រថយន្តធំៗនឹងមិនត្រូវអនុញ្ញាតឲ្យឆ្លងកាត់ក្រុងតាខ្មៅ រយៈពេល៣ថ្ងៃ

2018-03-05 08:59:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលខេត្តកណ្ដាល បានប្រកាសហាមឃាត់រថយន្តធំៗមិនឲ្យធ្វើដំណើរឆ្លងកាត់ភូមិសាស្ត្រក្រុងតាខ្មៅ ខេត្តកណ្ដាល រយៈពេល៣ថ្ងៃ គឺចាប់ពីម៉ោង០០:០១នាទី ថ្ងៃទី០៩ ដល់ម៉ោង០៦:០០នាទី ថ្ងៃទី១២ ខែមីនា ឆ្នាំ២០១៨។

មូលហេតុនៃការបញ្ចៀសចរាចរណ៍នេះគឺដោយសារតែក្រុងតាខ្មៅនឹងមានការប្រារព្ធធ្វើពិធីបុណ្យទន្លេលើកទី៤ ចាប់ពីថ្ងៃទី៩ ដល់ថ្ងៃទី១១ ខែមីនា ឆ្នាំ២០១៨ ដែលជាហេតុតម្រូវឲ្យមានការធានាសុវត្ថិភាព សន្តិសុខ សណ្ដាប់ធ្នាប់ និងបរិស្ថាន នៅអំឡុងពិធីបុណ្យនេះ។ ពលរដ្ឋដែលជាម្ចាស់រថយន្តដឹកទំនិញគ្រប់ប្រភេទ ហើយត្រូវឆ្លងកាត់ភូមិសាស្ត្រក្រុងតាខ្មៅ អាចអនុវត្តតាមការណែនាំរបស់រដ្ឋបាលខេត្តកណ្ដាលដូចខាងក្រោម៖

១. រថយន្តដឹកទំនិញគ្រប់ប្រភេទដែលធ្វើចរាចរណ៍មកពីទិសដៅផ្លូវជាតិលេខ២១, ២១A, ផ្លូវលេខ១១០ សូមបើកបរវាងទៅតាមផ្លូវលេខ១១៥ ឆ្ពោះទៅមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ)។

២. រថយន្តដឹកទំនិញគ្រប់ប្រភេទដែលធ្វើចរាចរណ៍មពីទិសដៅផ្លូវជាតិលេខ២ សូមបើកបរវាងទៅតាមមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ)។

៣. រថយន្តដឹកទំនិញគ្រប់ប្រភេទដែលធ្វើចរាចរណ៍មកពីទិសដៅរាជធានីភ្នំពេញ តាមបណ្ដោយផ្លូវជាតិលេខ២ សូមបើកបរវាងទៅតាមមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) ត្រង់ចំណុចផ្លូវប្រសព្វមុខវត្តចាក់អង្រែក្រោម៕

អត្ថបទ៖ ឈាង.