ក្រុមហ៊ុនជប៉ុន បើកសាលាបង្រៀនថែទាំមនុស្សចាស់នៅកម្ពុជា សម្រាប់អ្នកចង់ធ្វើការនៅជប៉ុន

2018-01-18 09:48:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនជប៉ុន Procast (CAMBODIA) Co., Ltd នឹងបើកវិទ្យាស្ថានបណ្តុះបណ្តាលសេវាថែទាំមនុស្សចាស់ នៅកម្ពុជាក្នុងខែមេសាខាងមុខនេះ។ វិទ្យាស្ថាននេះ ស្ថិតនៅក្នុងខណ្ឌសែនសុខ រាជធានីភ្នំពេញ ជាអគារកម្ពស់ ៥ជាន់ ដោយក្រុមហ៊ុនជប៉ុន ចំណាយប្រមាណ ៣លានដុល្លារ។ ដំណឹងនៃការបើកសាលានេះ ត្រូវបានប្រកាសក្នុងកិច្ចប្រជុំរវាងលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក Kondo Yoshio ប្រធានក្រុមហ៊ុន Procast (CAMBODIA) Co., Ltd. នៅទីស្តីការក្រសួងការងារ កាលពីព្រឹកថ្ងៃទី១៨ ខែមករា ឆ្នាំ២០១៨។

ក្នុងជំនួបនេះ លោក Kondo Yoshio បានជម្រាបជូនលោករដ្ឋមន្ត្រីថា វិទ្យាស្ថានថែទាំមនុស្សចាស់នេះ នឹងបណ្តុះបណ្តាលដល់សិក្ខាកាមកម្ពុជា ដែលមានបំណងចង់ទៅធ្វើការនៅប្រទេសជប៉ុន ឲ្យយល់ដឹងពីវិធីសាស្រ្តមើលថែទាំមនុស្សចាស់បានយ៉ាងល្អ។ ក្នុងនោះ មានការបណ្តុះបណ្តាលជាភាសាជប៉ុន ចិត្តវិទ្យា ក្នុងការថែទាំមនុស្សចាស់ និងការសង្គ្រោះបឋមជាដើម ហើយចំពោះគ្រូបណ្តុះបណ្តាល សុទ្ធតែជាជនជាតិជប៉ុន។

ជាមួយគ្នានោះ លោក Kondo yoshio ក៏បានលើកឡើងថា ក្រុមហ៊ុនរបស់លោកបានបញ្ជូនពលករកម្ពុជា ទៅបម្រើការងារនៅជប៉ុន ២០០នាក់រួចមកហើយ លើសពីនេះ ក្រុមហ៊ុន គ្រោងនឹងបង្កើនឲ្យដល់៣០០នាក់បន្ថែមទៀតនៅឆ្នាំ២០១៨នេះ។ លោកឲ្យដឹងថា នៅប្រទេសជប៉ុន បច្ចុប្បន្ន មានមនុស្សចាស់ប្រមាណជាង ៥០ម៉ឺននាក់ ខ្វះការថែទាំ។

ចំណែកលោករដ្ឋមន្ត្រី អ៊ិត សំហេង បានសាទរចំពោះវិទ្យាស្ថានថែទាំមនុស្សចាស់នេះ ដោយលើកឡើងថា វិទ្យាស្ថាននេះ ជាថ្នាក់បណ្តុះបណ្តាលសេវាថែទាំមនុស្សចាស់ដំបូងបំផុតនៅកម្ពុជា ក្នុងការបណ្តុះបណ្តាលសេវាថែទាំមនុស្សចាស់ដល់ពលករកម្ពុជា ដែលនឹងទៅបម្រើការងារនៅជប៉ុន។

លោកបានប្រៀបធៀបសមត្ថភាពរបស់សិក្ខាកាម ដែលទទួលបានការបណ្តុះបណ្តាលនៅក្នុងវិទ្យាស្ថាននេះថា មានសមត្ថភាពប្រហាក់ប្រហែលនឹងគិលានុប្បដ្ឋាកយិកាដែរ។

ជាការកត់សម្គាល់ ដំណឹងនៃការប្រកាសបើកសាលាបណ្តុះបណ្តាលអ្នកថែទាំមនុស្សចាស់របស់ក្រុមហ៊ុនជប៉ុននេះ គឺស្របពេលដែលរាជរដ្ឋាភិបាលកម្ពុជា កាលពីព្រឹកថ្ងៃទី១៨ ខែមករា ២០១៨ បានប្រកាសដាក់ឲ្យប្រើប្រាស់ឯកសារគោលនយោបាយជាតិ ស្តីពីមនុស្សវ័យចាស់ឆ្នាំ ២០១៧-២០៣០៕

អត្ថបទ៖ លីហៀង