កម្ពុជា មានសមត្ថភាពផលិតស៊ីម៉ងត៍បាន ៧លានតោន ក្នុង១ឆ្នាំ ចាប់ពីឆ្នាំនេះទៅ

2018-02-08 03:28:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចាប់ពីឆ្នាំ២០១៨នេះទៅ កម្ពុជា មានសមត្ថភាពផលិតស៊ីម៉ងត៍ បាន ៧លានតោនក្នុង១ឆ្នាំសម្រាប់ផ្គត់ផ្គង់តម្រូវការក្នុងស្រុក។ នេះបើតាមការបញ្ជាក់របស់លោក ស៊ុយ សែម រដ្ឋមន្រ្តីក្រសួងរ៉ែ និងថាមពល នៅក្នុងពិធីសម្ពោធដាក់ឲ្យប្រើប្រាស់នូវរោងចក្រស៊ីម៉ងត៍របស់ក្រុមហ៊ុន ជីបម៉ុង អ៊ីនស៊ី ស៊ីមេន ខបភើរេសិន (CMIC) នៅស្រុកបន្ទាយមាស ខេត្តកំពត នាព្រឹកថ្ងៃទី៨ ខែកុម្ភៈនេះ។

លោក ស៊ុយ សែម ថ្លែងក្នុងអំឡុងកិច្ចប្រជុំ១ កាលពីពេលកន្លងមក (រូបថត៖ ក្រសួងរ៉ែ និងថាមពល)

បើតាមលោក ស៊ុយ សែម បច្ចុប្បន្នរោងចក្រដែលផលិតស៊ីម៉ងត៍ក្នុងស្រុកមានដូចជា៖

រោងចក្រកំពតស៊ីម៉ងត៍ មានទីតាំងនៅស្រុកបន្ទាយមាស និងស្រុកដងទង់ ខេត្តកំពត មានសមត្ថភាពផលិតស៊ីម៉ងត៍ ២លានតោនក្នុង១ឆ្នាំ។
រោងចក្រស៊ីម៉ងត៍កម្ពុជាចក្រីទីង មានទីតាំងនៅស្រុកកំពត ខេត្តកំពត មានសមត្ថភាពផលិតស៊ីម៉ងត៍ ១,១លានតោនក្នុង១ឆ្នាំ។
រោងចក្រ ជីបម៉ុង អ៊ីនស៊ី ស៊ីមេន (CMIC) មានទីតាំងនៅស្រុកបន្ទាយមាស ខេត្តកំពត មានសមត្ថភាពផលិតស៊ីម៉ងត៍ ១,៧លានតោន ក្នុង១ឆ្នាំ។
រោងចក្រ Battambang Conch Cement មានទីតាំងនៅស្រុករតនមណ្ឌល ខេត្តបាត់ដំបង មានសមត្ថភាពផលិតស៊ីម៉ងត៍ ១,៧លានតោនក្នុង១ឆ្នាំ៕