សហគ្រាសផលិតទឹកត្រី ដែលមានតែ១គត់ នៅខេត្តស្ទឹងត្រែង

2018-01-17 06:59:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងខេត្តស្ទឹងត្រែង មានទីតាំងផលិតទឹកត្រីតែ១គត់ គឺសហគ្រាសសហគមន៍ស្រ្តីផលិតទឹកត្រីកោះព្រះ ដែលស្ថិតក្នុងឃុំកោះព្រះ ស្រុកសៀមបូក។ ទឹកត្រីរបស់សហគ្រាសនេះ មានរូបសញ្ញាត្រីប៉ាស៊ីអ៊ី មានរសជាតិឆ្ងាញ់ និងល្បីល្បាញខ្លាំងក្នុងខេត្តនេះ ប៉ុន្តែក៏កំពុងមានការប្រកួតប្រជែងជាមួយទឹកត្រីបរទេសផងដែរ។

អ្នកស្រី ញ៉ុន វណ្ណារ៉ា និងក្រុមការងារ កំពុងឈរនៅពីខាងមុខសហគ្រាសរបស់អ្នកស្រី

អ្នកស្រី ញ៉ុន វណ្ណារ៉ា អាយុ ៥៤ ឆ្នាំ គឺជាប្រធានស្តីទីនៃ សហគ្រាសសហគមន៍ស្ត្រីផលិតទឹកត្រីកោះព្រះ។ អ្នកស្រី បានបង្កើតសហគមន៍ផលិតទឹកត្រី នៅឆ្នាំ ២០១២ ដោយគៀងគរប្រជាពលរដ្ឋក្នុងឃុំ ពិសេសស្ត្រីឱ្យមកចូលរួម។ បច្ចុប្បន្នសហគ្រាសនេះ មានបុគ្គលិកចំនួន ១១នាក់។

អ្នកស្រី ញ៉ុន វណ្ណារ៉ា

បើទោះជាស្លាកសញ្ញាសរសេរថា ទឹកត្រីសញ្ញាត្រីប៉ាស៊ីអ៊ីក៏ពិតមែន ក៏ប៉ុន្តែ ទឹកត្រីនេះមិនមែនផលិតពីត្រីប៉ាស៊ីអីនោះទេ ។ ត្រីល្អិតៗ គឺជាវត្ថុធាតុដើមចាំបាច់ សម្រាប់ផលិតទឹកត្រីនៅឃុំកោះព្រះនេះ។ ត្រីទាំងនោះត្រូវគេយកមកប្រឡាក់អំបិល ហើយផ្អាប់ទុកដើម្បីផលិតជាទឹកត្រី តែមិនមានបន្ថែមសារធាតុគីមី ដើម្បីឲ្យរក្សាទុកបានយូរនោះឡើយ៕

អ្នកស្រី ញ៉ុន វណ្ណារ៉ា កំពុងដួសកំណកពពុះ ចេញពីខ្ទះស្ងោរទឹកត្រី។ ការស្ងោររម្ងាស់ទឹកត្រីនេះ ធ្វើឡើងដោយការផ្សំគ្នារវាង ទឹកត្រីផ្អាប់ ៦គីឡូក្រាម អំបិល១៨គីឡូក្រាម និងទឹកមួយខ្ទះត្នោត។ ពេលរម្ងាស់រួចហើយ គេយកទឹកត្រី យកទៅរក្សាទុកនៅកន្លែងស្អាតមួយ ក្នុងរយៈពេលពី១អាទិត្យ ទៅ១ខែ ដើម្បីរង់ចាំការច្រកដប និង វេចខ្ចប់។

អ្នកស្រី ញ៉ុន វណ្ណារ៉ា និងបុគ្គលិក កំពុងបង្ហូរទឹកត្រីពីធុងរក្សាទុក ដាក់ក្នុងដប។ បន្ទាប់មកបុគ្គលិកឯទៀត បិទស្លាកសញ្ញា វេចខ្ចប់និងបញ្ជូនទៅកាន់ទីផ្សារ។ បរិមាណនៃការច្រកដប គឺអាស្រ័យលើការបញ្ជាទិញ។