NAGA គ្រោងពង្រីកសេវាកម្មជើងហោះហើរ ដើម្បីចាប់យកកំណើនជនជាតិចិន

2018-02-18 06:16:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

NagaCorp ដែលជាក្រុមហ៊ុនមេរបស់ប្រតិបត្តិករកាស៊ីណូ និងសណ្ឋាគារ ណាហ្កាវើល (Naga World) បានបង្ហើបផែនការរបស់ខ្លួនក្នុងការពង្រីកសេវាកម្មជើងហោះហើរបន្ថែម ខណៈដែលបច្ចុប្បន្នក្រុមហ៊ុននេះ បានជួលយន្តហោះខ្នាតតូចមួយ (Jet) ហើយមានយន្តហោះខ្នាតធំ (Airbuss) ផ្ទាល់ខ្លួនចំនួនពីរគ្រឿង។

ផែនការពង្រីកអាជីវកម្មរបស់ក្រុមហ៊ុនភ្នាល់ល្បែងអន្តរជាតិមួយនេះ បានប្រកាសនៅក្នុងរបាយការណ៍ហិរញ្ញវត្ថុប្រចាំឆ្នាំ២០១៧ របស់ខ្លួន ដែលមានកម្រាស់ជាង ២០ទំព័រ ចេញផ្សាយកាលពីពេលកន្លងទៅថ្មីៗនេះ។ គម្រោងពង្រីកជើងហោះហើររបស់ NagaCorp ទំនងដើម្បីទទួលស្វាគមន៍ការមកដល់នៃភ្ញៀវទេសចរជនជាតិចិន ស្របពេលដែលរបាយការណ៍ខ្លួនបង្ហាញចំណាប់អារម្មណ៍នៃកំណើនភ្ញៀវជនជាតិនេះ មកទស្សនានៅកម្ពុជាច្រើនជាងគេ។

កាស៊ីណូ និងសណ្ឋាគារ ណាហ្កាវើល។ រូបថត៖ វិបសាយ Asia Gambing Brief

យោងតាមសារព័ត៌មាន South China Morning Post លោក Sean Tan អនុប្រធានក្រមហ៊ុន NagaCorp បានថ្លែងថា ចំនួនភ្ញៀវជនជាតិចិនដែលចូលភ្នាល់ល្បែងនៅក្នុងកាស៊ីណូណាហា្គ បានកើនឡើងស្មើនឹង ២០% នៃអតិថិជនដែលចូលភ្នាល់ល្បែងទាំងអស់ ក្នុងរយៈពេលប៉ុន្មានឆ្នាំនេះ។

«ភាគច្រើន យើងធ្លាប់តែមានចំនួនភ្ញៀវជនជាតិវៀតណាមច្រើនជាងគេ តែបច្ចុប្បន្នចំនួនភ្ញៀវដែលច្រើនជាងគេ គឺជនជាតិចិន»។ នេះបើតាមការលើកឡើងរបស់លោក Tan។

ប្រភពដដែលបានគូសបញ្ជាក់ថា ក្រុមហ៊ុនNagaCorp ដែលប្រតិបត្តិការជើងហោះហើរត្រង់ពីចិនដីគោក ឆ្ពោះមកកាន់រាជធានីភ្នំពេញ មានចំនួន ៣៨៦ជើងក្នុងឆ្នាំ២០១៣ ហើយជើងហោះហើររបស់ក្រុមហ៊ុននេះបានកើនដល់ ៥៨០ជើង គិតត្រឹមខែវិច្ឆកា ឆ្នាំ២០១៧។

គួរកត់សម្គាល់ដែរថា ក្នុងឆ្នាំ២០១៧ ប្រាក់ចំណូលដុលពីការលេងល្បែង (GGR) របស់កាស៊ីណូ ណាហ្កា កើនឡើង ៨៥% ស្មើនឹងទំហំទឺកប្រាក់ ៩២៦លានដុល្លារ ក្នុងនោះប្រាក់ចំណេញកើនឡើង ៣៩% ស្មើនឹងទំហំប្រាក់ ២៥៥,២ លានដុល្លារ៕

អត្ថបទ៖ ឈុត សិរីឧត្តម