ក្រសួងអប់រំ បើកកម្មវិធីប្រកួតប្រជែងលើវិញ្ញាសាចំនួន៣ ក្នុងទិវាជាតិអំណាន
- 2018-03-09 09:02:32
- ចំនួនមតិ 0 | ចំនួនចែករំលែក 0
ក្រសួងអប់រំ បើកកម្មវិធីប្រកួតប្រជែងលើវិញ្ញាសាចំនួន៣ ក្នុងទិវាជាតិអំណាន
ចន្លោះមិនឃើញ
ក្រសួងអប់រំ យុវជន និងកីឡា បានបើកកម្មវិធីប្រកួតប្រជែងអានអត្ថបទ ស្មូតកំណាព្យ តែងនិពន្ធ និងតាំងពិព័រណ៌ ក្នុងទិវាជាតិអំណានលើកទី៣។ ពិធីបើកនេះ ធ្វើឡើងក្រោមអធិបតីភាព លោក ណាត ប៊ុនរឿន រដ្ឋលេខាធិការក្រសួងអប់រំ នាព្រឹកថ្ងៃទី៩ ខែមីនា ឆ្នាំ២០១៨ នៅវិទ្យាស្ថានបច្ចេកវិទ្យាកម្ពុជា។
ក្រសួងអប់រំ បានឲ្យដឹងថា កម្មវិធីប្រកួតប្រជែងអានអត្ថបទ ស្មូតកំណាព្យ តែងនិពន្ធ និងតាំងពិព័រណ៍ ត្រូវបានរៀបចំឡើង ក្នុងគោលដៅអភិរក្សវប្បធម៌លើកកម្ពស់សមត្ថភាពអំណាន និងចំណេះដឹងអក្សរសាស្ត្រក្នុងចំណោមប្រជាពលរដ្ឋខ្មែរឲ្យកាន់តែប្រសើរ ព្រមទាំងផ្ដល់ឱកាសដល់យុវជនកម្ពុជាដើម្បីបញ្ចេញសមត្ថភាពរបស់ខ្លួន។
ការប្រកាសលទ្ធផល និងប្រគល់ពានរង្វាន់ ជយលាភី ពីលេខ១ ដល់លេខ៣ លើវិញ្ញាសាទាំង៣ ទូទាំងប្រទេស នឹងប្រព្រឹត្តទៅក្នុងកម្មវិធីប្រារព្ធទិវាជាតិអំណាន ថ្នាក់ជាតិ ថ្ងៃទី១១ ខែមីនា ឆ្នាំ២០១៨។
គួរបញ្ជាក់ថា រាជរដ្ឋាភិបាល បានចេញអនុក្រឹត្យបង្កើតឲ្យមានទិវាជាតិអំណាន ដោយកំណត់យកថ្ងៃទី ១១ខែមីនា ជារៀងរាល់ឆ្នាំ ដើម្បីជំរុញឲ្យប្រជាពលរដ្ឋ ជាពិសេសសិស្ស និស្សិត បង្កើនទម្លាប់អាន និងការយល់ដឹងរបស់ខ្លួន ដែលជាស្នូលក្នុងការចូលរួមអភិវឌ្ឍប្រទេស៕
រូបថត៖ ហ្វេសប៊ុកក្រសួងអប់រំ