ដីនៅតំបន់បាក់ខែង ក្លាយជាកន្លែងសម្រាប់វិនិយោគបែបរីស៉តលំដាប់ផ្កាយ៥
- 2018-01-19 12:26:20
- ចំនួនមតិ 0 | ចំនួនចែករំលែក 0
ដីនៅតំបន់បាក់ខែង ក្លាយជាកន្លែងសម្រាប់វិនិយោគបែបរីស៉តលំដាប់ផ្កាយ៥
ចន្លោះមិនឃើញ
ដីនៅភាគខាងជើងរាជធានីភ្នំពេញបាក់ខែងបានក្លាយជាទីតាំងល្អដែលអាចទាក់ទាញមហាសេដ្ឋីជនជាតិអង់គ្លេសដែលមានប្រភពមកពីកោះបាលី ប្រទេសឥណ្ឌូនេស៊ី លោក Tom Hall ជ្រើសយកមកវិនិយោគជារីស៉តលំដាប់ផ្កាយ៥ដែលមានទុនសរុបរហូតដល់ ២,៥លានដុល្លារ។
មានកត្តាអ្វីខ្លះដែលនាំចិត្តមហាសេដ្ឋីមកពីកោះបាលីបោះទុនរាប់លានមកជ្រើសរើសដីនៅតំបន់ជាប់ទន្លេមេគង្គបាក់ខែងនេះជារីស៉ត?
អ្នកតំណាងរីស៉តលំដាប់ផ្កាយ៥ ប៉ាលីភ្នំពេញ លោក ខូយ តារា បានប្រាប់ពីកត្តាធំៗ២ដែលម្ចាស់វិនិយោគទុនជនជាតិអង់គ្លេសខាងលើជ្រើសរើសយកដីនៅតំបន់បាក់ខែងនេះមកអភិវឌ្ឍន៍ជារីស៉ត។ ទី១. ជាទីតាំងមួយដ៏ល្អដែលជាប់នឹងទន្លេមេគង្គ និងទី២. ជាតំបន់ដែលមានចរាចរណ៍ល្អមិនមានការកកស្ទះច្រើន មានភាពស្ងប់ស្ងាត់ និង ខ្យល់អាកាសបរិសុទ្ធ។
លោក ខូយ តារា បន្ថែមថា តាមគម្រោង Lifestyle Retreats ដែលជាក្រុមហ៊ុនមេរបស់ ដឺបាលីភ្នំពេញ គ្រោងបង្កើតរីស៉តលំដាប់ផ្កាយ៥នេះចំនួន២ទៀតនៅខេត្ត សៀមរាប និងខេត្ត ព្រះសីហនុ នាពេលខាងមុខ។
ជុំវិញរឿងតម្លៃដីនៅតំបន់ខាងលើ អ្នកជំនាញអចលនទ្រព្យអន្តរជាតិ លោកវ៉ា វីរៈ បានប្រាប់ Kley Kley ក្នុងថ្ងៃបើកដំណើរការរីស៉តលំដាប់ផ្កាយ៥ ដឺបាលីភ្នំពេញ ឲ្យដឹងថា "ដីនៅតំបន់បាក់ខែងនឹងត្រូវប៉ាន់ឡើងថ្លៃនៅរយៈពេលខ្លីខាងមុខ"។ វត្តមានរីស៉តលំដាប់ផ្កាយ៥ តម្លៃរាប់លានមួយនេះ នឹងក្លាយជាកត្តានាំផ្លូវមួយសម្រាប់អ្នកវិនិយោគទុនក្នុងស្រុក និងក្រៅស្រុកដ៏ទៃទៀត ងាកមកវិនិយោគបង្កើតកន្លែងស្នាក់នៅលំហែកាយបែបនេះកាន់តែច្រើនក្នុងពេលខាងមុខបន្ថែម។
បើតាមនាយកប្រតិបត្តិ Century 21 Fortuna Investment រូបនេះ អះអាងថាដីនៅតំបន់បែកខាងជើងរាជធានីភ្នំពេញបាក់ខែងនេះ កាលពីមិនទាន់ស្ថាបនាផ្លូវជាតិលេខ៦A រួច ដីតំបន់នេះមានតម្លៃចន្លោះពី ១០០ទៅ ២០០ដុល្លារក្នុងមួយម៉ែត្រការ៉េ តែក្រោយពីផ្លូវស្អាតរហូតមកដល់បច្ចុប្បន្នអាចមានតម្លៃពី៧០០ ទៅ៨០០ដុល្លារក្នុងមួយម៉ែត្រការ៉េ ហើយតម្លៃនេះនឹងអាចប្រែប្រួលបន្តនៅពេលខាងមុខឆាប់ៗ៕
រូបថត៖ ផ្តល់ឲ្យ