត៌មាន ឯអ្នកខ្លះទៀត ចូលចិត្តចុចមើលវីដេអូ។

៤- តើវាត្រូវបានបង្ហោះនៅពេលណា?

រឿងកាន់តែថ្មី មានន័យថា អ្នកកាន់តែឆាប់ឃើញមុនគេ នៅលើ NewsFeed ។ ប៉ុន្តែ Facebook ក៏មាន ភាពឆ្លាតវៃ ក្នុងការតាមដាននូវសកម្មភាពរបស់អ្នកដែលចូលទៅកាន់ NewsFeed នោះ ហើយ Facebook នឹងដាក់ចំណាត់ថ្នាក់រឿងដែលចាស់តែល្អ នៅខាងលើបំផុតរបស់ NewsFeed ប្រសិនបើអ្នកខានចូល (Log in) ទៅកាន់ Facebook ក្នុងរយៈពេលយូរ។

ក្រៅពីកត្តាធំៗទាំង៤ ក៏នៅមានកត្តាបន្ទាប់បន្សំមួយចំនួនទៀត ដូចជា រឿងដែលមានលក្ខណៈស្រដៀងគ្នា ពោលគឺព័ត៌មាន ឬ វីដេអូ ដែល Friends របស់អ្នកបង្ហោះដូចៗគ្នា ។ Facebook នឹងធ្វើការសន្មតថា វាជារឿងធំ ហើយបង្ហាញនៅលើ NewsFeed ផងដែរ។ កត្តាខ្លះទៀត ដូចជា ការបញ្ចេញផលិតថ្មីៗរបស់ Facebook ក៏នឹងត្រូវលេចឡើងមុនគេផងដែរ ព្រោះ Facebook តម្រូវឲ្យអ្នកប្រើប្រាស់សាកល្បងផលិតផលទាំងនោះ និងចង់ដឹងថា តើអ្នកប្រើប្រាស់ចាប់អារម្មណ៍ផលិតផលថ្មីទាំងនោះកម្រិតណា ដោយពួកគេអាចបញ្ចេញជាមតិត្រឡប់មកវិញ (Feedback) ដើម្បីឲ្យគ្រប់តាមការកំណត់ ទើប Facebook សម្រេចចេញជាផ្លូវការ៕

ប្រភព៖ Techcrunch ប្រែសម្រួល៖ លាភ.