សព្វាវុធដែលនឹងត្រូវប្រើប្រាស់ ក្នុងសមយុទ្ធនាគមាសរវាងកម្ពុជា-ចិន

2018-02-04 03:25:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កងទ័ពកម្ពុជា និងចិន នឹងធ្វើសមយុទ្ធយោធានាគមាស ចាប់ពីថ្ងៃទី១៥ ដល់ ៣០ ខែមីនា ឆ្នាំ២០១៨ នៅតំបន់យោធភូមិភាគទី៣ ជួរភ្នំម្រះព្រៅ ដែលជាទីតាំងរបស់កងពលអន្តរាគមន៍លេខ៧០ ក្នុងខេត្តកំពង់ស្ពឺ។ សមយុទ្ធយោធានេះ នឹងប្រើប្រាស់សព្វាវុធទំនើបៗដូចជា ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់ចូលគោលដៅដែលបានកំណត់ ប្រើប្រាស់រថពាសដែក ថ្មើរជើង និងប្រើប្រាស់យន្តហោះចុះពីលើអាកាស ដើម្បីរំដោះចំណាត់ខ្មាំងផងដែរ។ នេះបើតាមលោក ឥត សារ៉ាត់ អគ្គមេបញ្ជាការរងនៃកងយោធពលខេមរភូមិន្ទ បានថ្លែងប្រាប់អ្នកសារព័ត៌មានកាលពីថ្ងៃទី២៥ ខែមករា។

ឧទ្ធម្ភាគចក្រចិន Z-10 (រូបតំណាង)

លោកឲ្យដឹងថា ក្នុងសមយុទ្ធនេះ ភាគីកម្ពុជា មានកងទ័ពចំនួន ២៨០នាក់ ចំណែកភាគីចិន មានចំនួន ១៩០នាក់។ លោកថា សមយុទ្ធនេះមានប្រធានបទចំនួនពីរ គឺប្រឆាំងភេរវកម្ម និងមនុស្សធម៌ ហើយលំហាត់នេះរៀបចំក្នុងរូបភាពកងពលតូច និងអនុវត្តជាក់ស្តែងកម្រិតថ្នាក់វរសេនាតូច ដោយបែងចែកជាពីរគឺលំហាត់ទីបញ្ជាការ និងលំហាត់លើទីលាន។

រថពាសដែក BTR60PB

ការធ្វើសមយុទ្ធនេះ គឺជាលើកទី២ហើយរវាងយោធាកម្ពុជា និងចិន ហើយវិញ្ញាសារដែលភាគីទាំង២ធ្វើរួមមាន៖ ការរាវមីន និងកម្ទេចយុទ្ធភ័ណ្ឌមិនទាន់ផ្ទុះ ការដោះគ្រាប់បែកសារធាតុគីមីពុល ការបន្សាបជាតិគីមីពុល ការប្រយុទ្ធកងអនុសេនាធំរថក្រោះសហការជាមួយវរសេនាតូចថ្មើជើង ការរំដោះចំណាប់ខ្មាំង និងការងារមនុស្សធម៌ ព្រមទាំងបាញ់គ្រាប់ពិតជាដើម។

កាំភ្លើងត្បាល់ 120mm (MT120)

នាយឧត្តមសេនីយ៍ ឥត សារ៉ាត់ បានលើកឡើងថា គោលបំណងនៃការធ្វើលំហាត់នេះ គឺដើម្បីអបអរសាទរខួបអនុស្សាវរីយ៍លើកទី៦០ នៃទំនាក់ទំនងការទូតរវាងកម្ពុជា-ចិន ហើយជំរុញកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងប្រទេសទាំង២៕

ប្រភព៖ Radio Free Asia ប្រែសម្រួល៖ សំភី