ទូតអាមេរិក និងទូតចិន ទៅស្វែងយល់ពីសក្ដានុពលខេត្តព្រះសីហនុ ផ្ទួនៗគ្នា

2018-03-09 02:49:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ត្រឹមតែ ៣ថ្ងៃប៉ុណ្ណោះ ក្រោយតំណាងស្ថានទូតអាមេរិកបានធ្វើដំណើរស្វែងយល់ពីសក្ដានុពលសេដ្ឋកិច្ច និងការវិនិយោគ នៅខេត្តព្រះសីហនុ មន្រ្តីស្ថានទូតចិនក៏បានធ្វើដំណើរទៅស្វែងយល់ពីសក្ដានុពលខេត្តព្រះសីហនុផងដែរ ដោយមន្រ្តីស្ថានទូតទាំងពីរ បានជួបពិភាក្សាជាមួយអភិបាលខេត្តព្រះសីហនុ លោក យន្ត មីន ដូចគ្នា។

នៅថ្ងៃទី៥ ខែមីនា ២០១៨ តំណាងស្ថានទូតសហរដ្ឋអាមេរិកប្រចាំកម្ពុជា លោក David Ryan Sequeira ដែលជាមន្ត្រីទទួលបន្ទុកសេដ្ឋកិច្ចប្រចាំស្ថានទូតសហរដ្ឋអាមេរិក បានចូលជួបសម្ដែងការគួរសម និងពិភាក្សាការងារជាមួយលោក យន្ត មីន អភិបាលខេត្តព្រះសីហនុ។ លោក David Ryan Sequeira មានប្រសាសន៍ថា ជំនួបពិភាក្សាមានគោលបំណងឈ្វេងយល់ពីសក្ដានុពលសេដ្ឋកិច្ច និងការវិនិយោគនៅខេត្តព្រះសីហនុ ដើម្បីយកទៅផ្សព្វផ្សាយឲ្យបានជាក់លាក់ដល់អ្នកវិនិយោគសហរដ្ឋអាមេរិក ដែលមានបំណងមកធ្វើការវិនិយោគនៅខេត្តព្រះសីហនុ នាពេលខាងមុខ។

លោក David Ryan Sequeira មន្ត្រីទទួលបន្ទុកសេដ្ឋកិច្ចប្រចាំស្ថានទូតសហរដ្ឋអាមេរិក

ចំណែកនៅថ្ងៃទី៨ ខែមីនា ម្សិលមិញ មន្ត្រីស្ថានទូតចិនដឹកនាំដោយលោកស្រី Zuo Wenxing អនុប្រធានក្រុមបេសកកម្ម និងជាទីប្រឹក្សានយោបាយ នៃស្ថានទូតចិនប្រចាំនៅកម្ពុជា បានជួបសំដែងការគួរសមជាមួយអភិបាលខេត្តព្រះសីហនុ និងឈ្វេងយល់ពីស្ថានភាពអ្នកវិនិយោគ និងភ្ញៀវទេសចរចិន ដែលមកបណ្ដាក់ទុនរកស៊ីលើវិស័យរោងចក្រ សណ្ឋាគារ កាស៊ីណូ និងសេវាកម្មផ្សេងៗ នៅខេត្តព្រះសីហនុ។

លោកស្រី Zuo Wenxing ក៏បានថ្លែងអរគុណរដ្ឋបាលខេត្តព្រះសីហនុ ដែលបានបង្កលក្ខណៈងាយស្រួលដល់អ្នកវិនិយោគ និងទេសចរចិន នៅលើទឹកដីខេត្តព្រះសីហនុ ផងដែរ៕