ការបោះឆ្នោតធំៗចំនួន ៦ នឹងធ្វើឡើងនាឆ្នាំ ២០១៨ នេះ!

2018-01-15 08:35:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

២០១៨ នឹងក្លាយជាឆ្នាំដែលមានការរៀបចំការបោះឆ្នោត នៅប្រទេសជាច្រើនក្នុងលោក។ ខ្លីៗ សូមលើកយកការបោះឆ្នោតសំខាន់នៅ ៦ប្រទេស ដែលមានដូចខាងក្រោម (គិតលំដាប់លំដោយតាមកាលបរិច្ឆេទបោះឆ្នោត)៖

អ៊ីតាលី (ខែមីនា)

សភាអ៊ីតាលី ត្រូវបានរំលាយចោលនៅថ្ងៃទី២៨ ខែធ្នូ ឆ្នាំ២០១៧ កន្លងទៅ ហើយការបោះឆ្នោតថ្មី នឹងត្រូវធ្វើឡើងនាថ្ងៃទី០៤ ខែ មិនាឆ្នាំ ២០១៨។ សមាជិកសភា ៦៣០នាក់ និងសមាជិកព្រឹទ្ធសភា ៣១៥ នាក់ នឹងកើតចេញពីការបោះឆ្នោតនេះ។ ការស្ទង់មតិកន្លងមក រកឃើញថា គណបក្ស Five Star Movement មានប្រជាប្រិយភាពខ្លាំងជាងគេ

លោកLuigi Di Maio (ស្ដាំ) ប្រធានគណបក្ស Five Star Movement (រូបថត៖ Getty)

**រុស្ស៊ី (ខែមីនា)**

រុស្ស៊ី នឹងធ្វើការរៀបចំការបោះឆ្នោតជ្រើសរើសប្រធានាធិបតី នាថ្ងៃទី១៨ ខែមិនា ឆ្នាំ២០១៨នេះ។ បើតាមការស្ទង់មតិ បានឲ្យដឹងថា ៨០% នៃប្រជាជនរុស្ស៊ី នៅតែជឿជាក់លើការដឹកនាំរបស់លោកប្រធានាធិបតី វ៉្លាឌីមៀរ ពូទីន។

លោកពូទីន រំពឹងថានឹងជាប់ឆ្នោតម្ដងទៀត នាឆ្នាំ២០១៨ នេះ (រូបភាព៖ Sputnik)

គុយបា (ខែមេសា)

នាថ្ងៃទី១៩ ខែមេសា ឆ្នាំ២០១៨ សមាជិករដ្ឋសភាជាតិគុយបា នឹងធ្វើការបោះឆ្នោតជ្រើសរើស ប្រធានាធិបតីថ្មី ជំនួសលោក Raul Castro វ័យ៨៦ឆ្នាំ ។ គួររម្លឹកថា លោក Raul Castro បានកាន់តំណែង នៅក្នុងឆ្នាំ២០០៨ បន្តពីបងប្រុសរបស់លោក គឺ លោក Fidel Castro ដែលចូលនិវត្តន៍ដោយបញ្ហាសុខភាព។

លោក Raul Castro ប្រធានាធិបតីបច្ចុប្បន្នរបស់គុយបា (រូបភាព៖ Reuters)

កម្ពុជា (ខែកក្កដា)

កម្ពុជា នឹងរៀបចំការបោះឆ្នោតជ្រើសតាំងតំណាងរាស្ត្រ នៅថ្ងៃទី២៩ ខែកក្កដា ឆ្នាំ២០១៨។ គណបក្សប្រជាជនកម្ពុជា ដែលដឹកនាំដោយសម្ដេចនាយករដ្ឋមន្ត្រី ហ៊ុន សែន ត្រូវបានគេរំពឹងថា នឹងទទួលបានជ័យជម្នះនៅអាណត្តិថ្មីនេះបន្តទៀត។ ក្រៅពីបោះឆ្នោតជ្រើសតាំងតំណាងរាស្ត្រនេះ កម្ពុជាក៏នឹងរៀបចំការបោះឆ្នោតជ្រើសតាំងសមាជិកព្រឹទ្ធសភាផងដែរ ដែលនឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០១៨។

គណបក្សប្រជាជនកម្ពុជា ក្នុងការឃោសនាបោះឆ្នោតឃុំសង្កាត់ ឆ្នាំ២០១៧

ប្រេស៊ីល (ខែតុលា)

ប្រេស៊ីលនឹងរៀបចំការបោះឆ្នោតជ្រើសតាំងប្រធានាធិបតី នៅថ្ងៃទី០៧ ខែតុលា ឆ្នាំ២០១៨។ ការស្ទង់មតិបានរកឃើញថា អតីតប្រធានាធិបតី Luiz Inacio Lula da Silva (កាន់តំណែង ២០០៣-២០១០) គឺជាបេក្ខភាពដែលមានសង្ឃឹមខ្ពស់ជាងគេ ប៉ុន្តែគេមិនទាន់ដឹងថាលោកនឹងអាចឈរឈ្មោះបោះឆ្នោតបានឬអត់ ដោយសារពេលនេះ លោកកំពុងញាំញីដោយសាររឿងក្ដីពុករលួយ។ ប្រធានាធិបតីបច្ចុប្បន្ន គឺលោក Michel Temer ក៏ជាបេក្ខភាពដ៏លេចធ្លោមួយរូបផងដែរ។

លោក Luiz Inacio Lula da Silva អតីតប្រធានាធិបតីប្រេស៊ីល ដែលទទួលការគាំទ្រច្រើនក្នុងការស្ទង់មតិចុងក្រោយ (រូបភាព៖ Getty)

ថៃ (ខែវិច្ឆិកា)

នាយករដ្ឋមន្រ្តីថៃលោក ប្រយុទ្ធ ចាន់អូចា ធ្លាប់បានបញ្ជាក់កាលពីខែក្នុងខែតុលា ឆ្នាំ២០១៧ ថា ការបោះឆ្នោតថ្នាក់ជាតិ នឹងត្រូវធ្វើឡើងនៅខែវិច្ឆិកា ឆ្នាំ២០១៨។ ប្រសិនបើកើតឡើងមែន វានឹងក្លាយជាការបោះឆ្នោតលើកដំបូង បន្ទាប់ពីមានរដ្ឋប្រហារ កាលពីឆ្នាំ២០១៤ មក៕