ដូណាល់ ត្រាំ រងព្យុះប្រតិកម្ម ក្រោយការដំឡើងពន្ធនាំចូល
- 2018-03-12 04:11:28
- ចំនួនមតិ 0 | ចំនួនចែករំលែក 0
ដូណាល់ ត្រាំ រងព្យុះប្រតិកម្ម ក្រោយការដំឡើងពន្ធនាំចូល
ចន្លោះមិនឃើញ
ប្រធានាធិបតីអាមេរិក ដូណាល់ ត្រាំ កាលពីសប្ដាហ៍មុន បានសម្រេចដំឡើងពន្ធនាំចូលដែកថែប រហូតដល់ ២៥% និងអាលុយមីញ៉ូម រហូតដល់ ១០% ដោយលើកលែងចំពោះប្រទេសកាណាដា និងម៉ិកស៊ីកូ។ ការសម្រេចដំឡើងពន្ធនេះ បានធ្វើឲ្យប្រទេសមហាអំណាចសេដ្ឋកិច្ចពិភពលោកដ៏ទៃទៀត ក៏ដូចជាសម្ព័ន្ធមិត្តរបស់អាមេរិក និងនាយកប្រតិបត្តិក្រុមហ៊ុនសាជីវកម្មអន្តរជាតិ ប្រតិកម្មយ៉ាងខ្លាំង។
ផ្ដើមមុនគេ គឺប្រទេសមហាអំណាចសេដ្ឋកិច្ចពិភពលោកទីពីរ តំណាងដោយរដ្ឋមន្ត្រីការបរទេសចិន Wang Yi បានប្រកាសប្រឆាំងនឹងការដំឡើងពន្ធនាំចូលរបស់អាមេរិក ហើយបញ្ជាក់ថា លទ្ធផលនៃការដំឡើងនេះ គឺនាំមកនូវគ្រោះថ្នាក់តែមួយប៉ុណ្ណោះ។ ប្រមុខការទូតចិនរូបនេះ ក៏ព្រមានដែរថា ចិនក៏នឹងចាត់វិធានការឆ្លើយតបផងដែរ ប្រសិនអាមេរិកពុំមានការកែប្រែគោលនយោបាយពាណិជ្ជកម្មនេះ។
ចំណែកសម្ព័ន្ធមិត្តអាមេរិក មានជប៉ុន អាល្លឺម៉ង់ និងកូរ៉េខាងត្បូង បានអំពាវនាវឲ្យអាមេរិក លើកលែងពន្ធចំពោះការនាំចូលដែកថែប និងអាលុយមីញ៉ូម របស់ពួកគេ ទៅសហរដ្ឋអាមេរិក។ រដ្ឋាភិបាលប្រទេសទាំងបីនេះ កំពុងតាមដាន និងគ្រោងពិភាក្សាជាមួយរដ្ឋាភិបាលអាមេរិក ចំពោះការវិវត្តថ្មីនេះ។
ងាកទៅនាយកប្រតិបត្តិក្រុមហ៊ុន Tesla Motors លោក Elon Musk បានលើកឡើងថា ការដំឡើងពន្ធនាំចូលថ្មីនេះ នឹងធ្វើឲ្យអ្វីៗគ្រប់យ៉ាងជួបបញ្ហាពិបាក។ លោកបញ្ជាក់ថា ការវិវត្តថ្មីនេះ គឺដូចជាការប្រកួតប្រជែងនៅក្នុងកីឡាអូឡាំពិកអីចឹង៕