មនុស្សម្នា ភ័យស្លន់ស្លោ ក្រោយការប្រកាសអាសន្នរឿងបាញ់មីស៊ីលមកលើកោះហាវៃ
- 2018-01-15 03:52:10
- ចំនួនមតិ 0 | ចំនួនចែករំលែក 0
មនុស្សម្នា ភ័យស្លន់ស្លោ ក្រោយការប្រកាសអាសន្នរឿងបាញ់មីស៊ីលមកលើកោះហាវៃ
ចន្លោះមិនឃើញ
ប្រជាពលរដ្ឋដែលរស់នៅលើកោះហាវៃ បាននាំគ្នាភ័យស្លន់ស្លោ បន្ទាប់ពីទទួលបានសារក្នុងទូរសព្ទដៃ ដោយប្រកាសអាសន្នពីការបាញ់មីស៊ីលមកលើកោះមួយនេះ កាលពីថ្ងៃទី១៣ ខែមករា ឆ្នាំ២០១៨ កន្លងទៅ។
សារនោះបានផ្ញើទៅកាន់ទូរសព្ទរបស់ប្រជាពលរដ្ឋកោះហាវៃ នៅម៉ោងប្រហែល ៨ព្រឹកថា៖ «ការគំរាមកំហែងដោយមីស៊ីលបាលីស្ទីក កំពុងតែហោះមកកាន់កោះហាវៃ។ សូមស្វែងរកទីតាំងសុវត្ថិភាព។ នេះមិនមែនជាសមយុទ្ធទេ»។
ប្រជាជនដែលធ្វើដំណើរតាមដងផ្លូវ ខ្លះបានរត់ចោលរថយន្តដើម្បីស្វែងរកទីតាំងសុវត្ថិភាព ឯខ្លះទៀតបានរត់ចូលក្នុងផ្ទះសម្បែង សម្ងំលាក់ខ្លួនជាង៤០នាទី ទម្រាំស្ថានភាពបានប្រសើរឡើងវិញ ក្រោយពីទទួលបានសារថ្មីមួយទៀតដែលបញ្ជាក់ថា មានអ្នកចុចប៊ូតុងប្រកាសអាសន្នខុស។
ភ្នាក់ងារការពារភាពអាសន្នកោះហាវៃ បានអះអាងថា ពួកគេនឹងទទួលខុសត្រូវចំពោះទង្វើនេះ ហើយនឹងធ្វើការស៊ើបអង្កេតពីបញ្ហាបច្ចេកទេស ដើម្បីធានាមិនឲ្យមានរឿងដូច្នេះកើតឡើងសាជាថ្មីឡើយ។
សូមបញ្ជាក់ថា កាលពីខែធ្នូកន្លងទៅ កោះហាវៃបានធ្វើតេស្តសាកល្បងសំឡេងសារ៉ែនរបស់ខ្លួន។ គេរកឃើញថា សារ៉ែន ៩៣% នៃចំនួន ៣៨៦ ដំណើរការជាធម្មតា។ យ៉ាងណាមិញ នៅផ្នែកខ្លះ សំឡេងសារ៉ែន មិនទាន់ឮដល់នៅឡើយទេ ដូច្នេះសារ៉ែនជាច្រើនត្រូវបានបំពាក់បន្ថែមទៀតនៅតំបន់ទាំងនោះ៕