ក្រុមហ៊ុន១ គ្រោងដំឡើងប្រព័ន្ធតាមដានចរាចរទូកនេសាទ នៅដែនសមុទ្រកម្ពុជា

2018-03-13 07:46:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន CETC Ocean Information បានបង្ហាញពីគម្រោងដំឡើងប្រព័ន្ធតាមដានចរាចរទូក ឬកប៉ាល់នេសាទនៅលើដែនសមុទ្រកម្ពុជា ដើម្បីគ្រប់គ្រងនិងត្រួតពិនិត្យបទល្មើសនេសាទ។ ការបង្ហាញនេះ ធ្វើឡើងដោយលោកបណ្ឌិត Li Shen Tang នាយកផ្នែកវិទ្យាសាស្រ្ត និងអភិវឌ្ឍន៍បច្ចេកវិទ្យារបស់ក្រុមហ៊ុននេះ ក្នុងជំនួបពិភាក្សាជាមួយលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី១៣ ខែមីនា ឆ្នាំ២០១៨ នៅទីស្តីការក្រសួង។

លោក វេង សាខុន ក្នុងជំនួបជាមួយប្រតិភូក្រុមហ៊ុន CETC (រូបថត៖ ក្រសួងកសិកម្ម)

លោក Li Shen Tang ក៏បានជម្រាបជូនលោករដ្ឋមន្រ្តីផងដែរពីប្រវត្តិរបស់ក្រុមហ៊ុន មុខងារនិងភារកិច្ចសំខាន់ៗមួយចំនួនដូចជាព័ត៌មានវិទ្យា បច្ចេកវិទ្យាលម្ហសមុទ្រនិងបាតសមុទ្រ ប្រព័ន្ធរ៉ាដាតាមដានកប៉ាល់-នាវានេសាទ ការគ្រប់គ្រងវារីវប្បកម្មសមុទ្រ និងមជ្ឈមណ្ឌលស្រាវជ្រាវសមុទ្រជាដើម។

ប្រព័ន្ធនេះបង្កការងាយស្រួលដល់អាជ្ញាធរគ្រប់គ្រងលម្ហសមុទ្រ ការនេសាទខុសច្បាប់ ការបំពានចូលដែនសមុទ្រ ការកំណត់ទីតាំងតំបន់ហាមឃាត់ការនេសាទ កំណត់ទីតាំងទូកនេសាទ ការបញ្ជាក់ពីប្រភពត្រី ទំនាក់ទនងឬការបញ្ជូនព័ត៌មានរវាងអាជ្ញាធរនិងទូកនេសាទ និងប្រព័ន្ធក្រើនរំលឹកពីហានីភ័យផ្សេងៗឲ្យមានប្រសិទ្ធភាព និងរហ័សទាន់ចិត្ត។

រូបតំណាង

ជាការឆ្លើយតប លោក វេង សាខុន បានស្វាគមន៍ចំពោះគម្រោងខាងលើនេះ ប៉ុន្តែលោកបានណែនាំឲ្យក្រុមហ៊ុនត្រូវធ្វើការសិក្សាស្រាវជ្រាវឲ្យបានគ្រប់ជ្រុងជ្រោយជាមុនសិន មុននឹងបោះទុនវិនិយោគលើការប្រើប្រាស់ប្រព័ន្ធបច្ចេកវិទ្យាថ្មីនេះ ពិសេសប្រភពទុននៃការផ្តល់ហិរញ្ញប្បទានវិនិយោគ និងកិច្ចដំណើរការឲ្យបានហ្មត់ចត់ និងច្បាស់លាស់ជាមួយរដ្ឋបាលជលផល និងអាជ្ញាធរពាក់ព័ន្ធ៕

អត្ថបទ៖ សំភី