សម្ដេច ហ៊ុន សែន បញ្ជារដ្ឋមន្រ្តី ២រូប ស្រាវជ្រាវរឿងអ្នកសន្យាកាត់ដីឲ្យបរទេស

2018-03-14 03:37:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេច ហ៊ុន សែន បានបញ្ជាឲ្យរដ្ឋមន្រ្តីក្រសួងយុត្តិធម៌ និងរដ្ឋមន្ត្រីក្រសួងមហាផ្ទៃ សហការគ្នាស្រាវជ្រាវរឿងអ្នកសន្យាកាត់ដីចំនួន ៤ខេត្តឲ្យទៅឲ្យបររទេស។ ការបញ្ជានេះ បានធ្វើឡើងក្នុងពេលសម្ដេចនាយករដ្ឋមន្រ្តីអញ្ជើញក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវស្ពានឆ្លងទន្លេទៅកោះប៉ែន ស្ថិតនៅក្នុងភូមិកំពង់ត្រុំ ឃុំកោះមិត្ត ស្រុកកំពង់សៀម ខេត្តកំពង់ចាម នៅព្រឹកថ្ងៃទី១៤ ខែមីនា ២០១៨នេះ។

សម្ដេចតេជោថ្លែងថា "មកជេរគេសុទ្ធតែអាយ៉ងបរទេស ស្រាប់តែខ្លួនឯងធ្វើតាមបរទេស! ពាក្យសម្បថ គេមិនឲ្យបរទេសចូលជ្រៀតជ្រែកកិច្ចការកម្ពុជានោះទេ! ឥឡូវលេចចេញរឿងរ៉ាវក្បត់ជាតិ បើគេឈ្នះ គេកាត់ដីឲ្យ ៤ខេត្តទៅកុក ស! កុក ស មិនមែនជាខ្មែរទេ... រឿងក្ដីមួយនេះធំណាស់ រដ្ឋមន្រ្តីក្រសួងយុត្តិធម៌ ត្រូវសហការជាមួយក្រសួងមហាផ្ទៃ រឿងនេះមិនតូចទេ ! គ្មានអ្នកណាមានសិទ្ធិកាត់ដីឲ្យបរទេសនោះទេ"។

ការបញ្ជារបស់សម្ដេចតេជោនៅព្រឹកនេះ គឺធ្វើឡើងបន្ទាប់ពីមានចុះផ្សាយពីឯកសារបែកធ្លាយមួយ ជាឯកសារនៃកិច្ចព្រមព្រៀងរវាងលោក សម រង្ស៊ី អតីតប្រធានគណបក្សសង្គ្រោះជាតិ ជាមួយលោក កុក ស ប្រធានមូលនិធិជនជាតិម៉ុងតាញ៉ា កាលពីឆ្នាំ២០១៣ នៅប្រទេសហ្វីលីពីន។

ចំណែកលោក សម រង្ស៊ី វិញ បានបញ្ជាក់តាមរយៈសារព័ត៌មានក្នុងស្រុកមួយ ដោយបដិសេធថា លោកមិនបានចុះហត្ថលេខាកាត់ដីឲ្យវៀតណាមឡើយ។ បើតាមលោក សម រង្ស៊ី ឯកសារដែលលោកចុះហត្ថលេខាជាមួយលោក Kok Ksor មេដឹកនាំចលនាម៉ុងតាញ៉ា នៅឆ្នាំ២០១៣នោះ មែនទែនទៅ មានខ្លឹមសារចង់ឲ្យមានការទទួលស្គាល់សិទ្ធិស្របច្បាប់របស់ជនជាតិភាគតិចម៉ុងតាញ៉ា ដែលរស់នៅខេត្តភាគឦសានប្រទេសកម្ពុជា ដូចជាខេត្តមណ្ឌលគិរី រតនគិរី ក្រចេះ និងស្ទឹងត្រែង៕

ប្រភព៖ ដើមអម្ពិល ប្រែសម្រួល៖ វាសនា