ស្ថានទូតអាមេរិក ទៅស្វែងយល់ពីសក្ដានុពលសេដ្ឋកិច្ច នៅខេត្តព្រះសីហនុ

2018-03-06 04:16:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តំណាងស្ថានទូតសហរដ្ឋអាមេរិកប្រចាំកម្ពុជា លោក David Ryan Sequeira ដែលជាមន្ត្រីទទួលបន្ទុកសេដ្ឋកិច្ចប្រចាំស្ថានទូតសហរដ្ឋអាមេរិក បានចូលជួបសម្ដែងការគួរសម និងពិភាក្សាការងារជាមួយលោក យន្ត មីន អភិបាលខេត្តព្រះសីហនុ កាលពីថ្ងៃទី៥ ខែមីនា ២០១៨ ម្សិលមិញ។

លោក David Ryan Sequeira មានប្រសាសន៍ថា ជំនួបពិភាក្សានាពេលនេះ មានគោលបំណងឈ្វេងយល់ពីសក្ដានុពលសេដ្ឋកិច្ច និងការវិនិយោគនៅខេត្តព្រះសីហនុ ដើម្បីយកទៅផ្សព្វផ្សាយឲ្យបានជាក់លាក់ដល់អ្នកវិនិយោគសហរដ្ឋអាមេរិក ដែលមានបំណងមកធ្វើការវិនិយោគនៅខេត្តព្រះសីហនុ នាពេលខាងមុខ ។

លោក David Ryan Sequeira មន្ត្រីទទួលបន្ទុកសេដ្ឋកិច្ចប្រចាំស្ថានទូតសហរដ្ឋអាមេរិក

លោកបន្ថែមថា "ដោយមើលឃើញថា ខេត្តព្រះសីហនុ មានការអភិវឌ្ឍរីកចម្រើនលឿន និងមានអំណោយផលល្អ ក្នុងការដឹកជញ្ជូនតាមផ្លូវទឹកកំពង់ផែសមុទ្រទឹកជ្រៅ និងមានព្រលានយន្តហោះអន្តរជាតិ តភ្ជាប់ទៅកាន់ប្រទេសនៅលើសកលលោក លោកក៏ចង់ដឹងថា នៅពេលអ្នកវិនិយោគមកច្រើន តើខេត្តព្រះសីហនុមានកម្លាំងពលកម្ម និងធនធានមនុស្សគ្រប់គ្រាន់សម្រាប់បម្រើការងារក្នុងរោងចក្រ សហគ្រាសដែរឬទេ? នៅខណៈអ្នកវិនិយោគ និងទេសចរចិនមកខេត្តព្រះសីហនុមានការកើនឡើងច្រើន"។

ចំណែកលោក យន្ត មីន បានបញ្ជាក់ថា រាជរដ្ឋាភិបាលកម្ពុជាបានចាត់ទុកខេត្តព្រះសីហនុ ជាតំបន់ប៉ូលសេដ្ឋកិច្ចពហុបំណងធំជាងគេក្នុងប្រទេសកម្ពុជា ដែលក្នុងនោះ មានវិស័យឧស្សាហកម្ម ពាណិជ្ជកម្ម និងទេសចរណ៍។ លោកបន្ថែមថា លោកស្នើឲ្យសហរដ្ឋអាមេរិកនាំអ្នកវិនិយោគមកកាន់ខេត្តព្រះសីហនុ លើសេវាកម្មទេសចរណ៍ និងឧស្សាហកម្ម ខណៈខេត្តព្រះសីហនុ កំពុងខ្វះខាតនូវសណ្ឋាគារ ផ្ទះសំណាក់នៅពេលមានពិធីបុណ្យជាតិ អន្តរជាតិ ហើយកម្ពុជាមានការអនុគ្រោះសម្រាប់អ្នកវិនិយោគជាតិ និងអន្តរជាតិផងដែរ៕