រដ្ឋមន្រ្តីរំពឹងថា បាក់ឌុបឆ្នាំនេះ អាចនឹងមានសិស្សជាប់និទ្ទេស A កើនជាងឆ្នាំមុន

2018-09-05 09:40:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្រ្តីក្រសួងអប់រំ យុវជន និងកីឡា លោក ហង់ ជួនណារ៉ុន បានរំពឹងថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០១៨នេះ អាចនឹងមានសិស្សជាប់និទ្ទេស A កើនជាងឆ្នាំ២០១៧ ដោយសារតែសិស្សមានការខំប្រឹងប្រែងរៀនសូត្រត្រៀមប្រឡង ជាច្រើនឆ្នាំមកហើយ។ ប៉ុន្តែលោកមិនទាន់អាចបញ្ជាក់ពីចំនួនបានឡើយ។ ការថ្លែងនេះ ធ្វើឡើងនៅក្នុងឱកាសអបអរសាទរសិស្សនិស្សិតដែលជាប់អាហារូបករណ៍ទៅរៀននៅប្រទេសអង់គ្លេស កាលពីថ្ងៃទី០៤ កញ្ញា ឆ្នាំ២០១៨។

លោកបានអះអាងថា ការប្រឡងបាក់ឌុបឆ្នាំ២០១៨នេះ មានលក្ខណៈល្អប្រសើរជាងឆ្នាំមុន ហើយលោកប្ដេជ្ញាថា នឹងខិតខំកែលម្អការប្រឡងឱ្យមានលក្ខណៈល្អប្រសើរបន្ថែមទៀត។

លោក ហង់ ជួនណារ៉ុន ថ្លែងក្នុងសន្និសីទស្តីពីការរៀបចំការប្រឡងបាក់ឌុបឆ្នាំ២០១៨ កាលពីខែកក្កដា

សូមរំលឹកថា ការប្រឡងបាក់ឌុបឆ្នាំ២០១៧ មានបេក្ខជនជាប់និទ្ទេស A ចំនួន ៤២៤នាក់, និទ្ទេស B ចំនួន ២៤៦៤នាក់, និទ្ទេស C ចំនួន ៥០០០នាក់, និទ្ទេស D ចំនួន ៩១២៣នាក់ និងនិទ្ទេស E ចំនួន ៤៦៦៥៧នាក់។

រដ្ឋមន្រ្តីរូបនេះបន្ថែមថា លទ្ធផលផ្លូវការនៃការប្រឡងមធ្យមសិក្សាទុតិយភូមិ ឬបាក់ឌុប នឹងត្រូវប្រកាសលឿនជាងការគ្រោងទុក ដោយសារតែការស្រង់ និងបូកពិន្ទុប្រឡងដំណើរការបានរលូន ពោលគឺរាជធានីភ្នំពេញនិងខេត្តកណ្ដាល នឹងប្រកាសនៅថ្ងៃទី០៩កញ្ញា។ ដោយឡែកនៅតាមបណ្ដាខេត្តផ្សេងៗទៀត នឹងប្រកាសនៅថ្ងៃទី១០កញ្ញា។

បើតាមការជូនដំណឹងរបស់ក្រសួងអប់រំនាពេលកន្លងមក លទ្ធផលប្រឡងបាក់ឌុប នឹងត្រូវប្រកាសនៅថ្ងៃទី១១កញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល។ ចំណែកឯបណ្ដាខេត្តផ្សេងៗទៀត នឹងត្រូវប្រកាសនៅព្រឹកថ្ងៃទី១២ កញ្ញា ឆ្នាំ២០១៨៕

អត្ថបទទាក់ទង៖