Leonel Messi របស់​ក្លឹប​អ្នក​មាន​បុណ្យ Barcelona ធ្វើ​បាន​ល្អ​បំផុត​ក្នុង​ការ​ប្រកួត​ទល់នឹង​ក្រុម​ភ្ញៀវ​តោខៀវ Chelsea ក្នុង​ការ​ប្រកួត​ជើង​ទី២ វគ្គ ១៦​ក្រុម​ចុងក្រោយ ដោយ​រក​បាន​ចំនួន ២គ្រាប់ មុន​កញ្ចែ​របស់​អាជ្ញាកណ្ដាល​ត្រូវ​បាន​ផ្លុំ​បញ្ចប់​៩០នាទី ដោយ​លទ្ធផល ៣-០ កាល​ពី​យប់មិញ។

Messi រក​បាន​គ្រាប់​ដំបូង​ឲ្យ Barcelona តាំង​ពី​នាទី៣ រួច​បន្ថែម​គ្រាប់​ទី​ពីរ​ដោយ Ousmane Dembele ក្នុង​នាទី២០ នៃ​វគ្គ​ទី​មួយ។ ចំណែក គ្រាប់​ទី៣ ត្រូវ​ធ្វើ​បាន​សម្រេច​ដោយ Messi ដដែល ក្នុង​វគ្គ​ទី​ពីរ នៅ​នាទី​៦១។

លទ្ធផល​នេះ មាន​ន័យ​ថា ពីរ​ជើង Barcelona ឈ្នះ Chelsea ដោយ​លទ្ធផល ៤-១ ។ ចំណែក​មួយ​គូ​ទៀត Bayern Munich បាន​បំបាក់ Besiktas ដោយ​លទ្ធផល​ពីរ​ជើង ៨-១​។

ក្នុង​ចំណោម​ក្រុម​មកពី​អង់គ្លេស ៥​ក្រុម​ដែល​បាន​ឡើង​ទៅ​វគ្គ ១៦ក្រុម មាន​តែ២​ក្រុម​ប៉ុណ្ណោះ ដែល​បាន​ឈាន​ទៅ​វគ្គ៨​ក្រុម​ចុងក្រោយ គឺ Manchester City និង Liverpool ។

ដូច្នេះ ៨ក្រុម​ដែល​បាន​ឡើង​ទៅ​វគ្គបន្ត មាន​ដូចជា Juventus, Man City, Liverpool, Sevilla, Real Madrid, Roma, Barcelona និង Bayern Munich ៕