គណបក្សប្រជាជនកម្ពុជា នឹងរៀបចំមហាសន្និបាតវិសាមញ្ញតំណាងទូទាំងប្រទេស រយៈពេល ៣ថ្ងៃ

2018-01-18 01:26:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សប្រជាជនកម្ពុជា នឹងរៀបចំមហាសន្និបាតវិសាមញ្ញតំណាងទូទាំងប្រទេស រយៈពេល ៣ថ្ងៃ ចាប់ពីថ្ងៃទី១៩-២១ ខែមករា ឆ្នាំ២០១៨ នៅមជ្ឈមណ្ឌលកោះពេជ្រ ក្នុងរាជធានីភ្នំពេញ។

គណបក្សប្រជាជនកម្ពុជា បើកមហាសន្និបាតវិសាមញ្ញតំណាងទូទាំងប្រទេស នាថ្ងៃទី ១៦ ខែមីនា ឆ្នាំ ២០១៣ នៅរាជធានីភ្នំពេញ។ រូបថត៖ AKP

ក្នុងពិធីសំណេះសំណាលជាមួយកម្មករ នៅតំបន់រោងចក្រព្រៃទា ក្នុងខណ្ឌពោធិ៍សែនជ័យ រាជធានីភ្នំពេញ កាលពីព្រឹកថ្ងៃទី១៧ ខែមករា ឆ្នាំ២០១៨ សម្តេចនាយករដ្ឋមន្ត្រី ហ៊ុន សែន បានប្រកាសថា សម្តេច នឹងរវល់រយៈពេល ៣ថ្ងៃ ចាប់ពីថ្ងៃសុក្រ ទី១៩ ខែមករា ឆ្នាំ២០១៨ ដើម្បីរៀបចំគោលនយោបាយរបស់គណបក្សប្រជាជនកម្ពុជា ពីឆ្នាំ២០១៨ ដល់ឆ្នាំ២០២៣ សម្រាប់នីតិកាលថ្មី នៃរដ្ឋសភា ដែលនឹងត្រូវបោះឆ្នោតនៅថ្ងៃទី២៩ ខែកក្កដា ឆ្នាំ២០១៨។

សម្តេច ហ៊ុនសែន ក៏បានបន្ថែមថា នៅថ្ងៃអាទិត្យ ទី២១ ខែមករា ឆ្នាំ២០១៨ នៅពេលថ្ងៃ សម្តេចនឹងដឹកនាំសន្និបាតគណបក្ស ហើយនៅពេលល្ងាចសម្តេចមានកម្មវិធី ត្រូវជួបជាមួយអ្នកកាសែត។

សូមរំលឹកថា មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា កាលពីថ្ងៃទី១៧ ខែមីនា ឆ្នាំ២០១៣ បានអនុម័តនូវកម្មវិធីនយោបាយរបស់គណបក្ស ឆ្នាំ២០១៣-២០១៨ ដែលមាន ៩៨ចំណុច។ កម្មវិធីនយោបាយនេះ ត្រូវបានគណបក្សបែងចែកជា ៣ ចំណុចធំៗរួមមាន៖

១. គោលដៅចម្បងជាយុទ្ធសាស្ត្រយូរអង្វែងរបស់គណបក្ស

២. គោលការណ៍គ្រឹះនៃកម្មវិធីនយោបាយរបស់គណបក្ស មាន ១១ចំណុច

និង៣. នយោបាយតាមវិស័យ មានចំនួន ៨៧ចំណុច៕

អត្ថបទ៖ លីហៀង