កូរ៉េខាងត្បូង ចេញបម្រាមថ្មី មិនឲ្យកុមារតូចរៀនភាសាអង់គ្លេស

2018-03-14 04:02:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលកូរ៉េខាងត្បូង បានដាក់បម្រាមថ្មីមួយនៅក្នុងប្រទេស ដោយមិនអនុញ្ញាតឲ្យក្មេងតូចនៅថ្នាក់ទី១ និងថ្នាក់ទី២ រៀនភាសាអង់គ្លេសឡើយ។

ការហាមប្រាមយ៉ាងដូច្នេះ ព្រោះតែរដ្ឋាភិបាលព្រួយបារម្ភខ្លាំងចំពោះសមត្ថភាពប្រើប្រាស់ភាសាដើមកំណើតរបស់កុមារតូច នៅពេលដែលពួកគេចាប់ផ្ដើមរៀនភាសាបរទេសនៅវ័យក្មេងពេក។ ភាសាអង់គ្លេសនឹងមិនត្រូវដាក់បញ្ចូលក្នុងកម្មវិធីសិក្សាទេ ទាល់តែដល់ថ្នាក់ទី៣ទើបអាចរៀនបាន ពោលគឺរង់ចាំឲ្យកុមាររៀនភាសាកូរ៉េចេះល្អជាមុនសិន។

លោក Kwon Ji-yong មន្ត្រីក្រសួងអប់រំកូរ៉េខាងត្បូង រៀបរាប់ថា៖ "យោងតាមអ្នកជំនាញអប់រំភាសាអង់គ្លេសជាច្រើន និងអ្នកឯកទេសសរសៃប្រសាទ អាយុដែលគួររៀនអង់គ្លេសជាភាសាទី២ គឺនៅថ្នាក់ទី៣"។ ចំណែកឯ លោក Andy Kirkpatrick អ្នកជំនាញភាសានៃសកលវិទ្យាល័យ Griffith វិញ អះអាងថា ការពន្យារពេលរៀនភាសាបរទេសគឺល្អសម្រាប់កុមារ ដោយហេតុថា ពួកគេអាចស្វែងរកច្បាស់ពីភាសាកំណើត ហើយអាយុដែលគួររៀនភាសាបរទេសគឺនៅអាយុ ១១ឆ្នាំឡើងទៅ។

ជុំវិញនឹងបម្រាមខាងលើ អាណាព្យាបាល និងគ្រូបង្រៀនមួយចំនួន បានបង្ហាញភាពមិនពេញចិត្ត ដោយខ្លះយល់ឃើញថា វានឹងអាចធ្វើឲ្យតម្លៃសិក្សាអង់គ្លេសនៅសាលាឯកជនឡើងថ្លៃជាងមុន ហើយគ្រូបង្រៀនជាច្រើនពាន់នាក់នឹងបាត់បង់ការងារធ្វើជាក់ជាមិនខាន៕

ប្រភព៖ The Pie NEWS ប្រែសម្រួល៖ ឈាង.