បុរសអាមេរិកម្នាក់ មមើដើរលួចឡានគេ ហើយបើកពេញក្រុងឈៀងម៉ៃ ប្រទេសថៃ
- 2018-01-16 06:21:21
- ចំនួនមតិ 0 | ចំនួនចែករំលែក 0
បុរសអាមេរិកម្នាក់ មមើដើរលួចឡានគេ ហើយបើកពេញក្រុងឈៀងម៉ៃ ប្រទេសថៃ
ចន្លោះមិនឃើញ
ទេសចរវ័យក្មេងសញ្ជាតិអាមេរិកម្នាក់ឈ្មោះ Jared Goldston ត្រូវបានប៉ូលិសចាប់ឃាត់ខ្លួន កាលពីម្សិលមិញ (១៥មករា) បន្ទាប់ពីលោកបានមមើលួចរថយន្តមួយគ្រឿង នៅក្នុងក្រុងឈៀងម៉ៃ ប្រទេសថៃ។
បុរសអាមេរិកវ័យ២២ឆ្នាំរូបនេះ បានលួចរថយន្តរបស់ម្ចាស់ហាងជួលមួយកន្លែងម៉ាក Honda City រួចបើកពេញក្រុងឈៀងម៉ៃ អស់រយៈពេល២ម៉ោង ក្នុងចម្ងាយប្រហែលជាង ៣០គីឡូម៉ែត្រ។ ប៉ូលិសថៃ ចាប់ឃាត់ខ្លួន Goldston បាននៅចំណុចផ្លូវប្រសព្វ Sri Boonruang ហើយមើលឃើញរថយន្តដែលលួច មានសភាពកំប៉ិចនៅកាងខាងមុខ។
លោក Wittaya Sukarom ដែលជាម្ចាស់ហាង និងម្ចាស់រថយន្ត បានឲ្យដឹងថា បុគ្គលិករបស់លោកបានទុកសោចោលនៅក្នុងឡាន មុនពេលរៀបចំបិទហាង កាលពីយប់ថ្ងៃទី១៤មករា។ លុះដល់ព្រឹកឡើង លោកទើបដឹងថា បានបាត់រថយន្ត រួចក៏បានប្ដឹងប៉ូលិសតែម្ដង។
បុរសជាជនសង្ស័យ និយាយថា លោកបានមកឈៀងម៉ៃ រយៈពេល២ថ្ងៃមកហើយ និងគ្រោងស្នាក់នៅប្រទេសថៃ រហូតដល់ថ្ងៃទី១១ ខែកុម្ភៈ។ លោកបានអះអាងថា លោកតែងមមើដើរដោយមិនដឹងខ្លួនយ៉ាងដូច្នេះ នៅពេលដែលលោកមានអារម្មណ៍ស្មុគស្មាញខ្លាំង។ លោកបន្ថែមថា លោកមិនបានចាំទាល់តែសោះថាបានបើករថយន្តទៅណា ឬក៏បើកបុកនឹងអ្វីទេ។
យ៉ាងណាមិញ ប៉ូលិសថៃ បានចោទប្រកាន់លោក Goldston ពីបទចោរកម្ម ហើយបានជម្រាបដំណឹងនេះទៅកាន់ស្ថានទូតអាមេរិក។ ប្រសិនបើរកឃើញថា នេះមិនមែនជាការមមើនោះទេ លោក Goldstone អាចនឹងជាប់ពន្ធនាគាររហូតដល់ ៣ឆ្នាំ និង/ឬក៏រងពិន័យជាប្រាក់ ៦ពាន់បាត (ស្មើនឹងប្រមាណ ១៨៧ដុល្លារ)៕