Terengganu យកការប្រកួតនៅកម្ពុជា តេស្តសមត្ថភាពរកប្រធានក្រុម ឯ ធារី ជាបេក្ខភាព១រូប

2018-01-03 10:01:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្មីៗនេះ ក្លឹប Terengganu FC បានបង្ហើបពីគម្រោងរបស់ខ្លួន ក្នុងការប្រកួតមិត្តភាពនៅកម្ពុជា នាដើមខែមករា ឆ្នាំ២០១៨នេះ ដោយជាការធ្វើតេស្តសមត្ថភាព និងវាយតម្លៃទៅលើកីឡាករនិមួយៗ រួមទាំងកីឡាករ ធារី ចន្ថាប៊ីន ដែលធ្លាប់ធ្វើជាប្រធានក្រុមជម្រើសជាតិកម្ពុជា ដើម្បីស្វែងរកបេក្ខភាពដែលស័ក្ដិសមជាប្រធានក្រុម សម្រាប់ការប្រកួតប្រជែងនៅលីគកំពូលម៉ាឡេស៊ី នារដូវកាល២០១៨។

ធារី ចន្ថាប៊ីន ជាប្រធានក្រុមជម្រើសជាតិកម្ពុជា នាពេលកន្លងទៅ

យោងតាមវេបសាយម៉ាឡេស៊ី 90Minit កាលពីថ្ងៃទី១ ខែមករា ឆ្នាំ២០១៨ បានចុះផ្សាយថា លោក Mohamad Nik ជំនួយការគ្រូបង្វឹកក្លឹបដែលទើបឡើងទៅលីគកំពូលម៉ាឡេស៊ីរដូវកាល២០១៨ នឹងវាយតម្លៃកីឡាករទាំងអស់ តាមរយៈការដាក់ឲ្យចូលលេង ដើម្បីចម្រាញ់យកកីឡាករសម្រាប់តំណែងប្រធានក្រុម ក្នុងជំនួបមិត្តភាព ៣ប្រកួតនៅកម្ពុជា និងការប្រកួតពានរង្វាន់ Menteri Besar Cup ដែលចាប់ផ្ដើមពីថ្ងៃទី១៥ ខែមករា ខាងមុខនេះ។

«មកទល់ពេលនេះ ពួកយើងមិនទាន់សម្រេចថា នរណានឹងត្រូវផ្ដល់តួនាទីជាប្រធានក្រុមនៅឡើយទេ ព្រោះពួកយើងត្រូវពិនិត្យលើកត្តាផ្សេងៗជាច្រើន រួមទាំងភាពជាអ្នកដឹកនាំផងដែរ។ មុនសម្រេចចិត្ត ពួកយើងត្រូវមើលជាមុនសិនថា កីឡាករម្នាក់នោះមានលក្ខណៈសម្បត្តិអាចដឹកនាំ ឬ លេងបានល្អគ្រប់ការប្រកួត ឬអត់»។ នេះជាសម្ដីរបស់លោក Mohamad Nik ។

កីឡាករបរទេស៥រូប ដែល Terengganu នាំយកទៅចូលរួម សម្រាប់រដូវកាល២០១៨

ប្រធានក្រុមរបស់ Terengganu កាលពីនៅលីគលំដាប់ទីពីររដូវកាល២០១៧ មានពីររូប គឺកីឡាករ Latiff Suhaimi និង Lazaro Vicinius ដោយធ្វើជំនួសគ្នាទៅវិញទៅមក។

ធារី ចន្ថាប៊ីន ពាក់ស្លាកប្រធានក្រុមឲ្យមិត្តរួមក្រុម ដែលត្រូវទទួលតួនាទីនេះជំនួស ក្នុងការប្រកួតមិត្តភាពរបស់ Terengganu កន្លងទៅ

គួររំឭកថា Terengganu នឹងធ្វើដំណើរមកកាន់ប្រទេសកម្ពុជា ដើម្បីធ្វើការប្រកួតមិត្តភាពជាមួយក្លឹបបាល់ទាត់ ព្រះខ័នរាជស្វាយរៀង នៅថ្ងៃទី៦មករា, ក្រសួងការពារជាតិ នៅថ្ងៃទី៨មករា និងក្លឹបភ្នំពេញក្រោន នៅថ្ងៃទី៩មករា៕

ចុចអាន កាលបរិច្ឆេទការប្រកួតលីគ និង Cup របស់ម៉ាឡេស៊ី រដូវកាល២០១៨ ចេញហើយ!

អត្ថបទ៖ លាភ.