ដំណើរជីវិតសង្ខេបរបស់អ្នកម្នាង អ៊ុក ផល្លា រណឫទ្ធិ [បណ្ដុំរូបភាព]

2018-06-20 06:27:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកម្នាងអ៊ុក ផល្លា ប្រសូត្រនៅថ្ងៃសុក្រ ទី២៧ ខែកក្កដា ឆ្នាំ១៩៧៩ នៅរាជធានីភ្នំពេញ។ អ្នកម្នាងជាកូនទី៥ ក្នុងចំណោមបងប្អូនចំនួន ៨នាក់។ មាតារបស់អ្នកម្នាង មានឈ្មោះ សុខ ស៊ីដេត អាយុ ៧៥ឆ្នាំ ចំណែកបិតា ឈ្មោះ អ៊ុក ខន (ស្លាប់)។

កាលពីអាយុ ៦ឆ្នាំ កុមារី អ៊ុក ផល្លា បានចូលសិក្សានៅសាលាបឋមសិក្សាវត្តកោះ រាជធានីភ្នំពេញ។ ក្នុងរយៈពេលតែ២ឆ្នាំប៉ុណ្នោះ កុមារី អ៊ុក ផល្លា បានបន្តចូលរួមនៅសាលាភូមិន្ទវិចិត្រសិល្បៈ រាជធានភ្នំពេញ។ ដោយសារការខិតខំ ព្យាយាម ឧស្សាហ៍ និងជាក្មេងស្រីឆ្លាតវៃ និងក្រោមការបង្ហាត់បង្រៀនពីសាស្រ្ដាចារ្យ នានា ជាពិសេសក្រោមព្រះវត្តមាននៃសម្ដេចរាជបុត្រីព្រះរាម បុប្ផាទេវី ដែលជាសាស្រ្ដចារ្យផ្ទាល់ផងនោះ កុមារី អ៊ុក ផល្លា បានរីកចម្រើនពីមួយថ្ងៃទៅមួយថ្ងៃ ហើយក្លាយជាសិស្សឆ្នើមប្រចាំសាលា។

នៅឆ្នាំ១៩៩៣ អ្នកម្នាង បានក្លាយជានាដការីដ៏សំខាន់ដែលតំណាងឲ្យអប្សរាជាតិប្រចាំប្រទេស ហើយទទួលបានការអញ្ជើញទៅសម្ដែងតំណាងជាតិ នៅបរទេស រួមមាន ប្រទេសជប៉ុន បារាំង អាមេរិក ឥណ្ឌា ថៃ ឡាវ ភូមា និងប្រទេសមួយចំនួនផ្សេងទៀត។

នៅឆ្នាំ១៩៩៩ អ្នកម្នាងអ៊ុក ផល្លា បានចូលរួមសម្ដែងជាតួឯក ក្នុងរឿង "រាជបុរី" ដែលជាព្រះរាជនិពន្ធ និងដឹកនាំផ្ទាល់ដោយសម្ដេចក្រុមព្រះ នរោត្តម រណឫទ្ធិ។

អ្នកម្នាងធ្លាប់មានចំណងអាពាហ៍ពិពាហហ៍ដំបូងជាមួយលោក វេង សេរីវុឌ្ឍ អតីតរដ្ឋមន្រ្តីក្រសួង ទេសចរណ៍ ប៉ុន្តែមិនយូរប៉ុន្មានជីវិតអាពាហ៍ពិពាហ៍របស់អ្នកនាង អ៊ុក ផល្លា បានដល់ផ្លូវបំបែក។ ក្រោយពីបែកបាក់ស្វាមី តួឯកអប្សរាសរូបនេះ ត្រូវបានសម្តេចក្រុមព្រះ នរោត្តម រណឬទ្ធិ សព្វព្រះទ័យ និងបានសាងជីវិតគ្រួសារជាមួយគ្នា ក្រោយពីព្រះអង្គបានលែងលះម្ចាស់ក្សត្រីម៉ារី រណឫទ្ធិ។

អ្នកម្នាងត្រូវបានសម្ដេចក្រុមព្រះ ដាក់ព្រះនាមថា នរោត្តម ផល្លារណឫទ្ធិ។ អ្នកម្នាង និងសម្ដេចក្រុមព្រះ មានបុត្រ ២អង្គ គឺបុត្រច្បង មាននាម នរោត្តម សុធាឫទ្ធិ ប្រសូតក្នុងឆ្នាំ២០០៣ និងបុត្រទី២ មាននាម នរោត្តម រណវង្ស ប្រសូតក្នុងឆ្នាំ២០១១។

សម្ដេចក្រុមព្រះ ជាមួយអ្នកម្នាង និងបុត្រទី២ ព្រះនាម នរោត្តម រណវង្ស ក្នុងសមាជគណបក្សហ៊្វុនស៊ិនប៉ិច កាលពីឆ្នាំ២០១៧

នៅឆ្នាំ២០១៨ អ្នកម្នាងបានឈរឈ្មោះជាបេក្ខជនតំណាងរាស្រ្ដរបស់គណបក្សហ៊្វុនស៊ិនប៉ិច មណ្ឌលខេត្តព្រៃវែង សម្រាប់ការបោះឆ្នោតជ្រើសតាំងតំណាងរាស្រ្ដ នីតិកាលទី៦។ ប៉ុន្តែជាអកុសល អ្នកម្នាង បានទទួលមរណភាព ក្រោយជួបគ្រោះថ្នាក់ចរាចរណ៍ នៅខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ សពរបស់អ្នកម្នាង ត្រូវបូជា នៅមុខវត្តបទុមវត្តិ នាព្រឹកថ្ងៃទី២០ ខែមិថុនានេះ ខណៈសម្ដេចក្រុមព្រះ បានរងរបួសធ្ងន់ កំពុងសម្រាកព្យាបាលនៅមន្ទីរពេទ្យក្នុងប្រទេសថៃ៕

អត្ថបទពាក់ព័ន្ធ៖